មិនមែនមានតែនៅក្នុងបណ្ដាញព័ត៌មានសង្គមហ្វេសប៊ុក(Facebook) ទេ ដែលអ្នកលេងហ្វេសប៊ុកបង្កើតនូវពាក្យសាមញ្ញនិងពេញនិយម របៀបជាសំណួរថា“ដូរឬមិនដូរ?”នោះ គឺសូម្បីនៅក្រៅហ្វេសប៊ុក ជាពិសេសនៅពេលហែក្បួនឃោសនារកសំឡេងឆ្នោតគាំទ្ររបស់គណបក្សសង្គ្រោះជាតិដែលជាគណបក្សនយោបាយប្រឆាំងដ៏ធំតែមួយគត់នៅកម្ពុជា សម្រាប់ ការបោះឆ្នោតជ្រើសតាំងតំណាងរាស្ដ្រនីតិកាលទី៥នេះ ក៏ពាក្យសាមញ្ញ“ដូរឬមិនដូរ?”ក្លាយទៅជាពាក្យពេញនិយមរបស់អ្នកគាំទ្រគណបក្សនយោបាយប្រឆាំង ដោយពួកគេឆ្លើយតបភ្លាមៗថា “ត្រូវតែដូរ” ។
ផ្ទុយទៅវិញ ជាមួយនឹងពាក្យសាមញ្ញរបៀបជាសំណួរ“ដូរឬមិនដូរ?”នេះ ត្រូវបានអ្នកគាំទ្រគណបក្សប្រជាជនកម្ពុជាដែលជាគណបក្សនយោបាយគ្រប់គ្រង អំណាចផ្ដាច់មុខដ៏ធំនៅកម្ពុជាឆ្លើយតបថា “អត់ដូរ” ។
តាមការសង្កេតជាក់ស្ដែងបានបង្ហាញថា សំឡេងគាំទ្រឱ្យមានការផ្លាស់ប្ដូរឬឱ្យមានការដូរនៅក្នុងស្រទាប់អ្នកលេងហ្វេសប៊ុក មានចំនួនច្រើនលើសលប់ រីឯមជ្ឈដ្ឋាននៅខាងក្រៅហ្វេសប៊ុកក៏មានការចាប់អារម្មណ៍ខ្លាំងទៅនឹងការទាមទារឱ្យមានការផ្លាស់ប្ដូរនេះដែរ ដោយឆ្លុះបញ្ចាំងតាមចំនួនអ្នកគាំទ្រគណបក្សសង្គ្រោះជាតិមានការកើនឡើងខ្លាំងក្លាជាបន្ដបន្ទាប់ ។
យុវជនអ្នកលេងហ្វេសប៊ុកមួយក្រុមបានបញ្ចេញទស្សនៈយល់ឃើញរបស់ខ្លួនថា ការកាន់កាប់អំណាចដ៏យូររបស់គណបក្សប្រជាជនកម្ពុជា ជាពិសេសសម្ដេចនាយករដ្ឋមន្ដ្រី ហ៊ុន សែន រហូតដល់បច្ចុប្បន្នមានរយៈពេលជិត៣០ឆ្នាំជាប់ៗគ្នា ក្លាយជាការបង្កើតឱ្យមានអំពើបក្ខពួកនិយម គ្រួសារនិយម ផ្ដាច់ការ ពុករលួយជាប្រព័ន្ធចាក់គ្រឹះយ៉ាងជ្រៅនៅក្នុងសង្គម ដែលប្រទេសនានានៅលើពិភពលោកភាគច្រើនគេបានកែសម្រួលឬលុបបំបាត់រូបភាពនៃការកាន់កាប់អំណាចយូរយារបែបនេះចោលហើយ ។ ដូច្នេះ យើងត្រូវតែធ្វើការផ្លាស់ប្ដូរ តាមរយៈការបោះឆ្នោតនៅពេលខាងមុខ ។
