ការវិវឌ្ឍមួយដែលគណបក្សប្រជាជនកម្ពុជាទំនងជាគិតមិនដល់

គណបក្សប្រជាជនកម្ពុជាដែលកាន់អំណាចជាង ៣០ឆ្នាំ ត្រូវបានគេចាត់ទុក ឬចាត់ទុកខ្លួនឯងថា ជាគណបក្សចំណាស់ជាងគេមួយដែលមានបទពិសោធន៍រឹងមាំក្នុងការដឹកនាំប្រទេស។ គណបក្សនេះមានបណ្តាញបក្សក៏ដូចជាបណ្តាញផ្នែករដ្ឋបាលតាំងពីថ្នាក់លើរហូតដល់ថ្នាក់ក្រោម។ បណ្តាញរឹងមាំ ថវិកាសម្បូរបែប និងអំណាចពេញដៃ គឺជាអំណោយផលដល់ការយកប្រៀបទៅលើគូប្រជែង។ ប៉ុន្តែ អ្វីដែលគណបក្សនេះគិតមិនដល់ឬក៏មើលស្រាលនោះគឺការអភិវឌ្ឍផ្នែកគំនិតរបស់ប្រជាពលរដ្ឋដែលធ្វើឲ្យប្រព័ន្ធដឹកនាំរបស់ខ្លួនលែងសូវមានប្រសិទ្ធភាព។

ទោះបីជាលទ្ធផលផ្លូវការនៃការបោះឆ្នោតនៅមិនទាន់ចេញក៏ដោយ ក៏ប៉ុន្តែ គេពិតជាអាចនិយាយបានថា គណបក្សប្រជាជនកម្ពុជាបានស្រុតចុះប្រជាប្រិយភាពយ៉ាងខ្លាំងសម្រាប់ការបោះឆ្នោតលើកនេះ។ ពីគណបក្សមួយដែលធ្លាប់តែមានអំនួតថាខ្លាំង«គ្មានគូប្រៀប» ប៉ុន្តែ គណបក្សប្រជាជនកម្ពុជាបានស្គាល់ស្ថានភាពផ្លាស់ប្តូរមួយដែលគណបក្សនេះមិនបានរង់ចាំពោលគឺ ការបោះឆ្នោតកាលពីថ្ងៃ ២៨ កក្កដា កន្លងទៅ ជាសញ្ញាអាសន្នយ៉ាងពិតប្រាកដសម្រាប់គណបក្សប្រជាជនកម្ពុជា។

មានហេតុផលច្រើនណាស់ដែលគេអាចលើកមកពន្យល់ពីការស្រុតចុះប្រជាប្រិយភាពរបស់គណបក្សកាន់អំណាចមួយនេះ ហើយបញ្ហាទាំងនោះត្រូវបានគេមើលឃើញគ្រប់គ្នា។ ប៉ុន្តែ ចំណុចសំខាន់មួយដែលគួរតែពិចារណានៅពេលនេះគឺ ការអភិវឌ្ឍផ្នែកគំនិតរបស់ប្រជាពលរដ្ឋខ្មែរតាមរយៈប្រព័ន្ធព័ត៌មានសម័យទំនើបក្នុងបរិបទនៃការរីកលូតលាស់ខាងប្រជាធិបតេយ្យនៅកម្ពុជា។ ការវិវឌ្ឍដ៏ស្ងាត់ស្ងៀមនេះបានធ្វើឲ្យប្រព័ន្ធដឹកនាំរបស់គណបក្សប្រជាជនកម្ពុជាអស់ប្រសិទ្ធភាពបន្តិចម្តងៗប្រៀបបានទៅនឹងមេរោគដែលចូលទៅបំផ្លាញប្រព័ន្ធការពាររាងកាយរបស់មនុស្សឲ្យចុះខ្សោយដោយមិនដឹងខ្លួនយ៉ាងដូច្នោះដែរ។

គណបក្សប្រជាជនកម្ពុជាត្រូវគេមើលឃើញថា ជាគណបក្សដ៏ចំណាស់មួយ គឺចំណាស់ទាំងអាយុកាលបក្ស ទាំងអ្នកដឹកនាំ និងទាំងរបៀបដឹកនាំ។ ជាទូទៅ គណបក្សនេះប្រើរបៀបគ្រប់គ្រងមនុស្សតាមបែបចាស់ដែលអាចនិយាយថា«ហួសសម័យ» ក៏ថាបាន ពោលគឺជា ការគ្រប់គ្រងដោយប្រើឥទ្ធិពល និងមនោគមន៍វិជ្ជា។ ការដឹកនាំបែបនេះ មានប្រសិទ្ធភាព តែក្នុងកាលៈទេសៈមួយតែប៉ុណ្ណោះ។

