ភ្នំពេញ ៖ មនុស្សប្រុសស្រី៤នាក់បានរងរបួសធ្ងន់និងស្រាល ខណៈដែលពួកគេបានបើករថយន្តមួយគ្រឿងម៉ាកឡិចស៊ីសRX300 ដេញបុកម៉ូតូ១គ្រឿង បានជ្រុលទៅបុករថយន្តដឹកសំរាមពីក្រោយយ៉ាងពេញទំហឹង ស្របពេលនោះក៏មានរថយន្ត១គ្រឿងទៀតដែលបើកតាមក្រោយ ចាប់ហ្វ្រោំងមិនទាន់មកបុកពីក្រោយបន្ថែម បណ្ដាលឲ្យរថយន្តខូចខាតយ៉ាងដំណំ ។
ករណីគ្រោះថ្នាក់ចរាចរខាងលើនេះ បានកើតឡើងនៅវេលាម៉ោង១២និង៥៥នាទីរំលងអធ្រាត្រឈានចូលថ្ងៃទី២៩ ខែឧសភា ឆ្នាំ២០១៣ នៅចំណុចមុខហាងលក់សំលៀកបំពាក់យីហោ ហុងកុង តាមបណ្ដោយផ្លូវកម្ពុជាក្រោម ក្នុងសង្កាត់មិត្តភាព ខណ្ឌ៧មករា ។
តាមប្រភពព័ត៌មានពីសាក្សីនៅកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញរថយន្តបង្កម៉ាកឡិចស៊ីសRX300 ពណ៌ស ពាក់ស្លាកលេខភ្នំពេញ2O-0483 បើកបរដោយបុរសម្នាក់និងអ្នករួមដំណើរ៣នាក់ទៀតសុទ្ធតែស្រី តាមបណ្ដោយផ្លូវកម្ពុជាក្រោម ក្នុងទិសដៅពីលិចមកកើត ដេញបុកម៉ូតូមួយគ្រឿងមិនចាំម៉ាក ហើយមិនដឹងថាមានរឿងអ្វីនោះទេ លុះបើកដេញមកដល់ចំណុចកើតហេតុខាងលើ ក៏ជ្រុលចង្កូតទៅបុកនិងរថយន្តដឹកសំរាមរបស់ក្រុមហ៊ុនស៊ីនទ្រី ពីក្រោយពេញទំហឹង ខណៈនោះស្រាប់តែមានរថយន្តមួយគ្រឿងទៀតម៉ាកកាមរីបាឡែន គ្មានស្លាកលេខ ដែលបើកតាមក្រោយមកបុកពីក្រោយរថយន្តបង្កបន្ថែម ធ្វើឲ្យបុរសដែលបើករថយន្តបង្ករងរបួសធ្ងន់ ហើយត្រូវបានដឹកតាមរថយន្តសាមុយយកទៅសង្គ្រោះនៅមន្ទីពេទ្យកាលមែតភ្លាមៗ រីឯនារី៣នាក់ដែលរួមដំណើរជាមួយតរបួសស្រាល។
ក្រោយកើតហេតុគេឃើញមានបុរសម្នាក់ជិះម៉ូតូ១គ្រឿងម៉ាកមីអូ បានមកដល់កន្លែងកើតហេតុ ហើយបានអះអាងថា ជាសង្សាររបស់នារីម្នាក់ដែលរួមដំណើរជាមួយរថយន្តបង្ក ហើយបាននិយាយសំឡុតនិងគំរោមអ្នកកាសែត កុំឲ្យថតរូបស្រីស្នេហ៍របស់ខ្លួន និងរករឿងវាយអ្នកកាសែតថែមទៀតផង និង បាននិយាយទៀតថា ខ្លួនមានបងប្អូនជាអ្នកច្បាប់ បើកនៅតែថតគេនិងហៅបងប្អូនរបស់គេមកចាត់ការពួកអ្នកកាសែតទាំងអស់នេះ។
ក្នុងហេតុការណ៍គ្រោះថ្នាក់ចរាចរនេះដែរ សមត្ថកិច្ចដែលបានចុះទៅដល់កន្លែងកើតហេតុក៏បានធ្វើការឃាត់ខ្លួនបុរសដែលអះអាងថាខ្លួនមានបងប្អូនជាអ្នកច្បាប់ និងគំរោមអ្នកកាសែតនោះនាំមកអធិការដ្ឋាននគរបាលខណ្ឌ៧មករាដើម្បីសួរនាំ និងធ្វើកំណត់ហេតុ ។ចំណែករថយន្តទាំង៣គ្រឿងត្រូវនគរបាលចរាចរជើងគោកស្ទួចយកទៅរក្សាទុក ដើម្បីដោះស្រាយតាមក្រោយ ៕
___________ប្រភព ពី cambodiapage.info
0 comments:
Post a Comment