ព័ស្ដុតាងជាច្រើនទាក់ទងទៅនឹងរូបភាពនៃអំពើពុករលួយជាប្រព័ន្ធពីថ្នាក់លើដល់ថ្នាក់ក្រោម និងពីមន្ដ្រីដល់ឈ្មួញរកស៊ី តាមវប្បធម៌សិល្បៈនៃការចែករំលែក (កូន ប្រពន្ធអ្នកធំរកស៊ីបើកក្រុមហ៊ុន រួមដៃជាមួយក្រុមឈ្មួញឯទៀតៗ ត្រូវបានកាងការពារពីក្រោយដោយអំណាចរបស់ឪពុក ប្ដីដែលជាអ្នកមានអំណាចធំ) អំពើហិង្សាគ្រប់រូបភាពកើតចេញពីស្រទាប់ក្រុម គ្រួសារ បងប្អូន កូនចៅអ្នកធំ អ្នកមានលុយ មកលើជនក្រីក្រតូចតាច អំពើហិង្សារបស់អាជ្ញាធរមានសមត្ថកិច្ចមកលើក្រុមកម្មករ កម្មការិនីរោងចក្រកាត់ដេរប្រជាពលរដ្ឋនិងព្រះសង្ឃ អំពើរំលោភបំពានយកដីធ្លីពីអ្នកមានអំណាច អ្នកមានលុយមកលើប្រជាពលរដ្ឋតូចតាច អំពើបំផ្លិចបំផ្លាញធនធានធម្មជាតិ ដូចជា ព្រៃឈើ ត្រី រ៉ែ …និងវប្បធម៌បេតិកភណ្ឌជាតិ អំពើអសន្ដិសុខសង្គម និងការមិនគោរពច្បាប់ តុលាការលម្អៀង និងពុករលួយ…។ល។ ក្រោមការគ្រប់គ្រងរបស់គណបក្សនយោបាយកាន់អំណាច បានធ្វើឱ្យក្រុមប្រជាពលរដ្ឋរងគ្រោះ និងកូនចៅរបស់ពួកគាត់ក្ដៅក្រហាយខឹងសម្បា ហើយក៏ទាមទារឱ្យមានការផ្លាស់ប្ដូរប្រព័ន្ធគ្រប់គ្រងចាស់របៀបសព្វថ្ងៃនេះចោល ។
មជ្ឈដ្ឋានអ្នកលេងហ្វេសប៊ុកបានធ្វើការប្រៀបធៀបថា នៅប្រទេសវៀតណាមរយៈពេលជាង៣០ឆ្នាំ គេផ្លាស់ប្ដូរនាយករដ្ឋមន្ដ្រីដល់ទៅចំនួន៦នាក់ ខណៈដែលនៅប្រទេសថៃក្នុងរយៈពេលជាង២០ឆ្នាំ គេធ្វើការផ្លាស់ប្ដូរនាយករដ្ឋមន្ដ្រីដល់ចំនួន១០នាក់ទៅហើយ រីឯកម្ពុជាយើងជិត៣០ឆ្នាំ នៅតែនាយករដ្ឋមន្ដ្រីមួយមុខដដែលៗ គឺសម្ដេច ហ៊ុន សែន ។
សន្ទុះទឹកចិត្ដនិងឆន្ទៈរបស់យុវជនសម័យថ្មីនេះ ដែលមានសេចក្ដីក្លាហានទាមទារឱ្យមានការផ្លាស់ប្ដូរ គឺធ្វើការផ្លាស់ប្ដូរពីការគាំទ្រគណបក្សប្រជាជនកម្ពុជាមានលេខរៀងទី៤នៅលើសន្លឹកឆ្នោត មកបោះឆ្នោតគាំទ្រឱ្យគណបក្សនយោបាយមួយដែលមានប្រជាប្រិយភាព គឺគណបក្សសង្គ្រោះជាតិមានលេខរៀងទី៧ នៅលើសន្លឹកឆ្នោតដែលមានឯកឧត្ដមសម រង្ស៊ី ជា ប្រធាន ។
ទោះជាយ៉ាងណាក៏ដោយ នេះគឺគ្រាន់តែជាការឆ្លុះបញ្ចាំងអំពីសន្ទុះទឹកចិត្ដ និងឆន្ទៈរបស់យុវជនសម័យថ្មីដែលកំពុងគាំទ្រទៅលើគណបក្សសង្គ្រោះជាតិប៉ុណ្ណោះ រីឯលទ្ធផលពិតប្រាកដដែលអាចផ្លាស់ប្ដូរបាន ឬមិនបាននៅដដែលនោះ គឺអាស្រ័យទៅលើសន្លឹកឆ្នោតទទួលបាននូវពេលបោះឆ្នោតថ្ងៃទី២៨ ខែកក្កដា ឆ្នាំ២០១៣ខាងមុខ ៕
ប្រភពពីដើមត្នោត
