ភ្នំពេញ: លោក សម រង្ស៊ី ប្រធានគណបក្សសង្គ្រោះជាតិបាននិយាយថា លោកបានសរសេរលិខិតមួយច្បាប់ ដើម្បីស្វែងរក ការលើកលែងទោស ពីព្រះមហាក្សត្រ ដើម្បីត្រួសត្រាយផ្លូវ សម្រាប់ការវិលត្រឡប់ របស់លោក មកចូលរួមការបោះឆ្នោត។
នៅក្នុងសារមួយជាភាសាអង់គ្លេសចុះថ្ងៃទី៧ខែកក្កដាដែលផ្សាយតាម Facebook របស់លោកនោះ លោក សម រង្ស៊ី មិនបានបញ្ជាក់ថាលិខិតនោះត្រូវបានផ្ញើទៅកាន់ព្រះមហាក្សត្រនៅពេលណានោះទេ។ ប៉ុន្តែលោក សម រង្ស៊ី បានិយយាថា រហូតមកទល់ពេលនេះ លិខិតនោះមិនទាន់បានទទួលលទ្ឋផលនៅឡើយទេ។
លោក សម រង្ស៊ី ក៏បានសរសេរលិខិតទៅកាន់ប្រទេសជាហត្ថលេខី ទីក្រុងប៉ារីសផងដែរ ដើម្បីស្វះស្វែងរកការគាំទ្រជាលក្ខណៈ អន្តរជាតិសម្រាប់បើកផ្លូវដល់ការវិលត្រឡប់ របស់លោកមកកាន់ប្រទេសកម្ពុជាវិញ មុនពេលការបោះឆ្នោត ដែលគ្រោងធ្វើនៅ ថ្ងៃទី២៨ ខែកក្កដា។
ខណៈដែលលោក សម រង្ស៊ីមានទោសជាប់នឹងខ្លួននោះ ការលើកលែងទោសពីព្រះមហាក្សត្រ គឺជាជម្រើសដ៏ល្អបំផុត ការវិលត្រឡប់ របស់លោក។ ប៉ុន្តែទោះបីជាយ៉ាងណាក៏ដោយចុះ តាមច្បាប់នៃប្រទេសកម្ពុជា ការលើកលែងទោស ដល់លោកនឹងមិនអាចធ្វើទៅបានឡើយ បើសិនជាគ្មានការយល់ព្រមពីសម្តេចហ៊ុនសែន។
ដូច្នេះ ការសម្របសម្រួលផ្នែកនយោបាយមួយចំបាច់ ត្រូវមានដើម្បីអាចឈានដល់ការលើកលែងទោស ពីព្រះមហាក្សត្រ ដែលនឹងព្រះរាជទាន ការលើកលែងទោស តាមសំណើ របស់នាយករដ្ឋមន្ត្រី៕
ប្រភពពី៖ cambodiapage.info
