គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប. បច្ចុប្បន្នកំពុងតែធ្វើការយ៉ាងសកម្ម ដើម្បីជួយសម្រួលដល់ការបោះឆ្នោតជ្រើសតាំងតំណាងរាស្ត្រនីតិកាលទី៥ ដែលកំពុងតែខិតចូលមកនេះ ឲ្យប្រព្រឹត្តទៅដោយរលូននិងមានតម្លាភាព។ មានចំណុចធំៗចំនួន៤ដែលត្រូវបាន គជ.ប. កែលម្អ។ ចំណុចទាំង៤ដែលកែលម្អនេះ ត្រូវបាន គជ.ប. អះអាងថា នឹងជួយសម្រួលដល់ដំណើរការបោះឆ្នោតឲ្យកាន់តែងាយស្រួល ត្រឹមត្រូវ និងល្អប្រសើរ។
ខណៈពេលដែលការបោះឆ្នោតជ្រើសតាំងតំណាងរាស្ត្រនីតិកាលទី៥ ឆ្នាំ២០១៣ កាន់តែខិតជិតចូលមកដល់ គណៈកម្មាធិការជាតិរៀបចំការបោះឆ្នោត ហៅកាត់ថា គជ.ប. បានអះអាងថា ខ្លួនបាននិងកំពុងតែប្រឹងប្រែងកែលម្អ ដំណើរការបោះឆ្នោត ឲ្យប្រព្រឹត្តទៅដោយរលូន និងមានតម្លាភាព។
លោកទេព នីថា អគ្គលេខាធិការ គណៈកម្មាធិការជាតិរៀបចំការបោះឆ្នោត ឲ្យដឹងថា គជ.ប. បានផ្លាស់ប្ដូរនីតិវិធីនៃការបូកសរុបលទ្ធផលនៃការបោះឆ្នោតនៅឃុំ-សង្កាត់។ លោកឲ្យដឹងថា សម្រាប់ការបោះឆ្នោតមុនៗ ការបូកលទ្ធផលនៃការបោះឆ្នោតធ្វើឡើងនៅការិយាល័យបោះឆ្នោត ក្រោយមកត្រូវបញ្ជូនសន្លឹកឆ្នោតទៅគណកម្មការឃុំ-សង្កាត់រៀបចំការបោះឆ្នោត ហើយគណកម្មការឃុំ-សង្កាត់រៀបចំការបោះឆ្នោត នឹងបញ្ជូនផ្ទាល់ទៅគណកម្មការខេត្តរៀបចំការបោះឆ្នោតតែម្ដង។ ដែលជាហេតុធ្វើឲ្យ ថ្នាក់ឃុំ-សង្កាត់នេះ មិនបានត្រួតពិនិត្យ បូកសរុបលទ្ធផលនោះទេ។ សម្រាប់ការបោះឆ្នោតលើកនេះគជ.ប. សម្រេចប្រគល់ភារកិច្ចបូកសរុបលទ្ធផលនៃការបោះឆ្នោតឲ្យទៅគណកម្មការឃុំ-សង្កាត់រៀបចំការបោះឆ្នោត។ លោកទេព នីថា បញ្ជាក់ថា នីតិវិធីថ្មីនេះ នឹងជួយឲ្យការងារបូកសរុបលទ្ធផលការបោះឆ្នោតធ្វើទៅបានលឿន មានប្រសិទ្ធិភាព និងតម្លាភាព។
ការកែលម្អទី២ធ្វើលើការផ្សព្វផ្សាយបញ្ជីឈ្មោះអ្នកបោះឆ្នោត ដោយគជ.ប. បានផ្ញើបញ្ជីឈ្មោះអ្នកបោះឆ្នោតទៅក្រុមប្រឹក្សាឃុំ-សង្កាត់ តាំងពីខែមករា ឆ្នាំ២០១៣ ដើម្បីឲ្យផ្ដល់ឱកាសដល់ប្រជាពលរដ្ឋពិនិត្យមើលឈ្មោះរបស់ពួកគាត់ ដែលតំកល់ទុកនៅសាលាឃុំ។ បញ្ជីបោះឆ្នោតមួយច្បាប់ទៀត ទើបតែបានបិទផ្សាយនៅគណកម្មការឃុំ-សង្កាត់រៀបចំការបោះឆ្នោត កាលពីខែមិថុនាកន្លងទៅ។ លោកទេព នីថា បញ្ជាក់ថា នេះជាការកែលម្អថ្មី ព្រោះពីមុន បញ្ជីឈ្មោះអ្នកបោះឆ្នោត ត្រូវបានផ្សព្វផ្សាយតែមួយថ្ងៃមុនការបោះឆ្នោតតែប៉ុណ្ណោះ។
ចំណុចមួយទៀត ពាក់ព័ន្ធនឹងការងារនៅការិយាល័យបោះឆ្នោត គជ.ប.បានសម្រេចឲ្យជំនួយការទី២ ឲ្យផ្ដល់សេវាទាំងការរកឈ្មោះ ទាំងការណែនាំអ្នកបោះឆ្នោតអំពីឯកសារប្រើប្រាស់ពេលបោះឆ្នោត។ ដោយឡែកនៅក្នុងការិយាល័យបោះឆ្នោត គជ.ប.អនុញ្ញាតឲ្យតំណាងគណបក្សនយោបាយ និងអ្នកសង្កេតការណ៍បោះឆ្នោត ឈរនៅពីក្រោយលេខាធិការ និងស្មៀន ដើម្បីសង្កេតពីការផ្ទៀងផ្ទាត់ឈ្មោះក្នុងបញ្ជីឈ្មោះបោះឆ្នោត និងឯកសារបញ្ជាក់អត្តសញ្ញាណមុននឹងអនុញ្ញាតឲ្យប្រជាពលរដ្ឋចូលទៅបោះឆ្នោត។
អគ្គលេខាធិការ គណៈកម្មាធិការជាតិរៀបចំការបោះឆ្នោតរូបនេះ បានបញ្ជាក់បន្ថែមថា ការកែលម្អដែលលោកលើកឡើងទាំងប៉ុន្មានខាងលើ គជ.ប.បានរៀបចំវគ្គបណ្ដុះបណ្ដាលស្ដីពីការបោះឆ្នោត ការរាប់សន្លឹកឆ្នោត និងការបូកសរុបលទ្ធផលនៃការបោះឆ្នោត ដល់មន្ដ្រីរៀបចំការបោះឆ្នោត ដោយមានការចូលរួមពីអង្គការមិនមែនរដ្ឋាភិបាល ព្រមទាំងគណបក្សនយោបាយដែលនឹងចូលរួមប្រកួតប្រជែងក្នុងការបោះឆ្នោតនីតិកាលទី៥ ឆ្នាំ២០១៣ ខាងមុខផងដែរ៕
ប្រភពពី RFI
