ទីបំផុតទៅបណ្តឹងរបស់លោក សួង សុភ័ណ្ឌ ប្រធានចលនាយុវជនគណបក្សសង្រ្គោះជាតិ ដែលប្តឹងសម្តេចនាយករដ្ឋមន្រ្តី ហ៊ុន សែន ពីបទក្លែងបន្លំឯកសារសាធារណៈ មិនត្រូវបានសាលាដំបូងរាជធានីភ្នំពេញចាត់ការនោះឡើយ។
តាមលិខិតជូនដំណឹងមួយរបស់លោកស្រី ស៊ី វណ្ណនី តំណាងអយ្យការសាលាដំបូងរាជធានីភ្នំពេញចុះថ្ងៃទី០៤ ខែកក្កដា ឆ្នាំ២០១៣បានបញ្ជាក់ថា បណ្តឹងរបស់លោក សួង សុភ័ណ្ឌ ភេទប្រុស អាយុ២៦ឆ្នាំ ដែលប្តឹងសម្តេចនាយករដ្ឋមន្រ្តី ហ៊ុន សែន ពីបទផ្តើមគំនិតក្លែងបន្លំឯកសារសាធារណៈ សាលាដំបូងរាជធានីភ្នំពេញសម្រេចតម្កល់រឿងទុកឥតចាត់ការ។
គួររំលឹកថា កាលពីចុងខែមិថុនា លោក សួង សុភ័ណ្ឌ ប្រធានចលនាយុវជនរបស់គណបក្សសង្រ្គោះជាតិ បានដាក់ពាក្យបណ្តឹងមួយទៅកាន់សាលាដំបូងរាជធានីភ្នំពេញ ដោយប្តឹងសម្តេចនាយករដ្ឋមន្រ្តី ហ៊ុន សែន ពីបទក្លែងបន្លំឯកសារសាធារណៈ និងជាអ្នកផ្តើមគំនិតរួមដៃជាមួយបក្ខពួកបណ្តោយឲ្យជនជាតិវៀតណាមចូលមកកម្ពុជាដោយខុសច្បាប់។ លោក សួង សុភ័ណ្ឌ បានអះអាងថា លោកមានភស្តុតាងគ្រប់គ្រាន់សម្រាប់ដាក់បន្ទុកចំពោះបណ្តឹងនេះ នោះគឺសំឡេងរបស់សម្តេចនាយករដ្ឋមន្រ្តីកាលពីឆ្នាំ១៩៩០ និងជនជាតិវៀតណាម១០នាក់ ដែលត្រូវបានគេអនុញ្ញាតធ្វើអត្តសញ្ញាណប័ណ្ណសញ្ជាតិខ្មែរឲ្យ៕
ប្រភពពី៖ cambodiapage.info
