សកម្មជនអ្នកគាំទ្រហែក្បួនឃោសនារបស់គណបក្សសង្គ្រោះជាតិ បានទទួលរងនូវការភ្ញាក់ផ្អើល និងភិតភ័យ ជាអតិបរមា កាលពីវេលាម៉ោងប្រមាណ១៩និង៥៥នាទីយប់ នាថ្ងៃទី០៥ខែកក្កដាឆ្នាំ២០១៣នេះ នៅចំណុចសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ដោយសារមានការផ្ទុះអាវុធចំនួនជិត១០គ្រាប់ បង្កដោយជនមិនស្គាល់អត្ដសញ្ញាណ។
សមាជិក សមាជិកាគណបក្សសង្គ្រោះជាតិដែលបានចូលរួមហែក្បួនឃោសនានោះ បានសម្ដែងនូវការខកចិត្ដ និងសោកស្ដាយ ព្រមទាំងបញ្ចេញនូវប្រតិកម្មថ្កោលទោសទៅលើជនបង្កឱ្យមានការផ្ទុះអាវុធរំខានដល់ការហែក្បួនរបស់គណបក្ស ។
ដោយមានការអន្ដរាគមន៍ពីសមត្ថកិច្ចជាបន្ទាន់ដល់កន្លែងកើតហេតុ ជនបង្កចំនួន៣នាក់ត្រូវបានកងកម្លាំងអាវុធហត្ថរាជធានីភ្នំពេញធ្វើការឃាត់ខ្លួនយកមកសាកសួរ ទើបដឹងថា ក្នុងចំណោមជនបង្កចំនួន៣នាក់នោះមាន២នាក់ជាមន្ដ្រីអាវុធហត្ថ គឺឈ្មោះ ឃី គឹមលន់ ជាមន្ដ្រីអាវុធហត្ថលើផ្ទៃប្រទេស និងឈ្មោះ អ៊ុង ចាន់ថន ជាមន្ដ្រីអាវុធខេត្ដកណ្ដាល ។
ឆ្លងកាត់តាមព្រឹត្ដិការណ៍នៃការផ្ទុះអាវុធធ្វើឱ្យភ្ញាល់ផ្អើលនេះ បានក្លាយជាសារមួយប្រាប់ទៅសកម្មជនគណបក្សប្រឆាំងឱ្យធ្វើការប្រុងប្រយ័ត្នខ្ពស់ក្នុងការធ្វើសកម្មភាពហែក្បួនឃោសនានៅតាមទីសាធារណៈ ដូចជា តាមដងផ្លូវ និងតាមទីផ្សារ…ពីព្រោះគណបក្សរបស់ខ្លួនគ្មានអាវុធទេ រីឯអ្នកគាំទ្រឬសកម្មជនរបស់គណបក្សកាន់អំណាចវិញអាចនឹងមានអាវុធនៅគ្រប់ពេលវេលា ប្រសិនបើពួកគេចង់បញ្ចេញកំហឹង ៕
ប្រភពពី ដើមត្នោត
