ខេត្តកំពង់ចាម ៖ ស្ត្រីម្នាក់ត្រូវបានរងរបួសយ៉ាងធ្ងន់ធ្ងរហូរឈាមស្រោចពេញខ្លួនប្រាណ ដោយសារតែត្រូវប្តីកំណាចចិត្តសាហាវឃោរឃៅ ដែលញៀននឹងអំពើហិង្សា បានយកកាំបិទប៉័ងតោកាប់ស្ត្រីរងគ្រោះចំនួន៥កាំបិត កាលពីវេលា ម៉ោង២រសៀល ថ្ងៃទី១៣ ខែកក្កដា ឆ្នាំ២០១៣ ស្ថិតនៅភូមិអូរប្រាំទី២ ឃុំព្រែកកក់ ស្រុកស្ទឹងត្រង់
ប្រភពព័ត៌មានពីកន្លែងកើតហេតុបានឱ្យដឹងថា ស្ត្រីរងគ្រោះមានឈ្មោះ ហួត សុភា អាយុ៣៣ឆ្នាំ ចំណែកឯប្តីជាជនដៃដល់មានឈ្មោះ អ៊ុក យឿន អាយុ៤២ឆ្នាំ ពួកគេទាំង២នាក់ទើបបានរួមរស់ជាមួយគ្នាបានរយៈពេល៦ខែប៉ុណ្ណោះ និងមានទីលំនៅត្រង់ចំណុចកើតហេតុខាងលើ។
ប្រភពដដែលបានបន្តឲ្យដឹងទៀតថា នៅមុនពេលកើតហេតុប្តីចិត្តកំណាចនោះ បានមកសុំលុយប្រពន្ធដើម្បីទិញកាតទូរស័ព្ទចំនួន១ដុល្លារ ប៉ុន្តែគាត់បានឱ្យលុយរហូតដល់ទៅ៥.០០០រៀល ។ ក្រោយពីប្តីមកពីទិញកាតទូរស័ព្ទវិញ ឃើញប្រពន្ធកំពុងតែបីកូនតូចរបស់អ្នកភូមិម្នាក់ អាយុជាង១ខួបដែលមានផ្ទះនៅទល់មុខគ្នា ក៏ត្រូវបានប្តីដើរមកដល់រករឿងស្តីបន្ទោសគំហកដាក់ឱ្យនាងជាប្រពន្ធទាំងសម្តីធំថា ស្អែកទៅណា ? រំពេចនោះគាត់ក៏បានឆ្លើយតបវិញថា ទៅលក់ពោតដែលកាច់មកពីចម្ការ ។
ខណៈនោះប្តីចិត្តកំណាចនោះ បានជេរស្តីនាងថា ស្រឡាញ់ក្មេងនោះជាងខ្លួនជាប្តី បន្ទាប់មកប្តីបានមកចាប់គាត់ក្រៀកជាប់ ហើយក៏យកកាំបិតបុ័ងតោមកកាប់គាត់ជាប្រពន្ធត្រូវចំនួន៥កន្លែង ត្រូវក្បាល៣កាំបិត ស្មាស្តាំ១កាំបិត និងក.១កាំបិត បណ្តាលឱ្យឈាមហូរស្រោចពេញខ្លួនប្រាណ។ ក្រោយពេលបង្កហេតុ ប្តីចិត្តអប្រិយនេះក៏បានរត់គេចខ្លួនបាត់ស្រមោល។ ចំណែកឯស្ត្រីរងគ្រោះត្រូវបានសាច់ញាតិទំនាក់ទំនងហៅរថយន្តមកសង្គ្រោះបន្ទាន់ ដឹកយកទៅធ្វើការសង្គ្រោះបន្ទាន់នៅមន្ទីរពេទ្យបង្អែកខេត្ត ។
បើតាមការបង្ហើបពីអ្នកជិតខាងបានឲ្យដឹងថា បុរសកំណាចខាងលើនេះធ្លាប់ប្រើអំពើហិង្សាវាយប្រពន្ធទី១ ខណៈពេលមានផ្ទៃពោះ៦ខែរហូតដល់សន្លប់ ឯប្រពន្ធទី២ ពេលឆ្លងទន្លេបាន៣ខែត្រូវបានប្តីវាយទម្លាក់ពីលើផ្ទះ។ បច្ចុប្បន្នសមត្ថកិច្ចកំពុងធ្វើការស្រាវជ្រាវតាមចាប់ជនដៃដល់ ដើម្បីយកមកផ្តន្ទាទោសទៅតាមផ្លូវច្បាប់៕
ប្រភពពី វត្តភ្នំ
