ខេត្តបន្ទាយមានជ័យ ៖ មានអំពើហិង្សាដ៏រន្ធត់មួយកើតឡើងដោយបុរសម្នាក់ជាបុគ្គលិកពេទ្យ នៅមណ្ឌលសុខ ភាពឃុំម៉ាឡៃ ដែលមានតួនាទីជាអ្នកព្យាបាលសង្គ្រោះបន្ទាន់ និងជាអ្នកបើកបររថយន្តសង្គ្រោះបន្ទាន់ផងនោះ បានយកពូថៅកាប់ទៅលើប្រពន្ធ បណ្តាលឲ្យរងរបួសធ្ងន់ នៅពេលកូនស្រី២នាក់ទៀតចូលទៅជួយកាប់កូន ២នាក់ បណ្តាល ឲ្យរងរបួសធ្ងន់ដូចគ្នា ។ ហេតុការណ៍នេះ បានកើតឡើងនៅវេលាម៉ោង២រំលងអធ្រាត្រ ឈានចូលថ្ងៃទី០១ ខែមិថុនា ឆ្នាំ២០១៣ នៅភូមិត្រសេកជ្រុំ ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ ។
លោកវរសេនីយ៍ត្រី សៅ ប៊ុន អធិការនគរបាលស្រុកម៉ាឡៃ បានឲ្យដឹងថា ស្ត្រីរងគ្រោះជាប្រពន្ធ ឈ្មោះ យឿន លីណា អាយុ៤២ឆ្នាំ ត្រូវប្តីយកពូថៅកាប់ត្រូវចំក្បាលឆ្នែកខាងឆ្វេង បណ្តាលឲ្យរងរបួសជា ទម្ងន់ និងកូនស្រីរងគ្រោះឈ្មោះ សាន ដាណែន អាយុ២១ឆ្នាំ និងឈ្មោះសាន ស្រីណុត អាយុ១៣ឆ្នាំ ចំណែកបុរសជាប្តីដៃដល់មានឈ្មោះ សាន សារ៉េត អាយុ៥២ឆ្នាំ គ្រួសារនេះ មានទីលំនៅ ភូមិឃុំ ខាងលើ។
លោកអធិការបានបន្តទៀតថា ករណីអំពើហឹង្សាក្នុងគ្រួសារខាងលើនេះ បើតាមសមត្ថកិច្ចធ្វើការស្រាវជ្រាវ ទំនងជាប្តីប្រច័ណ្ឌប្រពន្ធ និងបញ្ហាលុយកាក់ផងដែរ ដោយកាលពីសប្តាហ៍មុន រវាងប្តីនិងប្រពន្ធបានឈ្លោះទាស់ទែងគ្នាម្តងរួចមកហើយ ប្រពន្ធមានភាពរាក់ទាក់ជាមួយអ្នកជិតខាង ហើយប្តីតែងប្រច័ណ្ឌឈ្លោះជាមួយប្រពន្ធជានិច្ចនៅ ពេលប្រពន្ធនិយាយជាមួយមនុស្សប្រុសអ្នកជិតខាងម្តងៗ ហើយគ្រួសារនេះ ឧស្សាហ៍ឈ្លោះគ្នាណាស់។
ក្រៅរឿងពីប្រច័ណ្ឌ ក៏គេសង្ស័យឈ្លោះគ្នាពីរឿងលុយកាក់ផងដែរ ដោយប៉ុន្មានថ្ងៃមុននេះ កូនប្រុសខាងប្តី ជាជនដៃដល់មកពីប្រទេសអូស្ត្រាលីមកលេងឪពុក ខណៈកូនប្រុសរូបនោះត្រឡប់ទៅវិញ ប្តីប្រពន្ធនេះ តែងតែមានជម្លោះជាមួយគ្នា ប៉ុន្តែមិនមានប្រើហឹង្សានោះទេ ។
មុនពេលកើតហេតុនៅពេលល្ងាច ប្តីប្រពន្ធនេះគ្រាន់តែទាស់ពាក្យសំដីគ្នាតិចតួចតែប៉ុណ្ណោះ លុះរហូតដល់យប់ជ្រៅ នៅមិនដឹងថាមានបញ្ហាអ្វី ទើបផ្ទុះហឹង្សាធ្ងន់ធ្ងរកើតឡើងយ៉ាងដូច្នេះ។
ប្រភពព័ត៌មានដដែលបានឲ្យដឹងទៀតថា ស្ត្រីរងគ្រោះនិងកូនស្រីរងគ្រោះទាំង០២នាក់បន្ទាប់ពីជនដៃដល់ជាប្តីនិងឪពុកវាយហើយ បានរត់ស្រែកទៅឲ្យអ្នកជិតខាងជួយទាំងឈាមហូរដាបពេញខ្លួន ហើយអ្នកជិតខាងបានផ្តល់ព័ត៌មានទៅសមត្ថកិច្ច បន្ទាប់មកសមត្តកិច្ចចុះជួយធ្វើអន្តរាគមន៍ ប៉ុន្តែនៅពេលសមត្ថកិច្ចមកដល់កន្លែងកើតហេតុ ប្តីរូបនោះបានបើករថយន្តសង្គ្រោះរបស់មណ្ឌលសុខភាព ឃុំម៉ាឡៃ រត់គេចខ្លួនបាត់ ហើយរថយន្តដែលជនដៃដល់បើកយកទៅជាមួយ គឺគេយកប្លុងចោលនៅមន្ទីរពេទ្យបង្អែកក្រុង ប៉ោយប៉ែត ។
នៅពេលនេះសមត្ថកិច្ចកំពុងតែស្រាវជ្រាវស្វែងរកចាប់ខ្លួនប្តីដៃដល់ ដើម្បីយកមកផ្តន្ទាទោស តាមផ្លូវច្បាប់។
គួរបញ្ជាក់ថា បុរសជនដៃដល់មុននឹងបានប្រពន្ធជាស្ត្រីរងគ្រោះ ធ្លាប់មានប្រពន្ធ មានទាំងកូនកំលោះ ក្រមុំ ហើយបានលែងលះគ្នា មកយកជាស្ត្រីរងគ្រោះបានកូនស្រីម្នាក់ ហើយប្រពន្ធ រងគ្រោះក៏ជាស្ត្រីមេម៉ាយមានកូនស្រីម្នាក់ផងដែរ ៕
+(1).jpg)
ប្រភពពី៖ cambodiapage.info
0 comments:
Post a Comment