បណ្ដាញសហគមន៍ប្រជាពលរដ្ឋទូទាំងប្រទេសជិត ១ពាន់នាក់ ហែក្បួនបាតុកម្មអហិង្សាទាមទារឲ្យតុលាការកាត់ក្តីដោយយុត្តិធម៌។ ក្រុមបាតុករបញ្ជាក់ថា រយៈពេល ៥ឆ្នាំចុងក្រោយនេះ ក្រុមសកម្មជនការពារសិទ្ធិមនុស្ស ការពារដីធ្លី ធនធានធម្មជាតិជិត ៥០០នាក់ បានទទួលរងការគំរាមកំហែងពីសំណាក់ក្រុមឈ្មួញ អ្នកមានលុយ មានអំណាច ដោយប្រើប្រាស់ប្រព័ន្ធតុលាការបំភ្លៃរឿងក្តីជម្លោះដីធ្លី ទៅជាករណីបទល្មើសញុះញង់ ឆបោក និងការរំលោភកម្មសិទ្ធិឯកជនជាដើម។
ក្រុមប្រជាពលរដ្ឋ ជួបជុំគ្នានៅមុខក្រសួងយុត្តិធម៌ តាំងពីម៉ោងប្រាំពីរព្រឹក ដោយមានចងបូពណ៌ក្រហមនៅលើក្បាល សរសេរថា យើងត្រូវការយុត្តិធម៌។ ដៃលើកផ្ទាំងរូបភាពមួយចំនួន ស្ដីពីសកម្មភាពរំលោភបំពានដីធ្លី សមត្ថកិច្ចចុះបង្ក្រាបការតវ៉ា រូបភាពកម្លាំងប្រដាប់អាវុធបាញ់ទៅលើក្រុមពលរដ្ឋ និងសារសំខាន់ៗមួយចំនួនទៀតដែលមានខ្លឹមសារជំរុញឲ្យតុលាការកាត់ក្តីប្រកបដោយយុត្តិធម៌។ រូបភាពថ្ងៃទី១២ ខែមិថុនា ឆ្នាំ២០១៣ ដោយ វណ្ណ វិចារ
