ក្នុងរយៈពេលប៉ុន្មានថ្ងៃថ្មីៗនេះ មានលេចចេញពាក្យចចាមអារាម និងលិខិតអានាមិកជាច្រើនត្រូវបានផ្សព្វផ្សាយ ដោយប្រើឈ្មោះគណបក្សសង្គ្រោះជាតិ ក្នុងគោលបំណងបំពុលបរិយាកាស ដែលអាចបង្កឲ្យមានអស្ថិរភាព និងភាពចលាចលផ្សេងៗនៅក្នុងសង្គម ដូចជាមានការប្រកាសថា ឲ្យកម្មករទៅបើកប្រាក់ខែចំនួន ១៥០ ដុល្លារអាមេរិក ពីគណបក្សសង្គ្រោះជាតិជាដើម… ។ល។
ឆ្លើយតបទៅនឹងពាក្យចចាមអារាម និងលិខិតអនាមិកដែលមានចរិតមួលបង្កាច់ និងញុះញង់បង្កចលាចលក្នុងសង្គមទាំងនោះ នៅថ្ងៃទី ០១ ខែសីហា ឆ្នាំ២០១៣នេះ គណបក្សសង្គ្រោះជាតិបានចេញសេចក្តីប្រកាសព័ត៌មានបដិសេធចោលទាំងស្រុងដោយគណបក្សសង្គ្រោះជាតិចាត់ទុកថា គឺជាចេតនារបស់ក្រុមជនទុច្ចរិត ដែលមានបំណងបង្ខូចកេរ្តិ៍ឈ្មោះ និងកិត្តិយសរបស់គណបក្សសង្គ្រោះជាតិ។
សេចក្តីប្រកាសព័ត៌មានរបស់គណបក្សសង្គ្រោះជាតិបានបញ្ជាក់ថា រាល់លិខិតស្នាម ឬឯកសារផ្លូវការទាំងអស់របស់គណបក្សសង្គ្រោះជាតិ គឺត្រូវបានផ្សព្វផ្សាយតាមវិទ្យុកម្មវិធីសំឡេងសង្គ្រោះជាតិ គេហទំព័ររបស់គណបក្ស «nationalrescueparty.org» និង Facebook របស់គណបក្ស «www.facebook.com/cnrparty» ។ ការផ្សព្វផ្សាយទាំងឡាយណាផ្សេងពីនេះគឺមិនមែនជាឯកសារ ឬលិខិតស្នាមផ្លូវការរបស់គណបក្សសង្គ្រោះជាតិទេ។
ទន្ទឹមនិងនេះ គណបក្សសង្គ្រោះជាតិក៏បានអំពាវនាវដល់បងប្អូន ជនរួមជាតិ ជាពិសេសយុវជន យុវតី មេត្តាកុំចាញ់បោក និងធ្លាក់ចូលក្នុងអន្ទាក់នៃការញុះញង់ កុហកបោកប្រាស់របស់ក្រុមជនទុច្ចរិតទាំងនោះឲ្យសោះ ហើយគណបក្សសង្គ្រោះជាតិសូមអំពាវនាវឲ្យអាជ្ញាធរមានសមត្ថកិច្ចចាត់វិធានការជាបន្ទាន់ក្នុងការស៊ើបអង្កេតស្រាវជ្រាវរកមុខជនទុច្ចរិតដែលបង្កចលាចលក្នុងសង្គមទាំងអស់នោះ និងអ្នកនៅពីក្រោយខ្នង ដើម្បីយកមកផ្តន្ទាទោសតាមច្បាប់ជាធរមាន៕
ប្រភពពី ដើមត្នោត
Read more: http://www.cambodiapage.info/kh/
0 comments:
Post a Comment