ទាក់ទងការរិតត្បិតប្រព័ន្ធផ្សព្វផ្សាយមិនឲ្យផ្សាយ ទាក់ទងទៅ ការបោះឆ្នោត និងលទ្ធផលឆ្នោត កាលពីល្ងាចថ្ងៃទី ១៧ កក្កដា ម្សិលមិញ គណៈកម្មាធិការជាតិរៀបចំការបោះឆ្នោត (គ.ជ.ប ) បានចេញមុខមកអះអាងថា ខ្លួនមិនដែលធ្វើការហាមប្រាមប្រព័ន្ធផ្សព្វផ្សាយទេ ។
គ.ជ.ប បានលើកឡើងនៅក្នុងសេចក្ដីបំភ្លឺមួយរបស់ខ្លួនថា កន្លងមកមានមតិសាធារណជន មួយចំនួនបានច្រឡំថា ការផ្អាកវិទ្យុមិនឲ្យផ្សាយបន្ត ក្នុងអំឡុងពេលការបោះឆ្នោត ដោយសារ គ.ជ.ប ហើយម្យ៉ាងទៀត ក៏យល់ច្រឡំថា គ.ជ.ប មិនឲ្យប្រព័ន្ធផ្សព្វផ្សាយព័ត៌មាន ផ្សព្វផ្សាយព័ត៌មាន ពាក់ព័ន្ធទាកទងទៅនឹងការបោះឆ្នោត និងលទ្ធផលបោះឆ្នោត ក្នុងរយៈពេល៥ថ្ងៃ មុនការបោះឆ្នោត និងថ្ងៃបោះ ឆ្នោត។
ពាក់ព័ន្ធការច្រឡំនេះ គ.ជ.ប មិនបានឲ្យផ្អាកនោះទេ ផ្ទុយទៅវិញ គ.ជ.ប បានចេញគោលការណ៍ សម្រាប់ប្រព័ន្ធផ្សព្វផ្សាយ ព័ត៌មាន ក្នុងគោលបំណងធ្វើយ៉ាងណា ឲ្យការបោះឆ្នោតប្រព្រឹត្តទៅសេរី ត្រឹមត្រូវ និងយុត្តិធម៌ ។ ក្នុងនោះគ.ជ.ប បានជំរុញ ឲ្យប្រព័ន្ធផ្សព្វផ្សាយទាំងអស់ ត្រូវតែផ្តល់ព័ត៌មាន និងការអប់រំ ពីការបោះឆ្នោត ដែលងាយយល់ និងមានអព្យាក្រឹត្យ ក្នុង ការផ្សព្វផ្សាយព័ត៌មាន ពាក់ព័ន្ធទៅនឹងការបោះឆ្នោត។
សម្រាប់ការបោះឆ្នោតនេះ ម្ចាស់ប្រព័ន្ធផ្សព្វផ្សាយ និងអ្នកគ្រប់គ្រងទាំងអស់ ត្រូវតែខិតខំប្រឹងប្រែង ឲ្យអស់លទ្ធភាព ចូលរួម ធ្វើឲ្យការបោះឆ្នោត មានលក្ខណៈសេរី ត្រឹមត្រូវ និងយុត្តិធម៌ តាមរយៈការផ្តល់ព័ត៌មាន អំពីការបោះឆ្នោត ។ ចំពោះការ ហាម ផ្សព្វផ្សាយ រយៈពេល៥ថ្ងៃ ដែលមានចែងក្នុងបទបញ្ជា និងនីតិវិធី សម្រាប់ការបោះឆ្នោត ជំពូក៧ ចំណុច៧.២.៥ គឺសំដៅតែ លើការហាមធ្វើ និងហាមផ្សព្វផ្សាយលទ្ធផល នៃការស្ទង់មតិ ទាក់ទងនឹងដំណើរការតែប៉ុណ្ណោះ។ ចំណែកការផ្សព្វផ្សាយ លទ្ធផលនៃការបោះឆ្នោត ប្រព័ន្ធផ្សព្វផ្សាយព័ត៌មានទាំងអស់ មានសិទ្ធិធ្វើការផ្សព្វផ្សាយ លទ្ធផលដែលខ្លួនទទួលបាន។
គួរបញ្ជាក់ថា សេចក្ដីបំភ្លឺនេះបានធ្វើឡើងគ្រាដែលកន្លងទៅក្រសួងព័ត៌មានបានចេញសេចក្ដីប្រកាសមិនឲ្យប្រព័ន្ធផ្សព្វផ្សាយ ផ្សាយពីទិន្នន័យ នៃការវិភាគសម្លេងឆ្នោត ក៏ដូចជាលទ្ធផលឆ្នោត ហើយជាពិសេសនោះគឺការផ្អាកមិនឲ្យវិទ្យុក្នុងស្រុក ជួលម៉ោងឲ្យវិទ្យបរទេសផ្សាយបន្ត ។ ប៉ុន្តែបើទោះជាដូច្នេះក្ដី បញ្ហាត្រូវបានដោះស្រាយបញ្ចប់រួចរាល់អស់ហើយ ៕
ប្រភពពី Free Press Magazine
