.jpg)
រាជធានីភ្នំពេញ ៖ យុវជនម្នាក់ត្រូវបានរងរបួសធ្ងន់ធ្ងរ ដោយសារតែត្រូវក្រុមចោរមួយក្រុមមានគ្នា៥នាក់ បានធ្វើសកម្មភាពបាញ់ប្លន់យកម៉ូតូមួយគ្រឿងម៉ាក សេ១១០ ពណ៌ខ្មៅ កាលពីវេលាម៉ោង ២និង០០នាទី រំលងអធ្រាត្រ ឈានចូលថ្ងៃទី២៩ ខែឧសភា ឆ្នាំ២០១៣ នៅចំណុចគល់ស្ពានដែក ផ្លូវ៣៧១ កែងផ្លូវមុនីរ៉េត ក្នុងសង្កាត់ស្ទឹងមានជ័យ ខណ្ឌមានជ័យ។
បើតាមការបញ្ជាក់ពីសមត្ថកិច្ចបានឲ្យដឹងថា យុវជនដែលរងគ្រោះក្នុងហេតុការណ៍បាញ់ប្លន់នោះមានឈ្មោះ សឿន សុជា ភេទប្រុស អាយុ២១ឆ្នាំ មុខរបរនៅផ្ទះ ស្នាក់នៅភូមិឫស្សី សង្កាត់ស្ទឹងមានជ័យ ខណ្ឌមានជ័យ ត្រូវរបួសចំត្រគាកខាងឆ្វេង។ ប្រភពដដែលបានបន្តទៀតថា មុនពេលកើតហេតុ យុវជនរងគ្រោះបាន ជិះម៉ូតូមួយគ្រឿងម៉ាកសេ១១០ ពណ៌ខ្មៅ ធ្វើដំណើរតាមបណ្តោយផ្លូវចំការដូង ក្នុងទិសដៅពីត្បូងមកជើង ខណៈមកដល់ចំណុចកើតហេតុខាងលើ ក៏ត្រូវក្រុមចោរមួយក្រុម ដែលមានគ្នា៥នាក់ ជិះម៉ូតូ២គ្រឿង មួយគ្រឿងម៉ាក អាយខុន ពណ៌ផ្កាឈូក និងមួយគ្រឿងទៀត ម៉ាកនិច មកអែបជិតយុវជនរងគ្រោះ រួចដកកាំភ្លើងខ្លីបាញ់រះ ទៅលើយុវជនរងគ្រោះ ចំនួន២គ្រាប់ បណ្តាលឲ្យរងរបួសធ្ងន់ធ្ងរ ហើយក្រុមចោរដណ្តើមម៉ូតូ របស់យុវជនរងគ្រោះ ជិះរត់គេចខ្លួន ប៉ុន្តែដោយមានឮសម្លេងគ្រាប់កាំភ្លើង បណ្តាលឲ្យផ្អើលឆោឡោ ដល់សមត្ថកិច្ច ដែលយាមនៅគោលដៅស្ពានរត់មកមើល ទើបក្រុមចោរ នាំគ្នាជិះម៉ូតូរត់គេចខ្លួន បាត់ស្រមោលភ្លាមៗ ។
ក្រោយពេលកើតហេតុ គេបានឃើញសមត្ថកិច្ចបានចុះទៅធ្វើការអន្តរាគមន៍ហៅឡានសង្គ្រោះ ដើម្បីដឹកយកជនរងគ្រោះទៅធ្វើការព្យាបាលនៅគ្លីនិកឯកជន និងបានយកម៉ូតូរបស់ជនរងគ្រោះទៅរក្សាទុក នៅប៉ុស្តិ៍នគរបាល ស្ទឹងមានជ័យ និងធ្វើកំណត់ហេតុស្រាវជ្រាវ តាមរកជនល្មើស ចាប់យកមកផ្តន្ទាទោសតាមច្បាប់៕
_________________________ប្រភព ពី cambodiapage.info
0 comments:
Post a Comment