កំពត: បុរសជាកម្មករសំណង់ និងកាន់ប័ណ្ណសម្គាល់ជាអ្នកសារព័ត៌មានម្នាក់ ត្រូវជនប្រដាប់អាវុធបាញ់សម្លាប់ ពេលកំពុងធ្វើដំណើរទៅកាន់លំនៅស្ថាន។ហេតុការណ៍នេះ កើតឡើង នារំលងអធ្រាត្រឈានចូលថ្ងៃទី៨ ខែកក្កដា ឆ្នាំ២០១៣ លើដងផ្លូវជាតិលេខ៣១ ក្នុងភូមិខ្វាវ ឃុំចំប៉ី ស្រុកអង្គរជ័យ។ គេមិនទាន់អាចសន្និដ្ឋានថា ជាករណីអ្វីនៅឡើយទេ តែជនរងគ្រោះបានបាត់បង់ម៉ូតូមួយគ្រឿង ដែលទើបតែទិញ បានរយៈពេលបីថ្ងៃប៉ុណ្ណោះ។ ម៉ូតូនោះ ជនរងគ្រោះ ទិញតាមរយៈបង់រំលោះ។
ជនរងគ្រោះ ក្នុងហេតុការណ៍នេះ ឈ្មោះ ឈ្មង ឱម អាយុ ៣៦ឆ្នាំ ទីលំនៅភូមិអង្គរជ័យក្រោម ឃុំអង្គរជ័យ ស្រុកអង្គរជ័យ ខេត្តកំពត។
ដោយស្រង់សម្តីពីប្រភពក្បែរកន្លែងកើតហេតុ នគរបាលមូលដ្ឋានបានឱ្យដឹងថា មុនពេលហេតុការណ៍កើតឡើង មានស្នូរម៉ូតូពីរគ្រឿងបើមមកពីទិសខាងជើង។ លុះដល់ចំណុចមុខខ្លោងទ្វារវត្តស្រែជា ម៉ូតូនោះបានឈប់ ហើយឮបុរសម្នាក់ស្រែកថា “ជួយផង”។ ពេលនោះ ស្រាប់តែមានស្នូរផ្ទុះអាវុធមួយគ្រាប់ រួចម៉ូតូទាំងពីរ ក៏បើកត្រឡប់ក្រោយវិញយ៉ាងរហ័សបំផុត។
ដោយមានការសង្ស័យ អ្នកជិតខាងបាននាំគ្នាទៅកាន់កន្លែងកើតហេតុ ក៏ប្រទះឃើញបុរសម្នាក់ ដេកក្នុងថ្លុកឈាមស្លាប់ ទើបប្រញាប់ប្រញាល់រាយការណ៍ដល់សមត្ថកិច្ចឱ្យបានដឹង។
នគរបាលមូលដ្ឋានបន្តថា មកដល់ព្រឹកថ្ងៃទី៨ ខែកក្កដានេះ សមត្ថកិច្ចមិនទាន់សន្និដ្ឋានថា ជាករណីអ្វីនៅឡើយទេ ដោយមន្ត្រីនគរបាល នៃស្នងការដ្ឋានខេត្ត កំពុងពិនិត្យតាមដានយ៉ាងល្អិតល្អន់បំផុត តែតាមការអះអាងរបស់មិត្តភក្តិបុរសរងគ្រោះ ក្នុងហេតុការណ៍នេះ ជនរងគ្រោះបាត់បង់ម៉ូតូមួយគ្រឿងម៉ាក Surfar ផលិតឆ្នាំ២០១៣ ដែលទើបនឹងទិញអំឡុងពេលបីថ្ងៃប៉ុណ្ណោះ ដោយការបង់រំលស់ ហើយមុនពេលគ្រោះថ្នាក់ ជនរងគ្រោះ បានផឹកស៊ីជាមួយមិត្តភក្តិ នៅអង្គតាសោម ក្បែរការដ្ឋានសំណង់៕
ប្រភពពី CEN
