មូលនិធិអង្គការ Kokusai Kjo ជប៉ុនបានផ្ដល់កង់ជាង១ម៉ឺនគ្រឿងជូនសិស្សក្រីក្រនៅទូទាំងប្រទេសកម្ពុជា

9:33 PM

ភ្នំពេញ ៖ លោក Masahiro Sano ប្រធានមូលនិធិអង្គការ KoKusai Kjo ជប៉ុន បានជម្រាបនៅក្នុងជំនួបពិភាក្សា ជាមួយលោកខៀវ កាញារីទ្ធ រដ្ឋមន្ដ្រី ក្រសួងព័ត៌មាន កាលពីថ្ងៃទី៧ ខែសីហា ឆ្នាំ២០១៣ នៅទីស្ដីការក្រសួងថា មូល និធិអង្គការ Kokusai Kjo បាននាំកង់ ដែលគេប្រើមួយទឹកហើយចំនួនជាង១ម៉ឺន គ្រឿងពីប្រទេសជប៉ុន មកចែកជូនដល់ សិស្សក្រីក្រនៅទូទាំងប្រទេសកម្ពុជា ដែលក្នុងចំណោមកង់ជាង១ម៉ឺនគ្រឿង នោះមូលនិធិអង្គការ Kokusai Kjo បាន ផ្ដល់តាមរយៈក្រសួងព័ត៌មានចំនួនជាង ៨០០កង់ ដើម្បីយកទៅចែកដល់សិស្ស ក្រីក្រនៅស្រុកកោះសូទិន ខេត្ដកំពង់ចាម និងស្រុកជុំគីរី ខេត្ដកំពត ។

លោកប្រធានមូលនិធិបានជម្រាប ទៀតថា អង្គការរបស់លោកក្រៅពីចែក កង់នៅកម្ពុជា ក៏បាននាំយកកង់ទៅចែក ជូនដល់សិស្សក្រីក្រនៅប្រទេសថៃជាង ៤ម៉ឺនគ្រឿងផងដែរ ហើយជាបន្ដបន្ទាប់ មូលនិធិអង្គការ Kokusai Kjo នឹងនាំយក នូវកង់បន្ថែមទៀតមកចែកជូនដល់ សិស្សក្រីក្រនៅកម្ពុជាជាជំហានទី២ ។

នៅក្នុងខែវិច្ឆិកា ឆ្នាំ២០១៣ខាងមុខនេះ លោក MASA TAKA YAMAMOTO ប្រធានមូលនិធិចំណតកង់របស់ជប៉ុន នឹងមកប្រទេសកម្ពុជា ហើយសុំអនុញ្ញាត ចូលជួបលោករដ្ឋមន្ដ្រី ខៀវ កាញារីទ្ធ ដើម្បីពិភាក្សាថាតើនៅពេលអង្គការ យកកង់មកចែកជូនកុមារក្រីក្រអនាថា នៅតំបន់ណាខ្លះដើម្បីពួកគេទទួលបានកង់។

លោករដ្ឋមន្ដ្រី ខៀវ កាញារីទ្ធ បាន ថ្លែងអំណរគុណយ៉ាងជ្រាលជ្រៅចំពោះ សកម្មភាពមនុស្សធម៌របស់មូលនិធិ អង្គការ Kokusai Kjo ដែលបាននាំយក កង់ជាច្រើនគ្រឿងចែកជូនដល់សិស្សក្រីក្រ កំពុងសិក្សានៅតាមទីជនបទដែលទាំង នេះជាការចូលរួមចំណែកលើកទឹកចិត្ដ ដល់សិស្សក្រីក្រទាំងនោះឱ្យខិតខំរៀន សូត្របន្ថែមទៀត ។ លោករដ្ឋមន្ដ្រីក៏ បានគាំទ្រនូវសកម្មភាពរបស់មូលនិធិ អង្គការ Kokusai Kjo ដែលមានបំណង នាំកង់ជាច្រើនទៀតមកបន្ដចែកជូនដល់ សិស្សក្រីក្រនៅកម្ពុជាដើម្បីឱ្យពួកគេមាន មធ្យោបាយធ្វើដំណើរទៅសាលារៀនបាន ទាន់ពេលវេលា និងជាការលើកទឹកចិត្ដ ឱ្យពួកគេប្រឹងប្រែងរៀនសូត្របានពូកែ ដោយមិនបោះបង់ការសិក្សា ។

នៅក្នុងឱកាសជួបពិភាក្សានោះលោក រដ្ឋមន្ដ្រី ខៀវ កាញារីទ្ធ បានប្រគល់ ប្រកាសនីយបត្រគ្រឿងឥស្សរិយយស មុនីសារាភ័ណ្ឌរាជរដ្ឋាភិបាលកម្ពុជា ជូនលោក Masahir Sano ដើម្បីតបស្នង នូវសកម្មភាពដ៏ល្អប្រពៃ ដោយបាននាំ យកកង់ និងជួយសាងសង់សាលារៀន សម្រាប់សិស្សក្រីក្រនៅកម្ពុជា ៕