ខេត្តស្ទឹងត្រែង ៖ មានហេតុការណ៍គ្រោះធម្មជាតិដ៏ចម្លែកមួយបានកើតឡើងក្នុងក្រុងស្ទឹងត្រែង ដោយសារតែមានខ្យល់ព្យុះភ្លៀងផ្គររន្ទះលាយឡំនិងដុំទឹកកកធ្លាក់ស្ទើរតែធ្លុះដំបូលផ្ទះ ដែលហេតុការណ៍នេះធ្វើឱ្យលំនៅដ្ឋានប្រជាពលរដ្ឋជាច្រើនខ្នងត្រូវបានរងខូចខាត។
ហេតុការណ៍គ្រោះធម្មជាតិនេះបានកើតឡើងកាលពីវេលាម៉ោងប្រមាណ៥និង១៥នាទីល្ងាច ថ្ងៃទី២៨ខែឧសភា ឆ្នាំ២០១៣ នៅកណ្តាលក្រុងស្ទឹងត្រែង។ ប្រជាពលរដ្ឋនៅក្នុងស្ទឹងត្រែងជាច្រើនពិតជាមានការភ័យតក់ស្លុតយ៉ាងខ្លាំង ព្រោះក្នុងខណៈនោះមានភ្លៀងព្យុះ និងខ្យល់បក់យ៉ាងខ្លាំង ធ្វើឲ្យដំបូលផ្ទះរបស់ពួកគាត់ត្រូវបានប៉ើងរសាត់ទៅតាមទៅខ្យល់។ អ្វីដែលធ្វើឲ្យប្រជាពលរដ្ឋចម្លែកចិត្តនោះ គឺដោយសារតែមានដុំទឹកកក ដែលមានទំហំជិតប៉ុនមេដៃ បានធ្លាក់មកយ៉ាងច្រើន ដែលហេតុការណ៍គឺជាលើកទី១ហើយដែលពួកគាត់បានជួប។
បើតាមការបញ្ជាក់ពីអាជ្ញាធរមូលដ្ឋានបានឲ្យដឹងថា នៅមុនពេលមានហេតុការណ៍ខាងលើនេះ គេបានឃើញមេឃខ្មៅងងឹតពីទិសខាងត្បូង បន្ទាប់មកក៏មានខ្យល់ព្យុះ បក់បោក បណ្តាលឲ្យដើមឈើ និងផ្ទាំងផ្សាយពាណិជ្ជកម្មជាច្រើន ត្រូវបានដួលរាបដល់ដី និងកើតទៅជាភ្លៀងធ្លាក់យ៉ាងខ្លាំង លាយនិងដុំទឹកកកមកជាមួយផងដែរ។
អាជ្ញាធរមូលដ្ឋាននៅមិនទាន់អាចប្រាប់ពីទំហំនៃការខាតបង់នោះទេ គ្រាន់តែដឹងថាលំនៅដ្ឋានប្រជាពលរដ្ឋជាច្រើនខ្នងត្រូវបានខូចខាត។ ចំណែកប្រជាពលរដ្ឋរងគ្រោះក៏មិនទាន់ដឹងថាមានគ្រោះថ្នាក់ដែរឬអត់ទេ តែបានលេចឮថាមានរន្ទះបាញ់ងាប់គោក្របីមួយចំនួនទៀតផង៕
ប្រភពពី វត្តភ្នំ
0 comments:
Post a Comment