ភ្នំពេញ ៖ មន្ត្រីនាំពាក្យសាលាក្តីខ្មែរក្រហមបានថ្លែងឲ្យដឹងនៅថ្ងៃទី៣១ ខែកក្កដា ឆ្នាំ ២០១៣ នេះថា ភាគីជាតិនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក)បាននិងកំពុងតែជួបប្រទះនូវកង្វះសាច់ប្រាក់ដ៏ធ្ងន់ធ្ងរ ហើយមន្ត្រីបុគ្គលិកជាតិចំនួនជិត២៥០នាក់ចាប់ពីអ្នកបើកបររហូតដល់ចៅក្រមមិនទទួលបានប្រាក់ខែរបស់ខ្លួនរយៈពេលជាង ២ ខែមកហើយគឺខែមិថុនា និងខែកក្កដា។ រហូតមកទល់ពេលនេះមិនទាន់មានម្ចាស់ជំនួយណាមួយសន្យាផ្តល់វិភាគទានបន្ថែមនៅឡើយទេ ខណៈកិច្ច ខិតខំប្រឹងប្រែងរកដំណោះស្រាយលើបញ្ហាកង្វះថវិកានេះចេះតែបន្ត។ លោក នេត្រ ភក្ត្រា បានបញ្ជាក់ថា នេះគឺជាការប្រឈមជាថ្មីរបស់ភាគីជាតិនៃ អ.វ.ត.កដែលគ្មានសាច់ប្រាក់ក្នុងការដំណើរការងាររបស់ខ្លួន។ លោកបានបន្តថា ភាគីជាតិបានជួបប្រទះកង្វះសាច់ប្រាក់តាំងពីចុងខែឧសភាមកម្ល៉េះ។
មន្ត្រីនាំពាក្យបានថ្លែងថា៖« បុគ្គលិកជាតិទាំងអស់បានអត់ទ្រាំចំពោះការបំពេញការងារដោយមិនទទួលបានប្រាក់ខែរយៈពេលពីរខែមកហើយ។ មន្ត្រីបុគ្គលិកទាំងអស់នឹងបន្តតស៊ូបំពេញការងារក្នុងរយៈពេល ២ សបា្តហ៍ទៀត ប្រសិនបើគ្មានដំណោះស្រាយណាមួយនោះទេ ពួកគាត់នឹងអាចសុំសម្រាកបណ្តោះអាសន្នពីការងារនៅសាលាក្តីដើម្បីស្វែងរកមុខរបបផ្សេងបណ្តោះអាសន្នដើម្បីផ្គត់ផ្គង់ជីវភាពនិងតម្រូវការប្រចាំថ្ងៃរបស់ពួកគាត់រហូតដល់មានដំណោះស្រាយលើបញ្ហាប្រាក់ខែ»។
វិបត្តិខ្វះសាច់ប្រាក់នេះបានកើតឡើងខ្លាំងខណៈដែលអង្គជំនុំជម្រះសាលាដំបូងនៃអ.វ.ត.កបានប្រកាសថាសវនាការ ធ្វើសេចក្តីសន្និដ្ឋានបិទបញ្ចប់កិច្ចពិភាក្សាដេញដោលក្នុងសំណុំ រឿង០០២/០១ នឹងចាប់ផ្តើមធ្វើនៅថ្ងៃទី ៩ ខែ តុលា ឆ្នាំ ២០១៣ វេលាម៉ោង ៩ ព្រឹក ហើយនឹងបន្តរហូតដល់ថ្ងៃទី២២ ខែតុលា ឆ្នាំ២០១៣។ ថ្ងៃសវនាការចុងក្រោយលើសំណុំរឿង០០២/០១បានប្រព្រឹត្តទៅនៅថ្ងៃទី២៣ខែកក្កដាឆ្នាំ២០១៣។ចាប់តាំងពីចាប់ផ្តើមបើកសវនាការលើអង្គសេចក្តីនៅថ្ងៃទី២១ខែវិច្ឆិកាឆ្នាំ២០១១រហូតដល់ពេលនេះអង្គជំនុំជម្រះសាលាដំបូងបានដំណើរការសវនាការចំនួន២១២ថ្ងៃ។
ប្រឈមមុខនឹងគម្រោងសុំឈប់សម្រាកបណ្តោះអាសន្នរបស់មន្ត្រីបុគ្គលិកជាតិមួយចំនួនធំដោយសារតែមិនទទួលបានប្រាក់ខែនេះលោកនេត្រភក្ត្រាបានថ្លែងថាការងារប្រចាំថ្ងៃរបស់តុលាការនឹងត្រូវធានាក្នុងកម្រិតអប្បរមាបំផុតនៅក្នុងអំឡុងពេលនោះដោយសារតែបុគ្គលិកមួយចំនួនធំនឹងត្រូវសុំឈប់សម្រាក ។ លោកបានសម្តែងការព្រួយបារម្ភថាការឈប់សម្រាករបស់មន្ត្រីបុគ្គលិកជាតិ នឹងធ្វើឲ្យប៉ះពាល់ដល់ការងារស្នូលដែលគាំទ្រដល់ដំណើរការរបស់តុលាការរួមមានផ្នែកច្បាប់ផ្នែកព័ត៌មានវិទ្យា និងជាពិសេសផ្នែកបកប្រែភាសា ដោយសារតែនៅពេលនេះអង្គជំនុំជម្រះសាលាដំបូងមានកិច្ចការជាច្រើនត្រូវធ្វើនិងមានការធ្វើសេចក្តីសម្រេច និងឯកសារជាច្រើនត្រូវបកប្រែដើម្បីឈានទៅដល់ការបើកសវនាការធ្វើសេចក្តីសន្និដ្ឋានបិទបញ្ចប់ការជំនុំជម្រះក្តីលើសំណុំរឿង០០២/០១ នា ពេលខាងមុខ។
