កំពង់ស្ពឺៈ កម្មករ ៧នាក់ក្នុងនោះមានកម្មការិនីមានផ្ទៃពោះម្នាក់ បានទទួលរងរបួស និងដួលសន្លប់នៅពេលពួកគេបានប៉ះទង្គិចគ្នាជាមួយនឹងសមត្ថកិច្ចប៉ូលីស នៅក្នុងការតវ៉ានៅមុខរោងចក្រកាត់ដេរ សារព្រីណា កាលពីព្រឹកថ្ងៃចន្ទនេះ។
តំណាងកម្មករ លោកសុន វណ្ណី បានឲ្យដឹងថា សមត្ថកិច្ចប៉ូលីស និងអាជ្ញាធរខេត្ត បានប្រើដំបងឆក់វាយទៅលើក្រុមកម្មករឲ្យរបួស និងមានខ្លះបានដួលសន្លប់។
លោកបាននិយាយថា «កម្មករបានទៅជួលមេក្រូ ដើម្បីធ្វើការស្រែកតវ៉ា បន្ទាប់មកខាងសមត្ថកិច្ចស្រុក បានរឹបអូសឧបករណ៍ទាំងនោះទៅរក្សាទុកក្នុងឡានពួកគេ។ ក្រោយមកកម្មករបានសុំយកមកវិញ ប៉ុន្តែខាងសមត្ថកិច្ចបានបដិសេដមិនប្រគល់ឲ្យមកវិញ»។
លោកបន្តថា ក្រុមកម្មករបានព្យាយាមបញ្ឈប់ឡានដែលទុកមេក្រូរបស់ពួកគេនោះ ទើបកម្មកររត់ទៅឃាត់ឡាននៅចំកណ្តាលទ្រូងផ្លូវជាតិលេខ ៤ បណ្តាលឲ្យកកស្ទះចរាចរណ៍ បន្ទាប់មកក្រុមសមត្ថកិច្ចក៏បានមកធ្វើការបំបែកពួកគេ។
លោកបញ្ជាក់ថា «វាជារឿងមិនគួរឲ្យជឿ ដែលសមត្ថកិច្ចមកវាយកម្មករ ព្រោះវាមិនមែនជារឿងធំ និងពួកយើងក៏គ្មានបំណងបិទផ្លូវដែរ។ យើងគ្រាន់តែចង់បានឧបករណ៍មកវិញទេ»។
កម្មកររាប់ពាន់នាក់នៅរោងចក្រសាព្រីណា ដែលស្ថិតនៅក្នុងខេត្តកំពង់ស្ពឺនេះ បានធ្វើការតវ៉ាអស់ជាង ពីរសប្តាហ៍មកហើយ ដើម្បីទាមទារប្រាក់ឈ្មួលអប្បរមា និងប្រាក់អត្ថប្រយោជន៍ផ្សេងទៀត។
ប្រភព ពី ភ្នំពេញប៉ុស្ត៍
0 comments:
Post a Comment