ប៉ុន្តែ រយៈពេលចុងក្រោយនេះពោលគឺ បន្ទាប់ពី២០ឆ្នាំនៃនយោបាយប្រជាធិបតេយ្យសេរី ពហុបក្ស សកម្មភាពរបស់បក្សនយោបាយ និងសង្គមស៊ីវិល បានជ្រៀតចូលជាបណ្តើរៗដល់ស្រទាប់មហាជន ជាពិសេសតាមរយៈប្រព័ន្ធបច្ចេកវិជ្ជាទំនើប និងប្រព័ន្ធផ្សព្វផ្សាយឯករាជ។ ចុងក្រោយនេះ ការរីកដុះដាលនៃបណ្តាញសង្គមបានចូលរួមចំណែកយ៉ាងសំខាន់មួយទៀតទៅក្នុងស្រទាប់មហាជនជាពិសេសគឺស្រទាប់យុវវ័យ។

ទាំងនេះគឺជាកាតាលីកដែលជំរុញឲ្យមានការវិវឌ្ឍផ្នែកស្មារតីគួរឲ្យកត់សម្គាល់ក្នុងចំណោមប្រជាពលរដ្ឋខ្មែរ។ ពួកគេទទួលបានព័ត៌មានកាន់តែច្រើន និងហ៊ានសម្រេចិត្តដោយខ្លួនឯងច្រើនជាងមុន ទោះជាដោយចំហក្តី ឬដោយសម្ងាត់ក្តី។ អ្វីដែលគេបានឃើញក្នុងយុទ្ធនាការឃោសនារកសំឡេងឆ្នោតកាលពីពេលថ្មីៗកន្លងទៅនេះ និងលទ្ធផលបោះឆ្នោតពេលនេះគឺជាភស្តុតាងជាក់ស្តែង។

ពិតណាស់ថា មេដឹកនាំគណបក្សប្រជាជនកម្ពុជាមិនមែនមើលមិនឃើញបញ្ហានេះទេ ប៉ុន្តែ ភាពអសកម្ម និងហួសសម័យកើតឡើងជាពិសេសនៅថ្នាក់មូលដ្ឋាន។ អាជ្ញាធរគ្រប់លំដាប់ថ្នាក់ដែលមានទម្លាប់ដឹកនាំបែបចាស់គំរឹលបានបង្កភាពអសកម្មជាច្រើនទៅលើប្រជាពលរដ្ឋរបស់ខ្លួន។ ការបណ្តែតបណ្ដោយ ឬក៏មិនអាចគ្រប់គ្រងបានពីសំណាក់ថ្នាក់លើ ជាឱកាសដែលធ្វើឲ្យកំហុសឆ្គងរបស់មន្ត្រីអាជ្ញាធរកាន់តែកើតមានច្រើនឡើងជាលំដាប់។

ដូច្នេះ នៅពេលដែលប្រជាជនទទួលបានការអភិវឌ្ឍផ្នែកស្មារតីកាន់តែច្រើន ពួកគេក៏ផ្តើមបញ្ចេញប្រតិកម្មតបវិញ តាមរយៈការប្រើសិទ្ធិនានា ជាពិសេសគឺសិទ្ធិបោះឆ្នោតតែម្តង។ សិទ្ធិទាំងនោះហើយដែលធ្វើឲ្យការដឹកនាំដោយប្រើឥទ្ធិពលនិងមនោគមន៍វិជ្ជាលែងសូវមានប្រសិទ្ធភាព។ នេះជាចំណុចឫសគល់សំខាន់មួយក្នុងចំណោមបញ្ហាជាច្រើនទៀតដែលធ្វើឲ្យគណបក្សកាន់អំណាចចុះខ្សោយប្រជាប្រិយភាព។

សម្រាប់ក្រសែភ្នែកក្រុមអ្នកវិភាគ អំណឹះតទៅ គណបក្សប្រជាជនកម្ពុជាត្រូវការកែទម្រង់ដ៏ស៊ីជម្រៅមួយជាចាំបាច់ ទាំងគោលនយោបាយ ទាំងធនធានមនុស្ស និងទាំងទស្សនៈវិជ្ជាក្នុងការដឹកនាំ។ កំណែទម្រង់នោះមានន័យជាការបញ្ចូលឈាមថ្មីដើម្បីឲ្យគណបក្សនេះប្រែរូបភាពទៅជាគណបក្សដែលមានថាមពលរស់រវើក និងទាន់សម័យសមស្របតាមការវិវឌ្ឍខាងគំនិតរបស់ប្រជាពលរដ្ឋដោយមិនភ្លេចក្រឡេកមើលបរិបទអន្តរជាតិ។

សូមកុំភ្លេចថា ក្នុងសង្គមប្រជាធិបតេយ្យ និងសម័យសកលភាវូបនីយកម្ម គេមិនអាចគ្រប់គ្រងគំនិតគិតគូររបស់មនុស្សទៅតាមការចង់បានរបស់អ្នកដឹកនាំបានទេ ផ្ទុយទៅវិញ អ្នកដឹកនាំ ត្រូវព្យាយាមតម្រូវចិត្តប្រជាពលរដ្ឋម្ចាស់ឆ្នោត។ នេះគឺជាចរន្តសត្យានុម័តដែលអ្នកនយោបាយមិនអាចដើរបញ្ច្រាសបានឡើយ៕

ប្រភពពី វិទ្យុបារាំង

ការវិវឌ្ឍមួយដែលគណបក្សប្រជាជនកម្ពុជាទំនងជាគិតមិនដល់

0 comments:

Post a Comment