.jpg)
ប្រជាពលរដ្ឋរស់នៅភូមិថ្មគោល សង្កាត់ចោមចៅ ខណ្ឌពោធិ៍សែនជ័យ ក្បែរព្រលានយន្តហោះអន្តរជាតិភ្នំពេញ ប្រមាណ ៥០នាក់ បានប្រមូលគ្នានៅមុខព្រលានយន្តហោះអន្តរជាតិភ្នំពេញ ទាមទារសុំឲ្យភាគីក្រុមហ៊ុន អេស.ស៊ី.អេ (S.C.A) ជាក្រុមហ៊ុនរបស់ប្រទេសបារាំង ចេញមកទទួលញត្តិរបស់ពលរដ្ឋ ស្នើសុំជួយដោះស្រាយបញ្ហាពង្រីកព្រលានយន្តហោះនេះ ដែលធ្វើឲ្យប៉ះពាល់លំនៅឋានរបស់ពួកគាត់។
តំណាងពលរដ្ឋនៃភូមិថ្មគោល លោកស្រី ច្រាយ នីម ឲ្យដឹងនៅកណ្ដាលហ្វូងអ្នកតវ៉ា និងកម្លាំងប៉ូលិសនាមុខព្រលានយន្តហោះអន្តរជាតិភ្នំពេញ នាថ្ងៃទី២២ ខែឧសភា ថា លោកស្រី និងពលរដ្ឋអញ្ជើញមកមុខព្រលានយន្តហោះអន្តរជាតិភ្នំពេញ ក្នុងបំណងឲ្យក្រុមហ៊ុន អេស.ស៊ី.អេ ដែលទទួលបានសិទ្ធិពង្រីកព្រលានយន្តហោះ ចេញមកទទួលញត្តិ និងដោះស្រាយចំពោះផលប៉ះពាល់ និងជួយផ្ដល់សំណងសមរម្យ។
លោកស្រីមានប្រសាសន៍ទៀតថា លោកស្រី និងពលរដ្ឋដទៃដែលបានចូលរួមក្នុងក្បួនដង្ហែដាក់ញត្តិ ហាក់អន់ចិត្តចំពោះសកម្មភាពរបស់ក្រុមហ៊ុនដែលមិនបង្ហាញពីភាពអើពើចំពោះដំណើររបស់ពលរដ្ឋ ដែលនាំគ្នាយ៉ាងសស្រាក់សស្រាំមកដាក់ញត្តិ និងទាមទារក្រុមហ៊ុនផ្ដល់សំណងតិចតួចដល់ពលរដ្ឋដែលរងផលប៉ះពាល់ពីការពង្រីកព្រលានយន្តហោះ។ សកម្មភាពដែលពលរដ្ឋនាំគ្នាយកញត្តិមកប្រគល់ឲ្យក្រុមហ៊ុននោះ ត្រូវកងកម្លាំងប៉ូលិសរាជធានីភ្នំពេញ រារាំង។
ប្រតិកម្មតបនឹងរឿងនេះ ស្នងការនៃរាជធានីភ្នំពេញ លោក ជួន សុវណ្ណ មានប្រសាសន៍ថា កម្លាំងដែលចុះមកហាមឃាត់ពលរដ្ឋនោះ ក្នុងបំណងការពារសណ្ដាប់ធ្នាប់សង្គម។ លោកមានប្រសាសន៍ទៀតថា ពលរដ្ឋមានសិទ្ធិធ្វើកូដកម្ម ឬស្វែងរកយុត្តិធម៌ដោយសុំឲ្យក្រុមហ៊ុន ឬអ្នកណាមួយដែលរំលោភសិទ្ធិពួកគាត់ ប៉ុន្តែពួកគាត់ក៏គិតដែរថា សកម្មភាពរបស់ពួកគាត់អាចធ្វើទៅវាប៉ះពាល់ដល់សិទ្ធិអ្នកដទៃដែរឬអត់។
អនុរដ្ឋលេខាធិការនៃអាកាសចរស៊ីវិល និងជាសមាជិកគណៈកម្មការត្រួតពិនិត្យការសាងសង់អាកាសយានដ្ឋានអន្តរជាតិភ្នំពេញ លោក សយ សំខាន់ មានប្រសាសន៍ថា ការងារដែលរដ្ឋាភិបាលកំពុងធ្វើនេះ គឺធ្វើឡើងដើម្បីតម្រូវតាមស្តង់ដារអន្តរជាតិ។ បន្ថែមលើនេះ លោក សយ សំខាន់ លើកឡើងថា បើសិនប្រទេសកម្ពុជា យើងមិនធ្វើតាមតម្រូវការនៃអង្គភាពអាកាសចរស៊ីវិលទេនោះ ស្ថាប័នអន្តរជាតិនេះនឹងដាក់ប្រទេសកម្ពុជា ក្នុងបញ្ជីខ្មៅ។ ដូច្នេះ ព្រលានយន្តហោះអន្តរជាតិភ្នំពេញ នឹងឈប់មានយន្តហោះឆ្លងកាត់ប្រទេសយើងជាពុំខាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
ប្រភព ពី RFA
0 comments:
Post a Comment