រតនគិរីៈ មន្រ្តីអាជ្ញាធរជំនាញ នឹងចុះធ្វើការស៊ើបអង្កេត នៅថ្ងៃព្រហស្បតិ៍នេះជាមួយនឹងអង្គការ អាដហុក និងប្រជាសហគមន៍ ចំពោះករណីដែលថា មានជនជាតិ វៀតណាម បានលួចឆ្លងដែនចូលមកបោះជំរំ កាប់ឈើក្នុងព្រៃស្រោងក្នុងស្រុក អូរយ៉ាដាវ ចាប់តាំងពីដើមខែ កក្កដាមក។
លោក ឆាយ ធី មន្ត្រីស៊ើបអង្កេត អង្គការសិទ្ធិមនុស្ស អាដហុក បានឲ្យដឹងថា បន្ទាប់ពីប្រជាសហគមន៍ បានរាយការណ៍ និងបានឃើញព័ត៌មានចុះផ្សាយពីករណីជនជាតិ វៀតណាមនៅតែបន្តឆ្លងដែន មកកាប់ឈើក្នុងស្រុក អូរយ៉ាដាវនោះមកមន្ត្រីអាជ្ញាធរកាលពីម្សិលមិញបានទាក់ទងទៅសុំឲ្យប្រជាសហគមន៍ ជូនពួកគាត់ ចុះទៅកន្លែងដែលគេរាយការណ៍ថា ជនជាតិវៀតណាមកាប់ឈើនោះ។
លោក ឆាយ ធី បន្ថែមថា៖ «នៅថ្ងៃនេះ យើងនឹងស៊ើបអង្កេតរួមគ្នា នៅចំណុចព្រំប្រទល់រវាងភូមិ តេន ក្នុងឃុំ យ៉ាទុង និងភូមិ ឡំក្នុងឃុំ ប៉ក់ញ៉ៃជាទីតាំងដែលវៀតណាម កំពុងកាប់ឈើដឹកចេញទាំងយប់»។
លោកបន្តថា ប្រជាសហគមន៍ បានរាយការណ៍មក អាដហុក ជាច្រើនដង ពីករណីកាប់ឈើនេះ ហើយពួកគាត់ ថែមទាំងបានថតរូបទុកជាភ័ស្តុតាងទៀតផង។
លោក រម៉ាស ស្វាង តំណាងសហគមន៍ព្រៃឈើនៅភូមិ ឡំ និងអ្នកភូមិ បីនាក់ផ្សេងទៀត បានចុះល្បាតព្រៃសហគមន៍ កាលពីថ្ងៃអាទិត្យ ហើយបានប្រទះឃើញជនជាតិវៀតណាម ៦ នាក់ បោះជំរំកាប់ឈើនៅក្នុងព្រៃស្រោង។
លោកថ្លែងថា៖ «យើងបានឃើញជនជាតិវៀតណាមនៅក្នុងតង់។ នៅជិតនោះមានឈើអារហើយចំនួន ៤០ កំណាត់ មានឡានដឹកឈើ និងត្រាក់ទ័របីគ្រឿង។
លោកបន្តថា ពេលបានឃើញពួកលោក ជនជាតិវៀតណាមបានចេញពីក្នុងតង់ និងបានសុំឲ្យយើងកុំឲ្យថតរូប។ លោក រម៉ាស ស្វាង បានសួរពួកគេថា៖ «ហេតុអ្វីបានជាពួកគេមកកាប់ព្រៃឈើខ្មែរនេះជាព្រៃការពាររបស់សហគមន៍។ ក្រុមសហគមន៍ក៏បានរាយការណ៍ទៅសមាគម អាដហុក អំពីករណីកាប់ឈើខុសច្បាប់នេះ។
ក្រុមហ៊ុន ៧២ ដែលមានកិច្ចសន្យារួមជាមួយនឹងក្រុមហ៊ុន ម៉ែន សារុន បានទទួលសិទ្ធិជាសម្បទានដីសេដ្ឋកិច្ច ក្នុងការឈូសឆាយព្រៃ ដើម្បីដាំដំណាំកៅស៊ូ និងត្រូវបានគេរាយការណ៍ជារឿយៗដោយមន្ត្រីនិងប្រជាពលរដ្ឋរស់នៅក្នុងតំបន់នោះថា ក្រុមហ៊ុននេះ បានកាប់ឈើខុសច្បាប់ក្នុងសហគមន៍ព្រៃការពារ។
ក្រុមហ៊ុននេះត្រូវបានតុលាការខេត្ត រតនគិរី កោះហៅសាកសួរ អំពីបញ្ហាកាប់ឈើកាលពីខែកុម្ភៈ ហើយ កាលពីខែមិថុនា ប្រជាសហគមន៍ក្នុងតំបន់នោះ បានទៅរឹបអូសកូនសោ និងអាគុយ ត្រាក់ទ័រឈូសដីរបស់ក្រុមហ៊ុន។
ទោះ យ៉ាងណា លោក សេន វឿន នាយប៉ុស្តិ៍ឃុំ យ៉ាទុង បានថ្លែងថា មិនមានករណីជនជាតិវៀតណាម លួចឆ្លងដែនចូលមកកាប់ឈើក្នុងទឹកដីខ្មែរនោះទេ។ លោកបន្តថា៖ «នៅក្នុងភូមិនេះគ្មានព្រៃទៀតទេ គឺក្រុមហ៊ុន ៧២ បានកាប់ឈូសឆាយដាំកៅស៊ូអស់តាំងពីឆ្នាំមុនមកម៉្លេះ»៕
ប្រភពពី ភ្នំពេញ ប៉ុស្តិ៍
Read more: http://www.cambodiapage.info/
0 comments:
Post a Comment