ខេត្តស្ទឹងត្រែង ៖ សត្វគោ២ក្បាល ត្រូវបានគេប្រទះឃើញដេកងាប់ នៅលើសួនច្បារខាង មុខសាលាខេត្ត ដោយគេសង្ស័យថា បណ្តាលមកពីឆក់ចរន្តអគ្គីសនីឆ្លងតាមបង្គោលភ្លើង ហើយក្រុមអ្នកចោមរោមមើល បានដាក់បន្ទុកទៅលើបណ្តាញអគ្គីសនីថា ការតភ្ជាប់ប្រព័ន្ធ ភ្លើង ក្រុមមន្ត្រីជំនាញមិនបានត្រួតពិនិត្យ ទៅលើលក្ខណៈបច្ចេកទេសត្រឹមត្រូវនោះឡើយ ។
សត្វគោទាំងពីរក្បាលនោះ ត្រូវគេរាយការណ៍ថា បានដេកងាប់គរជើងលើគ្នា ដោយជើងរបស់សត្វគោនោះបានជាប់នឹងទៅបង្គោលភ្លើង នៅលើសួនច្បារមុខសាលាខេត្ត នាព្រឹកថ្ងៃពុធទី១៩ ខែមិថុនា ឆ្នាំ ២០១៣នេះ។ ចំណែកសត្វគោទាំងពីរក្បាល ដែលងាប់នៅគ្រានោះ គ្មាននរណាម្នាក់ហ៊ានអះអាងថាជារបស់ខ្លួននោះទេ ។
ប្រជាពលរដ្ឋអ្នកធ្វើដំណើរឆ្លងកាត់ ក៏ដូចជាអ្នកដែលមកហាត់ប្រាណ លើទីលានសួនច្បារដ៏ច្រើននាក់បាននិយាយថា នេះជាការធ្វេសប្រហែសរបស់ក្រុមបណ្តាញចែកចាយអគ្គីសនីខេត្ត ការតភ្ជាប់ប្រព័ន្ធភ្លើងក្រុមមន្ត្រីជំនាញ មិនបានធ្វើការត្រួតពិនិត្យទៅលើលក្ខណៈបច្ចេកទេស ឲ្យបានត្រឹមត្រូវទៅតាមកំរិតស្តង់ដានោះឡើយ ។
ក្រុមប្រប្រជាពលរដ្ឋបានលើកឡើងថា លើនេះឆក់សត្វពាហនៈងាប់ ចុះនៅពេលបន្ទាប់ប្រសិនបើឆក់មនុស្សស្លាប់ តើមាននរណាជាអ្នកទទួលខុសត្រូវទៅ? ហើយពួកគាត់បានសំណូមពរទៅដល់មន្ទីរពាក់ព័ន្ធ ជាពិសេសបណ្តាញចែកចាយអគ្គីសនីខេត្តស្ទឹងត្រែង គួរតែចាត់វិធានការឲ្យបានច្បាស់លាស់ និងធ្វើការត្រួតពិនិត្យឡើងវិញ ពីលក្ខណៈបច្ចេកទេសក្នុងការត ភ្ជាប់ចរន្តអគ្គីសនី នៅតាមបណ្តារបង្គោលភ្លើងនិមួយៗក្នុងក្រុង ជាពិសេសបង្គោលភ្លើងនៅតាមទីសាធា រណៈ ដូចជានៅតាមសួនច្បារជាដើម ។ល។ ជៀសវាងថ្ងៃក្រោយកំហុសវិជ្ជាជីវៈកើតឡើងជាយថាហេតុ ។ចំណែកអ្នកឧស្សាហ៍មកហាត់ប្រាណ ឬលំហែរកាយនៅទីនេះ គួរតែមានការប្រុងប្រយ័ត្នខ្ពស់ កុំមក ចាប់ឬផ្អែកលេងបង្គោលភ្លើង ដែលផ្ទុកទៅដោយចរន្តអគ្គីសនីទាំងនោះឡើយ ។
ក្រុមមន្ត្រីនគរបាលសណ្តាប់ធ្នាប់ខេត្តបានអះអាងថា សត្វគោទាំងពីរក្បាលនេះពិតជាបានងាប់ ដោយសារឆក់ចរន្តអគ្គីសនី តាមរយះបង្គោលភ្លើងនោះយ៉ាងពិតប្រាកដ ។ ហើយនៅគ្រាបន្ទាប់សត្វគោ នោះត្រូវបានគេដឹកទៅកាន់ទីតាំងសត្តឃាតក្រុង បន្ទាប់ពីក្រុមមន្ត្រីបសុពេទ្យរកម្ចាស់មិនឃើញ៕
