ក្រុងប៉ោយប៉ែត ៖ មានហេតុការណ៍គ្រោះថ្នាក់ចរាចរណ៍ដ៏គួរឲ្យរន្ធត់មួយបានកើតឡើង កាលពីវេលាម៉ោង៤និង២០នាទីល្ងាច ថ្ងៃទី០៦ ខែកក្កដា ឆ្នាំ២០១៣ តាមបណ្តាលផ្លូវជាតិលេខ៥ ស្ថិតនៅភូមិបាលិលេយ្យ សង្កាត់-ក្រុងប៉ោយប៉ែតខេត្តបន្ទាយមាន នៅចំណុចមុខធនាគារអេស៊ីលីដា ដោយសារតែមានបុរសសតិមិនសូវល្អម្នាក់បានរត់សំដៅទៅចូលឡានកុងតឺន័រដឹកស៊ីម៉ងត៍ពីប្រទេសថៃ បណ្តាលឲ្យរថយន្តចាប់ហ្វ្រាំងមិនទាន់បុកស្លាប់ភ្លាមៗនៅនឹងកន្លែង។
ប្រភពព័ត៌មានពីកន្លែងកើតហេតុបានឲ្យដឹងថា បុរសរងគ្រោះ មានឈ្មោះ លី ចាន់វាសនា មានអាយុ៣៦ឆ្នាំ មានទីលំនៅក្នុងភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត។ ចំណែករថយន្តបង្កមានម៉ាកកុងតឺន័រ ពាក់ស្លាកលេខថៃ 60-1693 ក្រុងថេប អ្នកបើកបរជាជនជាតិថៃពុំទាន់ត្រូវបានស្គាល់អត្តសញ្ញាណនោះទេ។ បើតាមសំដីពីប្រជាពលរដ្ឋនៅនឹងកន្លែងកើតហេតុបានឲ្យដឹងថា ជនរងគ្រោះខាងលើនេះជាមនុស្សដែលមានសតិមិនសូវល្អនោះទេ តែងតែដើរតាមដងផ្លូវទាំងយប់ទាំងថ្ងៃ។ លុះមុនពេលកើតហេតុគេបានឃើញជនរងគ្រោះដើរពីទិសខាងជើងហើយមានឈាមនៅនិងក្បាលផងដែរ ខណៈមកដល់កន្លែងកើតហេតុជនរងគ្រោះរូបនោះ ក៏បានរត់សំដៅចូលរថយន្តកុងតឺន័រដឹកស៊ីម៉ងត៍របស់ក្រុមហ៊ុនថៃ យកមកលក់អោយក្រុមហ៊ុនខ្មែរ ផ្នែកខាងមុខរថយន្ត បណ្តាលឲ្យដួលបោកក្បាលស្លាប់នៅនឹងកន្លែងយ៉ាងអាណោចអាធ័ម។
ភ្លាមៗនោះសមត្ថកិច្ចនគរបាលចរាចរណ៍ក្រុង ក៏បានមកធ្វើការអន្តរាគមន៍វាស់វែង និងបាននាំយករថយន្តកុងតឺន័រទៅរក្សាទុកនៅអធិការដ្ឋាននគបាលក្រុងប៉ោយប៉ែត រីឯសាកសពជនរងគ្រោះត្រូវបាននគរបាលចរាចរណ៍ក្រុងយកទៅកាន់វត្តសូរិយ៉ារាម(វត្តថ្មី)ដើម្បីរងចាំបងប្អូនសាច់ញាតិយកទៅធ្វើបុណ្យតាមប្រពៃណី និងរង់ចាំធ្វើការដោះស្រាយទៅតាមនិតិវិធីច្បាប់៕ ដោយ ៖ ចិន្តា
_______________________
ប្រភពព័ត៌មានពី៖ វត្តភ្នំ
ប្រភពព័ត៌មានពី៖ វត្តភ្នំ
