កាលពីថ្ងៃសុក្រ ទី២១ ខែមិថុនា នេះ ក្រសួងមហាផ្ទៃ បានចេញផ្សាយរបាយការណ៍ បូកសរុបសភាពការណ៍ និងលទ្ធផលនៃកិច្ចប្រតិបត្តិការ បង្ការទប់ស្កាត់ និងបង្ក្រាបការកាប់ ការដឹកជញ្ជូន ការប្រមូល ការស្តុកទុក និងការនាំចេញឈើគ្រញូង។ របាយការណ៍បានបង្ហាញថា ៤ខែ ក្រោយពេលរាជរដ្ឋាភិបាលបានចេញបទបញ្ជាលេខ ០២បប ចុះថ្ងៃទី២២ ខែកុម្ភៈ ឆ្នាំ២០១៣ ស្ដីពីវិធានការបង្ការ ទប់ស្កាត់ និងបង្ក្រាបការកាប់ ការដឹកជញ្ជូន ការប្រមូល ការស្តុកទុក និងការនាំចេញឈើក្រញូងនោះមក ក្រសួងមហាផ្ទៃបង្ក្រាបឈើគ្រញូងបាន១០លើក ដែលមានឈើគ្រញូងសរុបជាង ៤ពាន់ម៉ែត្រគូប។
របាយការណ៍កម្រាស់៣ទំព័រ ចេញផ្សាយដោយក្រសួងមហាផ្ទៃ កាលពីថ្ងៃទី២១ ខែមិថុនា កន្លងទៅ បូកសរុបសភាពការណ៍ និងលទ្ធផលកិច្ចប្រតិបត្តិការ បង្ការទប់ស្កាត់ និងបង្ក្រាបការកាប់ ការដឹកជញ្ជូន ការប្រមូល ការស្តុកទុក និងការនាំចេញឈើគ្រញូង ប្រចាំខែមិថុនា ឲ្យដឹងថា ប្រជាពលរដ្ឋនៅតែបន្តលួចលាក់ឆ្លងដែនដោយខុសច្បាប់ចូលទៅកាប់ឈើនៅប្រទេសថៃ បណ្ដាលឲ្យភាគីថៃ បាញ់ស្លាប់៦នាក់ ចាប់ខ្លួនបាន៦នាក់ និងរត់រួច៣២នាក់។ ការឆ្លងដែនខុសច្បាប់នេះនៅតែមានជាបន្តបន្ទាប់ ជាពិសេសនៅតាមភូមិសាស្ត្រខេត្តឧត្តរមានជ័យ ព្រះវិហារ និងបាត់ដំបង ដែលជាភូមិសាស្ត្រស្មុគ្រស្មាញយ៉ាងខ្លាំង។
របាយការណ៍ដែលបានបង្ហាញពីលទ្ធផលបង្ក្រាបឈើគ្រញូង រយៈពេល៤ខែ គិតចាប់តាំងពីចុងខែកុម្ភៈ រហូតមកដល់ចុងខែមិថុនានេះ ថា ក្រសួងមហាផ្ទៃបង្ក្រាបការជួញដូរឈើគ្រញូងបាន១០លើក ក្នុងនោះរួមមាននៅក្នុង ខេត្តមណ្ឌលគិរី ៣លើក, កំពង់ធំ២លើក, ពោធិ៍សាត់១លើក, កំពង់ឆ្នាំង១លើក, ស្ទឹងត្រែង១លើក, សៀមរាប១លើក, និងខេត្តកំពត១លើក។ ចាប់ខ្លួនជនល្មើសចំនួន២នាក់ និងវត្ថុតាងរួមមាន រថយន្ដ៩គ្រឿង ឈើ៥៧៧ដុំ ទម្ងន់៨២៨៣គីឡូក្រាម ហើយបើគិតជាគូប គឺមានចំនួនសរុប ៤១៤២ ម៉ែត្រគូប។ ឈើគ្រញូង២៥ដុំ ត្រូវបានដុតកម្ទេច ខណៈពេលកងនគរបាលព្រំដែនគោក ប្រទះឃើញនៅចំណុចភ្នំងោល ខេត្តព្រះវិហារ។
ដោយសារតែនៅតាមបណ្ដាខេត្តរាជធានី ភាគច្រើន នៅមិនទាន់មានលេខាធិការដ្ឋាននៅថ្នាក់ក្រោមជាតិ សម្រាប់បង្ការទប់ស្កាត់ និងបង្ក្រាបការកាប់ ការដឹកជញ្ជូន ការប្រមូល ការស្តុកទុក និងការបង្ក្រាបការនាំចេញឈើគ្រញូង ក្រសួងមហាផ្ទៃបានដាក់ទិសដៅ ជម្រុញឲ្យគណៈបញ្ជាការឯកភាពរាជធានីខេត្ត បង្កើតលេខាធិការដ្ឋានឲ្យបាន ដើម្បីធ្វើការលើការងារនេះ។ ក្រៅអំពីនេះ ក្រសួងមហាផ្ទៃ ឲ្យដឹង តាមរយៈរបាយការណ៍ទៀតថា ខ្លួននឹងចុះទៅសិក្សាស្រាវជ្រាវដើម្បីកំណត់ភូមិសាស្ត្រ ដែលមានការពាក់ព័ន្ធស្មុគ្រស្មាញ អំពីការឆ្លងដែនខុសច្បាប់ ចូលទៅកាប់ឈើនៅប្រទេសជិតខាងផងដែរ៕
ប្រភពពី RFI
