ក្រសួងមហាផ្ទៃនឹងចាត់វិធានការការពារសន្តិសុខជូនលោក សម រង្ស៊ី នៅពេលដែលលោកវិលត្រឡប់មកវិញ នៅថ្ងៃសុក្រទី១៩កក្កដានេះ។ ចំណាត់ការការពារសន្តិសុខជូនមេដឹកនាំបក្សប្រឆាំងបានធ្វើឡើងពីព្រោះមានការព្រួយបារម្ភអំពីការបង្កហេតុណាមួយដែលអាចកើតឡើងក្នុងពេលវិលត្រឡប់របស់លោក សម រង្ស៊ី ។ នេះបើយោងតាមការពន្យល់របស់អ្នកនាំពាក្យក្រសួងមហាផ្ទៃ។
គណបក្សសង្គ្រោះជាតិស្នើឱ្យមានការរឹតបន្តឹងសន្តិសុខ ចំពោះវត្តមាននៃការវិលត្រឡប់របស់ប្រធានគណបក្សសង្គ្រោះជាតិ លោក សម រង្ស៊ី នៅថ្ងៃសុក្រ ទី១៩ កក្កដាខានស្អែកនេះ។ លោក យឹម សុវណ្ណអ្នកនាំពាក្យគណបក្សសង្គ្រោះជាតិ បានប្រាប់វិទ្យុបារាំងអន្តរជាតិRFI នៅល្ងាចថ្ងៃពុធនេះថា គណបក្សស្នើឱ្យមានការការពារសុវត្ថិភាពផ្ទាល់ខ្លួនដល់លោក សម រង្ស៊ី ក៏ដូចជាសាធារណជន និងសកម្មជនគណបក្ស ដែលគ្រោងចូលរួមអបអរការវិលត្រឡប់របស់លោកសម រង្ស៊ី។
ក្នុងដំណើរវិលត្រឡប់របស់លោក សម រង្ស៊ី នោះដែរ លោកយឹមសុវណ្ណបញ្ជាក់ថា លោកកឹម សុខា អនុប្រធានគណបក្សសង្គ្រោះជាតិ លោក ប៉ុល ហម រួមទាំងលោកអេងឆៃអ៊ាង នឹងអមដំណើរលោក សម រង្ស៊ីពីទីក្រុងបាងកក មកកាន់ព្រលានយន្តហោះអន្តរជាតិភ្នំពេញ។ ព្រលានយន្តហោះអន្តរជាតិភ្នំពេញ ដែលនឹងមានមនុស្សចំនួន២ម៉ឺននាក់ នឹងឈរចាំទទួលលោកលោក សម រង្ស៊ី។ រីឯមនុស្សចំនួន២ម៉ឺននាក់ផ្សេងទៀត នឹងរង់ចាំអបអរសាទរនៅទីលានប្រជាធិបតេយ្យ ក្បែរវត្តភ្នំ។ នេះបើតាមការអះអាងរបស់លោក យឹម សុវណ្ណ។
ទាក់ទិននឹងចំពោះសន្តិសុខរបស់លោក សម រង្ស៊ីនេះដែរ លោក ខៀវ សុភ័គ អ្នកនាំពាក្យក្រសួងមហាផ្ទៃបានឱ្យដឹងថា ក្រសួងមហាផ្ទៃបានប្រជុំសម្រេចដាក់ពង្រាយកម្លាំងការពារសុវត្ថិភាពចំពោះការវិលត្រឡប់របស់លោក សម រង្ស៊ី រួចរាល់អស់ហើយ។
គួររំលឹកថាផងដែរថា លោក សម រង្ស៊ី គ្រោងនឹងវិលត្រឡប់មកកាន់ប្រទេសកម្ពុជាវិញ នៅថ្ងៃសុក្រទី១៩ កក្កដា បន្ទាប់ពីព្រះមហាក្សត្រសម្តេចព្រះបរមនាថនរោត្តម សីហមុនី បានប្រោសប្រទានលើកលែងទោស ក្នុងសំណុំរឿងដកតម្រុយបង្គោលព្រំដែន កម្ពុជា វៀតណាម និងក្លែងបន្លំឯកសារជាសារធារណៈ កាលពីថ្ងៃទី១២ កក្កដាកន្លងទៅ។
ចំពោះសន្តិសុខរបស់ប្រធានគណបក្សសង្គ្រោះជាតិ លោក សម រង្ស៊ី ត្រូវបានលោក ខៀវ សុភ័គ អះអាងថា សន្តិសុខសុវត្ថិភាពរបស់លោក សម រង្ស៊ី គឺជាជោគជ័យរបស់រដ្ឋាភិបាលកម្ពុជា៕
ប្រភពពី RFI
