រាជធានីភ្នំពេញ៖ សមត្ថកិច្ចនគរបាលខណ្ឌទួលគោក បានធ្វើការចាប់ឃាត់ខ្លួនបុរសម្នាក់ កាលពីវេលាម៉ោង ៤និង៣០នាទីល្ងាច ថ្ងៃទី០៦ ខែមិថុនា ឆ្នាំ២០១៣ នៅចំណុចផ្ទះលេខ ៩E1z ផ្លូវលេខ២១៥ ក្រុម៣០ សង្កាត់ផ្សាដេប៉ូទី២ខណ្ឌទួលគោក ដោយសារតែបុរសខាងលើនេះបានយកកាំភ្លើងខ្លីម៉ាក K54 មួយដើម ទៅភ្ជង់ស្ត្រីជាអតីតប្រពន្ធ បំណងនាំយកទៅរួមរស់ជាមួយគ្នាវិញ បន្ទាប់ពីលែងលះគ្នាអស់រយៈពេលជាង១ឆ្នាំកន្លងមក។
ប្រភពពីសមត្ថកិច្ចបានឲ្យដឹងថា បុរសដែលត្រូវសមត្ថកិច្ចចាប់ឃាត់ខ្លួនខាងលើនេះមានឈ្មោះ ជឹង រតនា ហៅសាន អាយុ៣៧ឆ្នាំ មានមុខរបរជាជាងជួសជុលកុំព្យូទ័រ ស្នាក់នៅផ្ទះលេខ៧៨ ផ្លូវ២១៥ ក្នុងសង្កាត់វាលវង់ ខណ្ឌ៧មករា ចំណែកស្ត្រីជាប្រពន្ធមានឈ្មោះ ភព សេរីវឌ្ឍនី អាយុ២៤ឆ្នាំ មុខរបរនៅផ្ទះ។
បើតាមការរៀបរាប់របស់ជនសង្ស័យខាងលើបានឲ្យដឹងថា ខ្លួននិងប្រពន្ធបានចាប់ដៃរស់នៅជាមួយគ្នាអស់រយៈពេល៦-៧ឆ្នាំកន្លងមកហើយ ដោយបានបន្សល់នូវចំណងដៃកូនប្រុសម្នាក់ អាយុ៦ឆ្នាំ ប៉ុន្តែមួយរយៈពេលជាង១ឆ្នាំកន្លងមកនេះ ខ្លួននិងប្រពន្ធបានលែងលះគ្នា ដោយប្រពន្ធបានមកនៅជាមួយបងប្អូននៅផ្ទះកើតហេតុខាងលើ។
ប្រភពដដែលបានបន្តទៀតថា ដោយសារខ្លួនចង់រស់នៅជាមួយប្រពន្ធវិញ ខ្លួនក៏បានព្យាយាមលួងលោមនាងជាច្រើនលើកច្រើនសាដើម្បីបានរស់នៅជួបជុំគ្នាវិញ ប៉ុន្តែត្រូវបានប្រពន្ធបដិសេធ ទើបរូបគេយកកាំភ្លើងមកភ្ជង់ប្រពន្ធលេង ដើម្បីឲ្យប្រពន្ធព្រមរួមរស់ជាមួយគ្នាវិញ តែបែរជាត្រូវប្រពន្ធប្តឹងសមត្ថកិច្ចឲ្យចាប់ខ្លួនរូបគេតែម្តង។
បច្ចុប្បន្នជនល្មើសខាងលើត្រូវបាន សមត្ថកិច្ចនគរបាលខណ្ឌទួលគោក កសាងសំណុំរឿងដើម្បីបញ្ជូនទៅតុលាការផ្តន្ទាទោសតាមច្បាប់ ពាក់ព័ន្ធការប្រើប្រាស់អាវុធខុសច្បាប់ និងស្ត្រីជាប្រពន្ធប្តឹងពីបទបង្ខាំងលើរាងកាយនាងថែមទៀតផង៕
ប្រភពពី៖ cambodiapage.info
0 comments:
Post a Comment