បើតាមមន្ត្រីកងរាជអាវុធហត្ថស្រុកខ្សាច់កណ្តាលបានឲ្យដឹងថា អំពើឃាតកម្មប្លន់សម្លាប់សន្តិសុខយាមនៅស្នាក់ការគ្រឹះស្ថានមីក្រូហិរញ្ញវត្ថុស្ថាបនាលីមីតធីតដែលមានទីតាំងនៅភូមិវិហារសួគ៌ជើង ឃុំវិហារសួគ៌ ស្រុកខ្សាច់កណ្តាល ខេត្តកណ្តាល កាលពីវេលាម៉ោង១រំលងអធ្រាត្រចូលថ្ងៃទី២២ ខែកក្កដា ឆ្នាំ២០១៣នោះរហូតមកដល់ព្រឹកថ្ងៃទី២៣ ខែកក្កដា ឆ្នាំ២០១៣ ការស្រាវជ្រាវរបស់សមត្ថកិច្ចជំនាញបានសង្ស័យមុខសញ្ញាចំនួន៥នាក់ ហើយកំពុងឃាត់ខ្លួនធ្វើការសាកសួរ។
ជនសង្ស័យពីរនាក់ដែលត្រូវបានឃាត់ខ្លួននៅព្រឹកថ្ងៃទី២៣ ខែកក្កដា ឆ្នាំ២០១៣ បានសារភាពឲ្យដឹងថា ការធ្វើសកម្មភាពប្លន់នោះគឺពួកគេមានគ្នាចំនួន៥នាក់។ ដោយមានចម្លើយសារភាពរបស់ជនសង្ស័យខាងលើសមត្ថកិច្ចកងរាជអាវុធហត្ថស្រាវជ្រាវឃាត់ខ្លួនមុខសញ្ញាបានម្នាក់ទៀត ហើយនាំខ្លួនទៅចង្អុលបង្ហាញនៅកន្លែងកើតហេតុនិងឈានទៅដល់ការឃាត់ខ្លួនជនសង្ស័យពីរនាក់ទៀតយកមកសាកសួរ។ តែយ៉ាងណាសមត្ថកិច្ចមិនទាន់ទម្លាយឲ្យដឹងពីអត្តសញ្ញាណរបស់ជនសង្ស័យមានការពាក់ព័ន្ធនឹងអំពើប្លន់សម្លាប់សន្តិសុខយាមនៅគ្រឹះស្ថានមីក្រូហិរញ្ញវត្ថុស្ថាបនាលីមីតធីតនោះឡើយ។
សូមបញ្ជាក់ផងដែរថា កាលពីវេលាម៉ោង១រំលងអធ្រាត្រឈានចូលថ្ងៃទី២២ ខែកក្កដា ឆ្នាំ២០១៣ មានអំពើឃាតកម្មប្លន់សម្លាប់មួយបានកើតឡើងនៅក្នុងស្នាក់ការគ្រឹះស្ថានមីក្រូហិរញ្ញវត្ថុស្ថាបនាលីមីតធីតដែលមានទីតាំងស្ថិតក្នុងភូមិវិហារសួគ៌ជើង ឃុំវិហារសួគ៌ ស្រុកខ្សាច់កណ្តាល ខេត្តកណ្តាល ។ ជនរងគ្រោះដែលត្រូវបានគេសម្លាប់នោះមានឈ្មោះ ឃឺន ស៊ីន ភេទប្រុស អាយុ៤២ឆ្នាំ មានទីលំនៅភូមិឃុំកើតហេតុ ជាសន្តិសុខឯកជនរបស់ក្រុមហ៊ុនប៊េស។
អំពើប្លន់សម្លាប់នេះពុំមានសាក្សីណាមួយបានឃើញអំពីសកម្មភាពនោះឡើយ តែនៅព្រឹកថ្ងៃទី២២ ខែកក្កដា ឆ្នាំ២០១៣ ខណៈដែលមានបុគ្គលិករបស់ធនាគារចូលទៅធ្វើការក៏បានឃើញហេតុការណ៍សន្តិសុខម្នាក់បានដេកស្លាប់នៅក្នុងថ្លុកឈាមក្បែររបងស្នាក់ការដោយមានរូបភាពមានផ្លែក្រូចញ៉ុកក្នុងមាត់របស់ជនរងគ្រោះ ហើយមានស្កុតបិទរុំមុខនិងមាត់យ៉ាងជិត។ បន្ទាប់មានហេតុការណ៍នេះ កម្លាំងសមត្ថកិច្ចទាំងប៉ូលិសនិងកងរាជអាវុធហត្ថស្រុកខ្សាច់កណ្តាលបានចុះទៅពិនិត្យនៅកន្លែងកើតហេតុទើបដឹងថា ជាអំពើឃាតកម្មប្លន់សម្លាប់យកទ្រព្យសម្បត្តិ។
បើតាមបុគ្គលិកគ្រឹះស្ថានហិរញ្ញវត្ថុស្ថាបនាលីមីតធីតបានឲ្យដឹងថា មានទូដែកមួយដែលពុំមានផ្ទុកលុយនៅក្នុងនោះត្រូវបានមុខសញ្ញាចោរប្លន់យកទៅបាត់។ ចំណែកឯជនរងគ្រោះត្រូវជនសង្ស័យវាយនឹងរបស់រឹងនិងយកក្រូចឆ្មាញ៉ុកចូលមាត់ហើយថែមទាំងយកស្កុតរុំមុខមាត់ជិតអស់រួចក៏បានប្រើភ្លើងដុតរំលាយសោចូលទៅខាងក្នុងធ្វើសកម្មភាពគាស់ទូដែកតែគាស់មិនបានក៏នាំគ្នាសែងចេញយកទៅបាត់៕
ប្រភពពីកម្ពុជាថ្មី
