ព្រះវិហារៈ អ្នកភូមិ ៤០ នាក់រស់នៅក្នុងឃុំ យាង ស្រុក ជាំក្សាន្ត ខេត្ត ព្រះវិហារ មានការភិតភ័យនឹងការគំរាមបណ្តេញចេញពីភូមិរបស់ប្រធានភូមិ ដោយសារតែគេរកឃើញថា ពួកគាត់បោះឆ្នោតឲ្យគណបក្សសង្គ្រោះជាតិ។
អ្នកភូមិ ឈ្មោះ ពេជ្រ វណ្ណី អាយុ ៥២ឆ្នាំ និយាយថា ពួកអ្នកភូមិ ៤០ នាក់ នៅភូមិ កាំប្រាក់ ឃុំ យាង ស្រុក ជាំក្សាន្ត បានរងការបំភិតបំភ័យពីមេភូមិ កាំប្រាក់ ដោយសារតែពួកគេបោះឆ្នោតគាំទ្រគណបក្សសង្គ្រោះជាតិ ខណៈដែលពួកគាត់រស់អាស្រ័យលើផ្លូវថ្នល់និងហេដ្ឋារចនាសម្ព័ន្ធក្នុងភូមិ ជាសមិទ្ធផលរបស់គណបក្សប្រជាជនកម្ពុជា។
លោកថា អ្នកភូមិបានឮមេភូមិ កាំប្រាក់ ស្រែកតាមឧគ្ឃោសនសព្ទក្នុងវត្តថា អ្នកណាដែលរកឃើញថា បានបោះឆ្នោតឲ្យបក្សសង្គ្រោះជាតិនឹងត្រូវបណ្តេញចេញ។
លោកបន្តថា អ្នកភូមិ កាំប្រាក់ រស់នៅដោយមានការភិតភ័យតាំងពីថ្ងៃបោះឆ្នោតរួចទើបលោកបានសុំអន្តរាគមន៍ឲ្យគណបក្សសង្គ្រោះជាតិប្រចាំខេត្ត ព្រះវិហារ ជួយធានាសុវត្ថិភាព ខណៈអ្នកភូមិទាំង ៤០ នាក់សុទ្ធតែបានឮពីការគំរាមកំហែងរបស់មេភូមិរូបនោះគ្រប់គ្នា។
លោក ជា សារិទ្ឋ អាយុ ៤៥ ឆ្នាំជាអ្នកភូមិម្នាក់ដែរនិយាយថា អាជ្ញាធរហាក់ដូចជារើសអើងនិងអ្នកភូមិនៅពេលដែលពួកគេគាំទ្រ គណបក្សសង្គ្រោះជាតិ។
លោកថា៖ «ពួកគាត់ភ័យខ្លាចពីសុវត្ថិភាព ពីព្រោះតំបន់នេះនៅក្នុងព្រៃដាច់ស្រយាលពីគេ។អាជ្ញាធរហាក់ដូចជារើសអើងសូម្បីតែការងារសង្គមក្នុងភូមិ ក៏គេមិនឲ្យក្រុមអ្នកគាំទ្រគណបក្សសង្គ្រោះជាតិចូលរួមដែរ»។
លោក សាន់ ដេ ប្រធានប្រតិបត្តិគណបក្សសង្គ្រោះជាតិប្រចាំខេត្ត ព្រះវិហារបានឲ្យ ដឹងថា គណបក្សបានទទួលរបាយការណ៍ពីការគំរាមកំហែងបណ្តេញអ្នកភូមិ ៤០ នាក់ពីមេភូមិនេះហើយ លោកនឹងចាត់ការស៊ើបអង្កេតករណីនេះ។
លោកបន្តថា៖ «ខ្ញុំនឹងធ្វើការស៊ើបអង្កេតហើយនេះជាលើកទីមួយសម្រាប់អ្នកភូមិ កាំប្រាក់ ដែលរងការគំរាមបណ្តេញពីភូមិយ៉ាងដូច្នេះ»។
ប៉ុន្តែទោះជាយ៉ាងណា លោក ចាន់ ហេង ជាមេភូមិ កាំប្រាក់ បានបដិសេធថា លោកមិនបានគំរាមអ្នកភូមិនោះទេ។ តែលោកទទួលស្គាល់ថា លោកបាននិយាយតាមឧគ្ឃោសនសព្ទមែន តែនិយាយពីរឿងការអភិវឌ្ឍភូមិឃុំទេ។
លោកបន្តថា៖ «ខ្ញុំមិនបាន គំរាមអ្នកភូមិទេ ខ្ញុំគ្រាន់តែនិយាយប្រាប់អ្នកភូមិរឿងអភិវឌ្ឍន៍ក្នុងមូលដ្ឋាន តែប៉ុណ្ណោះ»។
លោក ឡោ ចាន់ អ្នកសម្របសម្រួលសមាគមសិទ្ធិមនុស្ស អាដហុក ប្រចាំខេត្ត ព្រះវិហារ បានថ្លែងដែរថា ករណីនេះប្រសិនត្រូវរកឃើញថា លោកមេភូមិបានប្រព្រឹត្តដូចអ្នកភូមិអះអាងមែននោះគឺជាករណីគំរាមកំហែងរំលោភសិទ្ធិអ្នកភូមិហើយ៕
ប្រភពពី ភ្នំពេញ ប៉ុស្តិ៍
Read more: http://www.cambodiapage.info/
0 comments:
Post a Comment