រថយន្តដឹកកពា្ចក់ពីភ្នំពេញទៅមណ្ឌលគីរីក្រឡាប់តាមផ្លូវរងរបួសធ្ងន់ស្រាល៣នាក់

5:37 AM

មណ្ឌលគិរី៖ យ៉ាងតិចណាស់មានមនុស្ស៣រងរបួសធ្ងន់ស្រាល ដោយសាររថយន្តដឹកទំនិញម៉ាកហ៊ីយ៉ានដាយ២តោនកន្លះមួយគ្រឿងដឹកកញ្ចក់ជាច្រើនផ្ទាំងមកពីភ្នំពេញយកមកចែកចាយនៅក្នុងខេត្តមណ្ឌលគិរីបានក្រឡាប់ធ្លាក់ចញ្ចើមផ្លូវបណ្តាលឲ្យផ្ទាំងកញ្ចក់បែករាយប៉ាយពេញផ្លូវកាលពីវេលាម៉ោង១និង៣០នាទីរសៀលថ្ងៃទី០៧ខែមិថុនាឆ្នាំ២០១៣។គ្រោះថ្នាក់ចរាចរណ៍នេះបានកើតឡើងតាមបណ្តោយផ្លូវជាតិលេខ៧៦នៅត្រង់ភូមិពូទ្រូឃុំសែនមនោរម្យស្រុកអូររាំងខេត្តមណ្ឌគិរី។លោកយឹមចន្ដានាយរងការិយាល័យចរាចរណ៍ផ្លូវគោកនៃស្នងការដ្ឋានខេត្តមណ្ឌលគិរីបានឲ្យដឹងថា តាមការត្រួតពិនិត្យគ្រោះថ្នាក់មួយនេះគឺបណ្តាលមកពីកត្តាមនុស្សខ្វះការប្រុងប្រយ័ត្នក្នុងការបញ្ជារថយន្ត ព្រោះបើតាមការសាកសួរទៅអ្នកបើកបរគឺមកដល់ផ្លូវកោងហាក់បីដូចជាបាត់បង់ស្មារតីក្នុងការគ្រប់គ្រងរថយន្តលែងបានក៏រេចង្កូតធ្លាក់ផ្លូវក៏ជួបហេតុការណ៍នេះតែម្តង។

លោកបន្តថារថយន្តគ្រោះថ្នាក់ខាងលើជារបស់ក្រុមហ៊ុនហេងស្រេងហុងចំកាត់ដែលដឹកផ្ទាំងកញ្ចក់ជាច្រើនផ្ទាំងបែករាយប៉ាយពេញចិញ្ចើមផ្លូវក្នុងរថយន្តនោះមានមនុស្សចំនួន៤នាក់ម្នាក់ជាបើកបរ៣នាក់ទៀតជាកម្មកររួមដំណើររងរបួសទាំង៣នាក់ក្នុងនោះម្នាក់រងរបួសធ្ងន់រីឯអ្នកបើកបរពុំមានរងរបួសនោះឡើយ។

បច្ចុប្បន្នអ្នកទាំង៣នាក់ដែលជាជនរងរបួសត្រូវបានក្រុមគ្រូពេទ្យបង្អែកខេត្តដឹកបញ្ជូនមកព្យាបាលនៅមន្ទីពេទ្យខេត្ត។ លោកឡេងឈឿងភេទប្រុសអាយុ៣៣ឆ្នាំជាអ្នកបើកបរបានប្រាប់ថារូបលោកបានបើកបររថយន្តឲ្យក្រុមហ៊ុនខាងលើនេះអស់រយៈពេល៦ទៅ៧ឆ្នាំមកហើយពុំដែលមានបញ្ហារនេះកើតឡើងទេទើបតែថ្ងៃនេះរូបលោកបានធ្វើដំណើរមកកាន់ខេត្តនេះជាមួយស្ថានភាពផ្លូវបត់បែនឡើងភ្នំចុះភ្នំច្រើនពេកក៏ជួបហេតុការណ៍នេះតែម្តងទៅ៕ដោយៈ ស្រីផល