ភ្នំពេញ ៖ ចៅក្រមសាលាដំបូងរាជធានីភ្នំពេញបានសម្រេចនៅព្រឹកមិញពថ្ងៃទី៨ កក្កដា ២០១៣ នេះដាក់គុកស្ត្រីជាឃាតករ ដែលបានរៀបចំគម្រោងសម្លាប់កញ្ញាឯកផ្សាយពាណិជ្ជកម្ម នៅក្រុមហ៊ុនស្រាស្បាយ(SPY) ដាក់គុកមួយជីវិតបង្គាប់ឱ្យសង ប្រាក់ទៅគ្រួសារជនរងគ្រោះចំនួន ២ម៉ឺន៨ពាន់ដុល្លារអាមេរិក។
លោកសួស សំអាត ប្រធានក្រុមប្រឹក្សាសាលាដំបូងរាជធានីភ្នំពេញ បានសម្រេច ផ្តន្ទាទោស ស្ត្រីជនជាប់ចោទឈ្មោះស៊ុន គឹមហេង អាយុ២៣ឆ្នាំ អតីតមេការក្នុងក្រុមហ៊ុន ចិនមួយលក់គ្រឿងសង្ហារឹម និងមិត្តភក្តិរបស់កញ្ញាឯកផ្សាយពាណិជ្ជកម្មនៅក្រុមហ៊ុនស្រាស្បាយ៍(SPY) លឹម ស្រីពេជ្រ ពីបទ ឃាតកម្មគិតទុកជាមុន។
ស្ត្រីជនជាប់ចោទឈ្មោះ ស៊ុន គឹមហេង អាយុ២៣ឆ្នាំ បានត្រូវសមត្ថកិច្ចនគរបាល ព្រហ្មទណ្ឌកម្រិតធ្ងន់រាជធានីភ្នំពេញឃាត់ខ្លួនកាលពីរសៀលថ្ងៃទី២៤ ខែតុលា ឆ្នាំ២០១។
គួរំលឹកថា កាលពីថ្ងៃទី ២៣ តុលា ២០១២ ស្ដ្រីរូបនេះបានទូរស័ព្ទទាក់ទងនារីរងគ្រោះ ឈ្មោះ លឹម ស្រីពេជ្រ ដើម្បីណាត់ជួបគ្នានៅម្ដុំផ្សារសុវណ្ណា ក្នុងគោលបំណងពិភាក្សាគ្នារឿងរកស៊ី។ បន្ទាប់មកស្ត្រីរូបនេះបានល្បួងនារីរងគ្រោះ មកកាន់លំនៅឋានរបស់ខ្លួន ផ្ទះលេខ១១៤A ផ្លូវលេខ៩៥ សង្កាត់បឹងត្របែក ខណ្ឌចំការមន។
ក្នុងខណៈដែលនារីរងគ្រោះកំពុងអង្គុយមើលទូរទស្សន៍ ឈ្មោះស៊ុន គឹមហេង បានយកខ្សែនីឡុងរឹតកជាច្រើនជុំ និងយកស្កុតពណ៌លឿងរុំទាំងមុខទាំងសក់ជាច្រើនជុំទៀត រហូតធ្វើឱ្យ នារីរងគ្រោះស្លាប់បាត់បង់ជីវិត។
ក្រោយហេតុការណ៍កើតឡើងឈ្មោះស៊ុន គឹមហេង បាននាំសាកសពនារីរងគ្រោះដឹកតាមរថយន្ដហាយឡែនឌឺយកទៅទម្លាក់ចោលនៅក្នុងប្រឡាយក្បែររោងចក្រកាត់ដេរ ស្ថិតនៅភូមិល្វា ឃុំអង្គពពេល ស្រុកគងពិសី ខេត្ដកំពង់ស្ពឺ។
បន្ទាប់មកជនជាប់ចោទ បានទាក់ទងមកក្រុមគ្រួសារនារីរងគ្រោះដើម្បីជំរិតទារប្រាក់ចំនួន៥ម៉ឺនដុល្លារអាមេរិក។ ប៉ុន្ដែការចរចាមកនៅត្រឹម១ម៉ឺន៥ពាន់ដុល្លារអាមេរិកវិញ។ ក្រោយមក ក្រុមគ្រួសាររបស់នារីរងគ្រោះ បានប្រាប់ឱ្យឈ្មោះ ស៊ុន គឹមហេង ទៅបើកប្រាក់ពីធនាគារមួយស្ថិតក្នុងខណ្ឌ៧មករា ហើយសមត្ថកិច្ចបានរៀបអន្ទាក់ឃាត់ខ្លួនជនជាប់ចោទតែម្តង៕
ប្រភពពី ann
