ខេត្តកណ្តាល ៖ មានហេតុការណ៍គ្រោះថ្នាក់ចរាចរណ៍ដ៏គួរឲ្យរន្ធត់មួយបានកើតឡើងកាលពីវេលាម៉ោង ៨និង៣០នាទី យប់ថ្ងៃទី១២ ខែមិថុនា ឆ្នាំ២០១៣ ស្ថិតនៅតាមបណ្តោយផ្លូវជាតិលេខ២ មុខផ្សារតាខ្មៅថ្មី ក្នុងសង្កាត់ដើមមាន ក្រុងតាខ្មៅ ដែលបណ្តាលឲ្យយុវជន២នាក់បានស្លាប់ភ្លាមៗ នៅកន្លែងកើតហេតុ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញម៉ូតូម៉ាកវីវ៉ា មួយគ្រឿងជិះគ្នា២នាក់ បើកបរតាមបណ្តាយផ្លូវជាតិលេខ២ ក្នុងល្បឿនយ៉ាងលឿន ដោយបានបើកបញ្ច្រាសទិស មិនប្រកាន់ស្តាំ លុះបើកមកដល់ចំណុចកើតហេតុ ក៏ជ្រុលទៅបុករថយន្តម៉ាកហ៊ីយ៉ាន់ដាយ មួយគ្រឿង ដែលធ្វើដំណើរពីមុខពេញទំហឹង បណ្តាលឲ្យជនរងគ្រោះ ទាំងពីរនាក់ដួលបោកក្បាល ស្លាប់ភ្លាមៗនៅកន្លែងកើតហេតុ។
ក្រោយពេលកើតហេតុ គេបានឃើញសមត្ថកិច្ចចុះទៅពិនិត្យ និងនាំយកម៉ូតូ របស់ជនរងគ្រោះ និងរថយន្តទៅរក្សាទុក ដើម្បីរង់ចាំការដោះស្រាយបន្តទៀត។ បច្ចុប្បន្នសមត្ថកិច្ចនៅមិនទាន់អាចបញ្ជាក់ពីអត្តសញ្ញាណរបស់ជនរងគ្រោះនៅឡើយទេ ព្រោះពួកគេទាំង២នាក់មិនបានដាក់លិខិតសម្គាល់ខ្លួននៅជាប់នឹងខ្លួនឡើយ៕
ប្រភពពី វត្តភ្នំ
