ខេត្តព្រះសីហនុ ៖ កាលពីព្រឹកព្រលឹមស្រាងៗនៅបណ្តោយផ្លូវសម្តេចពេទវង្ស ភ្ជាប់ពីផ្លូវជាតិលេខ៤ឆ្ពោះទៅស្រុកស្ទឹងហាវ ខេត្តព្រះសីហនុ ត្រង់ចំណុចចំណោទវត្តថ្មដា ក្នុងភូមិសាស្ត្រភូមិវាលធំ ឃុំជើងគោ ស្រុកព្រៃនប់ មានរថយន្តដឹកប្រេងចំណុះមួយ១០.០០០លីត្រ មួយគ្រឿងក្រឡាប់ផ្ងាជើងចាក់ប្រេងម៉ាស៊ូតចោលអស់រាប់ពាន់លីត្រ រីឯរថយន្តដឹកប្រេងនោះគ្មានស្លាកយីហោក្រុមហ៊ុនអ្វីនោះទេ ដោយគេសង្សយ័ថា ជារថយន្តដឹកប្រេងគេចពន្ធ ។
អ្នកស្រុកនៅជិតកន្លែងកើតហេតុនោះ បាននិយាយថា រថយន្តដឹកប្រេងមួយនេះគេសង្កេតឃើញតែងបើកបរពេលយប់ៗ មិនសូវឲ្យគេឯងឃើញទេ ហើយបើកល្បឿនលឿនដូចហោះ ប៉ុន្តែមិនដែលឃើញសមត្ថកិច្ចណាមួយហ៊ានឃាត់និងពិនិត្យអ្វីនោះទេ ។
នគរបាលចរាចរណ៍ផ្លូវគោកស្រុកព្រៃនប់ បានខ្សឹបប្រាប់ថារថយន្តដឹកប្រេងនេះសង្ស័យគេចពន្ធ ពួកគេបើកបរក្នុងល្បឿនលឿន គាប់ជួនភ្លៀងរលឹមផង ក៏រអិលធ្លាក់ផ្លូវតែម្តងទៅ ។ រថយន្តដឹកប្រេងនោះពាក់ស្លាកលេខភ្នំពេញ 3B-5867 ជាកម្មសិទ្ធិរបស់ការ៉ាស់សាំងមួយយីហោ តារា ដែលគេស្គាល់ច្បាស់ថា ជាការ៉ាស់ឯកជនលក់ប្រេងគេចពន្ធស្ទើរទាំងស្រុងក្នុងភូមិវាលមាសឃុំវាលរេញ ស្រុកព្រៃនប់ ខេត្តព្រះសីហនុ ។
ប្រភពដដែលបានបន្តថា រថយន្តនោះត្រូវបានម្ចាស់ការ៉ាស់សាំងខាងលើ អូសយកមកទុកនៅការ៉ាស់ខាងលើនោះហើយ ។ គួរបញ្ជាក់ថា នៅក្នុងខេត្តព្រះសីហនុ ដែលជាខេត្តមួយជាប់ដែនសមុទ្រការធ្វើចរាចរណ៍តាមផ្លូវទឹក មានភាពងាយស្រួល ដែលជាហេតុធ្វើឲ្យការប្រកបរបររកស៊ីជួញប្រេងឥន្ទនៈឆ្លងដែនមានភាពងាយស្រួល ជាពិសេស នៅលើដែនគោកគេមានការត្រូវរ៉ូវគ្នាដឹកម៉ាសេរី មិនដែលអ្នកណាហ៊ានសួរនាំអំពីច្បាប់ទម្លាប់អ្វីទេ ៕
ប្រភពពី៖ cambodiapage.info