សាលាក្តីខ្មែរក្រហម ដែលមានការចូលរួមពីភាគីជាតិ និងអន្តរជាតិអាចដំណើរការទៅបានអា ស្រ័យលើវិភាគទានស្មគ្រចិត្តពីក្រុមប្រទេសម្ចាស់ជំនួយ។ ចាប់តាំងពីឆ្នាំ២០០៦ រហូតដល់ឆ្នាំ ២០១២ តុលាការចម្រុះនេះ បានចំណាយប្រាក់ចំនួន ១៧៣,៣លានដុល្លារអាមេរិកក្នុងនោះភាគីជាតិចំណាយថវិកាអស់ ៤២,១លានដុល្លារអាមេរិក និងភាគីអន្តរជាតិចំនួន ១៣១,២លានដុល្លារអាមេរិក។ សម្រាប់ ឆ្នាំ ២០១៣ មន្ត្រីនាំពាក្យសាលាក្តីខ្មែរក្រហមបានឲ្យដឹងថា ភាគីអន្តរជាតិមានគម្រោងចំណាយ ២៦ លានដុល្លារអាមេរិក ហើយភាគីជាតិគ្រោងចំណាយចំនួន ៩,៤លានដុល្លារអាមេរិក។ លោកបានបន្តថា ក្នុងគម្រោងថវិកាឆ្នាំ ២០១៣ របស់ខ្លួន ភាគីជាតិនៃសាលាក្តីត្រូវការថវិកាប្រមាណជា ៣,៤លានដុល្លារ អាមេរិកថែមទៀតដើម្បីប្រតិបត្តិការងាររបស់ខ្លួនពីខែមិថុនា រហូតដល់ដំណាច់ឆ្នាំ ២០១៣។
មន្ត្រីនាំពាក្យសាលាក្តីខ្មែរក្រហម លោក នេត្រ ភក្ត្រា បានឲ្យដឹងថា រដ្ឋបាលភាគីជាតិនៃសាលា ក្តីបានធ្វើការកែសម្រួលរចនាសម្ព័ន្ធការងារពីរចនាសម្ព័ន្ធដែលធំមកជារចនាសម្ព័ន្ធសមល្មម ចំណាយតិច និងមានប្រសិទ្ធភាព។ លោកបន្តថា រដ្ឋបាលនៃអវតកមានកាតព្វកិច្ចក្នុងការធានាផ្តល់សេវាជា អតិបរមាបំផុតសម្រាប់តុលាការ ហើយការកែសម្រួលរចនាសម្ព័ន្ធតាមរយៈការកាត់បន្ថយមន្ត្រីបុគ្គលិក ១០% កាលពីចុងខែមិថុនាបានធ្វើឲ្យភាគីជាតិនៃសាលាក្តីអាចសន្សំសំចៃថវិកាប្រមាណ ១លានដុល្លារអាមេរិក។ ប៉ុន្តែបច្ចុប្បន្ន តុលាការជួបប្រទះកង្វះសាច់ប្រាក់ និងគ្មានការធានាពីបញ្ហាប្រាក់ខែរបស់ មន្ត្រីបុគ្គលិកជាតិដែលបម្រើការងារនៅទីនោះ ដែលជាបច្ច័យមួយនាំឲ្យមានការប៉ះពាល់ដល់ដំណើរ ការតុលាការ។
លោកបន្តថា ដោយសារតែកង្វះមន្ត្រីបុគ្គលិកនាពេលខាងមុខ បើសិនជាគ្មានដំណោះ ស្រាយទេ នោះវាអាចនឹងធ្វើឲ្យគម្រោងការនានារបស់អង្គជំនុំជម្រះសាលាដំបូងក្នុងការធ្វើសេចក្តី សន្និដ្ឋានបិទបញ្ចប់សំណុំរឿង ០០២/០១ នៅខែតុលា និងការប៉ុនប៉ងក្នុងការប្រកាសសាលក្រមលើ សំណុំរឿងនេះនៅចុងត្រីមាសទី១ ឆ្នាំ ២០១៣ អាចនឹងត្រូវពន្យារពេល។
ជាថ្មីម្តងទៀត មន្ត្រីនាំពាក្យសាលាក្តីខ្មែរក្រហមបានអំពាវនាវដល់ក្រុមប្រទេសជំនួយទាំងឡាយ បន្តផ្តល់ការគាំទ្រថវិកាជូនដល់សាលាក្តីខ្មែរក្រហមដើម្បីមានថវិកាគ្រប់គ្រាន់អាចដំណើរការងាររបស់ខ្លួនឲ្យចប់ចុងចប់ដើម ៕
ប្រភពពីនគរវត្ត
Read more: http://www.cambodiapage.info/kh
0 comments:
Post a Comment