តុលាការខេត្តស្វាយរៀង នៅព្រឹកថ្ងៃទី២១ ខែឧសភា បានសម្រេចលើកពេលសវនាការជំនុំជម្រះក្នុងសំណុំរឿងបាញ់កម្មកររោងចក្រកៅវ៉េ (Kaoway) ៣នាក់ អោយរងរបួស ដែលមានអតីតអភិបាលក្រុងបាវិត លោក ឈូក បណ្ឌិត ជាជនសង្ស័យ ដោយសំអាងថា អវត្តមានមេធាវីការពារជនជាប់ចោទ។
.jpg)
តុលាការខេត្តស្វាយរៀង នៅព្រឹកថ្ងៃទី២១ ខែឧសភា បានបើកសវនាការសំណុំរឿងអតីតអភិបាលក្រុងបាវិត តាមពេលកំណត់។ នៅក្នុងសវនាការគេឃើញមានវត្តមានជនរងគ្រោះ សហជីពកម្មករ អង្គការមិនមែនរដ្ឋាភិបាលជាតិ និងអន្តរជាតិ ដែលឃ្លាំមើលរឿងក្ដីនេះ។ ប៉ុន្តែគេពុំឃើញមានវត្តមានជនជាប់ចោទ លោក ឈូក បណ្ឌិត និងមេធាវីការពារលោកឡើយ។ ករណីនេះចៅក្រមជំនុំជម្រះសម្រេចមិនបន្តដំណើរការ នីតិវិធីសវនាការភ្លាមៗបន្ទាប់ពីបានដំណើររយៈពេលជិតមួយម៉ោង។
ចៅក្រមជំនុំជម្រះប្រកាសជាសាធារណៈពន្យារពេលសវនាការសំណុំរឿងបាញ់កម្មកររោងចក្រកៅវ៉េ (Kaoway) និងបានកំណត់យកថ្ងៃទី១២ ខែមិថុនា ជាថ្ងៃបើកសវនាការជាថ្មីទៀត។
ចៅក្រមជំនុំជម្រះ និងជាអនុប្រធានតុលាការខេត្តស្វាយរៀង លោក លាង សួគ៌ បានប្រកាសនៅក្នុងបន្ទប់សវនាការជាសាធារណៈចំពោះមុខជនរងគ្រោះតំណាងសហជីព និងអង្គការមិនមែនរដ្ឋាភិបាលដែលឃ្លាំមើលសវនាការថា មេធាវីការពារជនជាប់ចោទ គឺកញ្ញា ម៉ៅ សំវុទ្ធារី បានដាក់ពាក្យសុំពន្យារពេលសវនាការដោយមូលហេតុជាប់បំពេញបេសកកម្មនៅប្រទេសជប៉ុន។
លោកចៅក្រម លាង សួគ៌ បន្តថា លោកសម្រេចលើកពេលសវនាការ ដើម្បីទុកសិទ្ធិអោយមេធាវី និងម្យ៉ាងជនជាប់ចោទ ឈូក បណ្ឌិត ជាតួអង្គសំខាន់ក្នុងសវនាការបែរជាពុំមានវត្តមានដែរ។
ជនរងគ្រោះ តំណាងសហជីព និងអង្គការមិនមែនរដ្ឋាភិបាលបានខកចិត្តចំពោះការលើកពេលនេះ និងបានហៅការពន្យារពេលសវនាការថា ពុំបានឈរលើហេតុផលត្រឹមត្រូវ។
ជនរងគ្រោះលោកស្រី កែវ នា មានប្រសាសន៍ថា នាងបានរង់ចាំយុត្តិធម៌ជាង ១ឆ្នាំមកហើយ មកដល់ពេលនេះនាងនៅមានសង្ឃឹមតិចតួចប៉ុណ្ណោះ។ នាងទទូចអោយតុលាការរកយុត្តិធម៌អោយពួកនាង ដែលជាជនរងគ្រោះក្រីក្រ គ្មានអំណាច។
កាលពីថ្ងៃទី៤ មីនា សាលាឧទ្ធរណ៍បានចោទប្រកាន់លោក ឈូក បណ្ឌិត ជាអភិបាលក្រុងបាវិត ពីបទបង្ករបួសស្នាមដោយអចេតនាតាមក្រមព្រហ្មទណ្ឌមាត្រា ២៣៦ ហើយបញ្ជូនសំណុំរឿងនេះទៅសាលាដំបូងខេត្តស្វាយរៀង ដើម្បីជំនុំជម្រះតាមផ្លូវច្បាប់។ ករណីនេះប្រសិនបើរកឃើញថា មានកំហុសជនល្មើសអាចជាប់ពន្ធនាគារពី ៦ខែ ដល់ ២ឆ្នាំ និងពិន័យជាប្រាក់ពី ១លានរៀល ទៅ ៤លានរៀល។
ប្រធានសហជីពសេរីកម្មករនៃព្រះរាជាណាចក្រកម្ពុជា លោក ជា មុនី មានប្រសាសន៍ថា លោកនៅតែមើលឃើញថា យុត្តិធម៌នៅតែពិបាកត្រូវគេផ្ដល់អោយក្រុមកម្មកររងគ្រោះ។
លោក អំ សំអាត អ្នកស៊ើបអង្កេតជាន់ខ្ពស់នៃអង្គការការពារសិទ្ធិមនុស្សលីកាដូ មានប្រសាសន៍នៅក្នុងសន្និសីទសារព័ត៌មាននៅខាងមុខតុលាការខេត្តស្វាយរៀងថា លោក ឈូក បណ្ឌិត ទំនងភ័យខ្លាចថាគាត់អាចនឹងមានបញ្ហានៅពេលប្រឈមមុខចំពោះមុខច្បាប់ ទើបរកលេសដើម្បីពន្យារពេល។ យ៉ាងណា លោកសង្ឃឹមថា តុលាការនឹងមិនទុកអោយសំណុំរឿងនេះអូសបន្លាយពេលបន្ថែមទៀតទេ។
កម្មការិនីនៃរោងចក្រកៅវ៉េ ៣នាក់ ត្រូវបាញ់អោយរបួសនៅក្នុងពេលកម្មករជាច្រើនពាន់នាក់ធ្វើកូដកម្មកាលពីថ្ងៃទី២០ ខែកុម្ភៈ ឆ្នាំ២០១២ ដើម្បីទាមទារដំឡើងប្រាក់ឈ្នួល និងផ្លាស់ប្ដូរលក្ខខណ្ឌការងារមួយចំនួនទៀត។ ក្នុងនោះ អ៊ុន ចិន្តា ឬ ប៊ុន ចិន្តា ត្រូវបាញ់ចំទ្រូងខាងឆ្វេងធ្លុះទៅខ្នង កែវ នា របួសដៃ និង ប៊ុត សាខន របួសខ្នង៕
ប្រភព ពី RFA
0 comments:
Post a Comment