ក្រុមអ្នកភូមិបឹងកក់បានចេញមុខតវ៉ាជាថ្មីទៀតហើយនៅថ្ងៃចន្ទនេះ។ ពួកគេបាននាំគ្នាជួបជុំតវ៉ានៅមុខសាលារាជធានីភ្នំពេញដើម្បីទាមទារឲ្យអភិបាលក្រុងថ្មីជួយដោះស្រាយបញ្ហារបស់ពួកគេតាមការសន្យា។ ក្រុមអ្នកភូមិបានប៉ះទង្គិចជាមួយប៉ូលសិនៅពេលដែលពួកគេបិទផ្លូវនៅមុខសាលារាជធានី។
អ្នកភូមិបឹងកក់ បានប្រមូលផ្តុំតវ៉ាជាថ្មី នៅមុខសាលារាជធានីភ្នំពេញនៅថ្ងៃចន្ទដើម្បីទាមទារឲ្យសាលារាជធានីភ្នំពេញរកដំណោះស្រាយជម្លោះដីធ្លី នៅបឹងកក់ ដែលអភិបាលរាជធានីភ្នំពេញ ប៉ា សុជាតិវង្ស បានសន្យា កាលពីខែឧសភា។ ក្រុមអ្នកភូមិបាននាំគ្នាបិទផ្លូវនៅមុខសាលារាជធានីរហូតដល់សមត្ថកិច្ចបំបែកដោយរុញច្រានពួកគេឲ្យចេញពីផ្លូវដើម្បីកុំឲ្យស្ទះចរាចរណ៍។ ការប៉ះទង្គិចគ្នាក៏បានកើតឡើងនៅពេលដែលសមត្ថកិច្ចប៉ូលិសបានរុញច្រានពួកអ្នកភូមិឲ្យចេញពីផ្លូវ ប៉ុន្តែ ក្រុមអ្នកភូមិមិនព្រមចេញ។
យ៉ាងណាក៏ដោយ ចរាចរណ៍លើកំណាត់ផ្លូវព្រះមុនីវង្សត្រូវបានបើកឡើងវិញទោះបីជាអ្នកភូមិមួយក្រុមនៅបន្តអង្គុយចំពាក់កណ្តាលផ្លូវក៏ដោយ។ សមត្ថកិច្ចប៉ូលិស មិនបានប្រើឡានទឹក ឬប្រើកម្លាំងបង្ក្រាបខ្លាំងក្លាដូចកាលពីមុនទេ ដោយគ្រាន់តែរុញច្រាន និងជួយសម្រួលចរាចរណ៍កុំឲ្យកកស្ទះក្រោមសម្រែកទាមទារ និងរិះគន់ពីក្រុមស្ត្រីអ្នកភូមិបឹងកក់។
គួររំលឹកផងដែរថា ដើម្បីដោះស្រាយបញ្ហាជម្លោះដីធ្លីបឹងកក់នេះ លោកនាយរករដ្ឋមន្ត្រី ហ៊ុន សែន បានចុះហត្ថលេខាផ្តល់ដីទំហំចំនួនជាង១២ហិកតានៅបឹងកក់ដើម្បីអភិវឌ្ឍន៍នៅនឹងកន្លែង។ អ្នកស្រីសុង ស្រីលាភ និយាយថា បាតុកម្មតវ៉ានេះគ្មានការឆ្លើយតបពីមន្ត្រីសាលាក្រុងភ្នំពេញឡើយ។អ្នកស្រី ស៊ុង ស្រីលាភ អ្នកតំណាងអ្នកភូមិបឹងកក់បានប្រាប់ឱ្យដឹងថាការជួបជុំដើម្បីទាមទារឱ្យអភិបាលក្រុងថ្មីផ្តល់ដំណោះស្រាយផ្តល់ប្លង់កម្មសិទ្ធដីធ្លីដល់ពួកគាត់។ កម្មសិទ្ធដីធ្លីដែលអភិបាលក្រុងថ្មីលោក ប៉ាសុជាតិវង្ស បានសន្យាផ្តល់ដំណោះស្រាយកាលពីពេលលោកត្រូវបានតែងតាំងជាភិបាលក្រុងថ្មី។
ទាក់ទិននឹងបញ្ហានេះដែរ មន្ត្រីសាលាក្រុងបានបដិសេធមិនធ្វើអត្ថាធិប្បាយបំភ្លឺបន្ថែមលើបញ្ហានេះទេ។ តែទោះជាយ៉ាងណាសាលាក្រុងភ្នំពេញ ធ្លាប់បានចុះស្រង់ស្ថិតិដើម្បីផ្ទៀងផ្ទាត់ស្ថិតិសាលាកបត្រអ្នកភូមិបឹងហើយ៕
ប្រភពពី RFI
