ខេត្តបាត់ដំបង ៖ មុខសញ្ញាចោរប្លន់ដ៏សកម្ម២នាក់ ដែលតែងធ្វើសកម្មភាពកាច់សោ.កម៉ូតូ និងយកកាំភ្លើងភ្ជង់ប្លន់ម៉ូតូប្រជាពលរដ្ឋនៅទីជនបទដាច់ស្រយ៉ាល ត្រូវបានសមត្ថកិច្ចចម្រុះ ធ្វើការបង្ក្រាបបាន កាលពីវេលាម៉ោង៨និង៤០នាទីព្រឹកថ្ងៃទី១៨ ខែមិថុនា ឆ្នាំ២០១៣ នៅចំណុចអណ្តូងតាចាងក្រៅ ក្នុងភូមិកូនខ្លុងឃុំ ព្រៃតូច ស្រុកមោងឫស្សី ខេត្តបាត់ដំបង និងដកហូតបានវត្ថុតាងបានម៉ូតូ៣គ្រឿង និងកាំភ្លើង២ដើម ។
បើតាមប្រភពពីសមត្ថកិច្ចបានឲ្យដឹងថា ជនសង្ស័យដែលត្រូវសមត្ថកិច្ចចាប់ឃាត់ខ្លួន ទី១មានឈ្មោះ ឈុន រាក់ អាយុ៣៦ឆ្នាំ មានស្រុកកំណើតនីភូមិតាឡប់ ឃុំក្បាលស្ពាន ស្រុកគីរីវង្ស ខេត្តតាកែវ បច្ចុប្បន្នស្នាក់នៅបណ្តោះអាសន្ននៅសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ និងទី២មានឈ្មោះ យន្ត ហំ អាយុ៣៩ឆ្នាំ រស់នៅស្រុកអង្គស្នួល ខេត្តកណ្តាល។ ចំណែកវត្ថុតាងដែលសមត្ថកិច្ចធ្វើការដកហូតបានរួមមានម៉ូតូម៉ាកសេ១២៥ ពណ៌ខ្មៅ ស៊េរីឆ្នាំ២០១៣ បីគ្រឿង កាំភ្លើងខ្លីម៉ាកកា៥៩ចំនួន២ដើម និងគ្រាប់៩គ្រាប់។
សូមរំលឹកថា កាលពីរសៀលថ្ងៃទី១៧ ខែមិថុនា ឆ្នាំ២០១៣ មានចោរ២នាក់បានធ្វើសកម្មភាពលួចកាច់សោ.កយកម៉ូតូ ២គ្រឿងរបស់ប្រជាពលរដ្ឋទុកនៅក្បែរផ្លូវ នៅភូមិព្រៃដំរី ឃុំព្រៃតូច ស្រុកមោងឫស្សី ពេលសមត្ថកិច្ចទទួលព័ត៌មាន ក៏បានចុះ ដេញចាប់ជនសង្ស័យ ហើយពួកគេបានបើកម៉ូតូចូលទៅក្នុងព្រៃរនាម ដោយទុកម៉ូតូចោល រត់ចូលសម្ងំពួនក្នុងព្រៃអស់មួយយប់ ។ លុះដល់វេលាម៉ោង៨និង៤០នាទីព្រឹក ថ្ងៃទី១៨ ខែមិថុនា ឆ្នាំ២០១៣ ក្រុមចោរទាំង២នាក់នេះបានចេញពីព្រៃកាក់ហៅម៉ូតូអ្នកស្រុកឲ្យឌុប ពេលម្ចាស់ម៉ូតូមិនឌុប ពួកគេបានយកកាំភ្លើងភ្ជង់យកម៉ូតូ ប៉ុន្តែត្រូវបានម្ចាស់តដៃ ពួកគេក្រុមចោរក៏បានបាញ់១គ្រាប់គំរាមរួចក៏យកម៉ូតូជិះចេញបាត់ ។ ក្រោយមកម្ចាស់ម៉ូតូបានប្តឹងសមត្ថកិច្ច ទើបសមត្ថកិច្ចចម្រុះតាមប្រមាញ់និងឃាត់ខ្លួនជនសង្ស័យទាំង២នាក់តែម្តង។
បន្ទាប់ពីធ្វើការសាកសួររួចមក ជនសង្ស័យទាំង២នាក់បានសារភាពថា ពួកខ្លួនបានជិះរថយន្តពីភ្នំពេញមកធ្វើសកម្មភាពកាច់សោ.កម៉ូតូចំនួន៣លើកមកហើយនៅចំណុចឃុំព្រៃតូច នេះ ហើយកាំភ្លើងទាំង២ដើមដែលធ្វើសកម្មភាពប្លន់នេះ គឺពួកគេបានមកពីឈ្មោះ មឿន ហើយឈ្មោះ មឿន ក៏ធ្លាប់ធ្វើសកម្មភាពប្លន់នៅលើកំណាត់ផ្លូវជាតិលេខ៣ដែរ តែត្រូវសមត្ថកិច្ចឃាត់ខ្លួនដាក់គុកព្រៃសហើយ។
បច្ចុប្បន្នជនសង្ស័យទាំង២នាក់ ត្រូវបានសមត្ថកិច្ចឃុំខ្លួននៅអធិការដ្ឋានជាបណ្តោះអាសន្ន ដើម្បីធ្វើការសាកសួររកបក្ខពួកបន្ត និងកសាងសំណុំរឿងបញ្ជូនទៅកាន់តុលាការចាត់ការទៅតាមនីតិវិធីច្បាប់៕
_____________________ប្រភពពី៖ cambodiapage.info
