បក្សប្រឆាំងបដិសេធព័ត៌មានពីការប្រកាសធ្វើមហាបាតុកម្មប្រឆាំងលទ្ធផលបោះឆ្នោត

2:22 AM

គណបក្សសង្គ្រោះជាតិ បានអះអាងថា ការគំរាមធ្វើមហាបាតុកម្ម បើសិនជារដ្ឋាភិបាលមិនទទួលស្គាល់ពីលទ្ធផលឈ្នះឆ្នោតរបស់គណបក្សសង្គ្រោះជាតិ មិនមែនជាការពិតដែលប្រកាសជាផ្លូវការឡើយ។ នេះបើតាមការបញ្ជាក់ របស់ លោក សម រង្ស៊ី និងលោក យឹម សុវណ្ណ។

សកម្មជនជាច្រើន អ្នកដែលគាំទ្រគណបក្សសង្គ្រោះជាតិ ពុះកញ្ជ្រោល កាលពីយប់ថ្ងៃចន្ទម្សិលមិញ នៅមុខស្នាក់ការគណបក្សសង្គ្រោះជាតិ ដោយសំដែងការមិនពេញចិត្តចំពោះលទ្ធផលដែលបានប្រកាសជាបឋមកន្លងមកដោយគណបក្សប្រជាជនកម្ពុជា និងគ.ជ.ប.។

នៅក្នុងខណៈនោះ លោក សម រង្ស៊ី ប្រធានគណបក្សសង្គ្រោះជាតិ បាននិយាយទៅកាន់សកម្មជនជាច្រើន នៅយប់ដដែលថា គណបក្សសង្គ្រោះជាតិជាអ្នកឈ្នះឆ្នោត ក្នុងការបោះឆ្នោតអណត្តិទី៥នេះ។ ហើយប្រសិន ជាគណបក្សកាន់អំណាចមិនទទួលស្គាល់លទ្ធផលខាងលើ លោកនឹងគម្រាមធ្វើមហាបាតុកម្មទូទាំងប្រទេសមួយ។

ចំពោះព័ត៌មានដែលអះអាងថា មានសកម្មជនជាច្រើនកំពុងតែត្រៀមខ្លួនជាស្រេច ក្នុងការធ្វើបាតុកម្មនោះ ត្រូវលោកយឹម សុវណ្ណ អ្នកនាំពាក្យរបស់គណបក្សសង្គ្រោះជាតិ អះអាងថា នេះមិនមែនជាការប្រកាសជាផ្លូវការរបស់ គណបក្សសង្គ្រោះជាតិឡើយ។

បន្លែមលើនេះដែរ លោកសម រង្ស៊ី ក៏បានបញ្ជាក់ពីជំហរយ៉ាងច្បាស់របស់គណបក្សសង្គ្រោះជាតិ ក្នុងបទសម្ភាសន៍មួយ ជាមួយវិទ្យុរបារាំងអន្តរជាតិ RFI កាលពីល្ងាចថ្ងៃចន្ទ ទី ២៩ កក្កដាថា គណកបក្សលោកមិនទាន់ឈានដល់ដំណាក់កាលចុះផ្លូវធ្វើបាតុកម្មនោះទេ គឺសំខាន់ការនិយាយគ្នារកដំណោះស្រាយ៕

ប្រភពពី វិទ្យុបារាំង

ដោយ ជា ប៊ុនធឿន

Read more: http://www.cambodiapage.info/kh/