បាត់ដំបងៈ គម្រោងផ្សារទំនើបតម្លៃជាង ១០ លានដុល្លាររបស់ឧកញ៉ា ភូ ពុយ នឹងបើកដំណើរការនៅឆ្នាំ ២០១៤ ខាងមុខនេះបន្ទាប់ពីគម្រោងបានពន្យារពេលជាច្រើនឆ្នាំដោយសារការធ្លាក់ចុះសេដ្ឋកិច្ចពិភពលោក និងពេលវេលាមិនទាន់មកដល់។
លោក ឧកញ៉ា ភូ ពុយ ដែលជាម្ចាស់ផ្សារទំនើបឧកញ៉ា ភូ ពុយ បានប្រាប់ថា បច្ចុប្បន្នផ្សារទំនើបនេះកំពុងសាងសង់បានប្រហែល ៩០ ភាគរយហើយ ដើម្បីធ្វើឲ្យទាន់គម្រោងបើកដំណើរការនៅមុនពិធីបុណ្យចូលឆ្នាំថ្មីប្រពៃណីខ្មែរ ឆ្នាំ ២០១៤ ខាងមុខ។ ផ្សារទំនើបថ្មីនោះបានចាប់ផ្តើមសាងសង់ដំបូងក្នុងឆ្នាំ ២០០៨ ប៉ុន្តែគម្រោងនេះបានពន្យារពេលរហូតមកទល់ពេលនេះដោយសារការធ្លាក់ចុះសេដ្ឋកិច្ចពិភពលោកកាលពីឆ្នាំ ២០០៨ ស្របពេលដែលសភាពការណ៍វិវត្តន៍របស់ទីក្រុងនេះមិនទាន់មានអំណោយផល ដល់ការបើកដំណើរការផ្សារទំនើបនេះ។
ផ្សារទំនើបថ្មីនេះសង់លើផ្ទៃដីជាង ១ ហិកតា ដោយមានកម្ពស់ ៤ ជាន់ស្ថិតក្នុងសង្កាត់ អូរចា ក្រុង បាត់ដំបង។
ទាក់ទងនឹងគោលដៅបើកផ្សារទំនើបថ្មីនេះ លោក ភូ ពុយ បានថ្លែងថា៖ «យើងគិតថា នៅពេលបើកដំណើរការដំបូងផ្សារទំនើបនេះមិនអាចដំណើរការពេញលេញ ១០០ ភាគរយនោះទេ ប៉ុន្តែយើងរំពឹងថា នឹងដំណើរការពេញលេញនៅឆ្នាំ ២០១៥ខាងមុខ»។
លោកបានបន្តថា៖ «ប្រសិនបើការលក់ទំនិញក្នុងផ្សារទំនើបនេះមានតម្លៃថ្លៃជាងផ្សារធម្មតានោះលទ្ធផលនឹងបរាជ័យជាមិនខាន។ ហេតុនេះយើងកំពុងទាក់ទងជាមួយក្រុមហ៊ុនធំៗដើម្បីផ្គត់ផ្គង់ទំនិញ មកដាក់លក់នៅទីនេះក្នុងតម្លៃដូចផ្សារធម្មតា ឬថោកជាង»។
មុនពេលផ្សារទំនើបនេះបើកដំណើរការអ្នកវិនិយោគរូបនេះបានបើកដំណើរការផ្សាររាត្រីមួយនៅក្បែរគ្នានោះរួចមកហើយដើម្បីបន្សាំប្រជាជន ឲ្យចេះប្រើប្រាស់ និងទិញទំនិញនៅផ្សារទំនើបថ្មីនៅពេលខាងមុខ ដោយបច្ចុប្បន្ននេះមានប្រជាជនក្នុងទីក្រុង និងមកពីបណ្តាស្រុកជុំវិញខេត្តបានមកកម្សាន្តនៅផ្សារនោះយ៉ាងច្រើនរហូតដល់យប់ជ្រៅ។
លោកអះអាងថា៖ «ចាប់ពីឆ្នាំ ២០១៥ ទៅខ្ញុំគិតថា ប្រជាជននៅក្រុង បាត់ដំបងនឹងចេះប្រើប្រាស់ និងទិញទំនិញក្នុងផ្សារទំនើបមិនចាញ់ប្រជាជនថៃនោះទេ ព្រោះបច្ចុប្បន្នប្រជាជនក្នុងទីក្រុងនេះប្រើប្រាស់របស់របរមិនចាញ់អ្នករស់នៅក្នុងរាជធានីភ្នំពេញនោះទេ»។ លោកបានបន្តទៀតថា៖ «បច្ចុប្បន្នយើងកំពុងបង្រៀនអាជីវករឲ្យស្គាល់រោងចក្រដើម្បីយកទំនិញមកលក់ក្នុងតម្លៃសមស្របនឹងទីផ្សារធម្មតា»។
រហូតមកដល់ពេលនេះមានអតិថិជនកក់តូបក្នុងផ្សារខាងលើបានប្រហែល ៥០ ភាគរយហើយ ខណៈការកសាងផ្សារនេះសម្រេចរួចរាល់ជាស្ថាបពរនៅសល់តែការតុបតែងលម្អខាងក្នុងអគារប៉ុណ្ណោះ។ ផ្សារទំនើបដែលគ្រោងនឹងបើកដំណើរការក្នុងឆ្នាំ ២០១៤ ខាងមុខនឹងក្លាយជាផ្សារទំនើបទី២ នៅក្រុង បាត់ដំបងបន្ទាប់ពី ផ្សារទំនើបទី១ដែលវិនិយោគដោយក្រុមហ៊ុន អ៊ែតវូដ ហើយបានបើកដំណើរការកាលពីប៉ុន្មានឆ្នាំកន្លងមក។ ផ្សារទំនើបដែលបានបើកដំណើរការនោះមិនសូវមានដំណើរការល្អនោះទេ ដោយសារការលក់ទំនិញនៅទីនោះថ្លៃជាងផ្សារធម្មតា។
លោក អើម សុខុម អភិបាលក្រុង បាត់ដំបង បានប្រាប់ថា បច្ចុប្បន្ននេះអាជ្ញាធរក្រុងកំពុងសម្របសម្រួលជាមួយអាជីវករដើម្បី ឲ្យពួកគេចូលទៅលក់ទំនិញនៅផ្សារទំនើបរបស់លោក ឧកញ៉ា ភូ ពុយ ហើយខាងក្រុមហ៊ុនសង់ផ្សារទំនើបនោះក៏កំពុងទាក់ទងក្រុមហ៊ុនធំៗនៅ ប្រទេសថៃ និងវៀតណាមដើម្បីយកទំនិញមកលក់ទីនេះក្នុងតម្លៃសមស្របជាមួយ ជីវភាពរស់នៅរបស់ប្រជាពលរដ្ឋនៅទីក្រុងនេះ។
លោកបានថ្លែងថា៖ «ប្រជាជនរីករាយសប្បាយចិត្តនៅពេលទីក្រុងមានការរីកចម្រើនលឿន និងមានផ្សារទំនើបៗបែបនេះបើកដំណើរការ»។
លោក ប្រាជ្ញ ច័ន្ទ អភិបាលខេត្ត បាត់ដំបង មានប្រសាសន៍ថា៖ «ខ្ញុំគាំទ្រចំពោះការវិនិយោគបែបនេះហើយខ្ញុំ រីករាយចំពោះដំណើរវិវត្តន៍ដ៏ល្អនេះ»៕
ប្រភពពី ភ្នំពេញប៉ុស្តិ៍
Read more: http://www.cambodiapage.info/
0 comments:
Post a Comment