លោកសួន សេរីរដ្ឋា ប្រធានចលនាអំណាចពលរដ្ឋខ្មែរ និងគណបក្សសង្គ្រោះជាតិ បានថ្កោលការចាប់ខ្លួនយុវជនបួននាក់ ដោយសមត្ថកិច្ចកាលពីថ្ងៃទ១៥ ខែសីហានោះថាជាទង្វើរំលោភបំពានយ៉ាងធ្ងន់ធ្ងរដល់សិទ្ធិបុគ្គល និងសិទ្ធិសេរីភាព សម្តែងមតិរបស់ប្រជាពលរដ្ឋ ដែលត្រូវបានធានាដោយច្បាប់ និងរដ្ឋធម្មនុញ្ញនៃប្រទេសកម្ពុជា ។
ការថ្កោលទោសនេះបានធ្វើឡើងនៅថ្ងៃទី១៨ សីហា គឺនៅមួយថ្ងៃបន្ទាប់ពីព័ត៌មានស្តីការចាប់ខ្លួនយុវជនទាំងបួននាក់ បានត្រូវផ្សព្វផ្សាយ។
យុវជនបួននាក់ ដែលក្នុងនោះរួមមានយុវជនពីររូប និងយុវតីពីររូប ត្រូវបានចាប់ខ្លួនដោយសមត្ថកិច្ចនៅទីក្រុងភ្នំពេញ ដោយចោទពីបទញុះញុងកងម្លាំងប្រដាប់អាវុធអោយបង្កចលាចលក្នុងប្រទេស បន្ទាប់ពីពួកគេធ្វើសកម្មភាពចែកផ្កា ទឹកក្រូច និងទឹកសុទ្ធ ជូនកងទ័ព ដែលត្រូវរដ្ឋាភិបាលចល័តចូលក្នុងរាជធានីភ្នំពេញ ។
លោកសួន សេរីរដ្ឋា បានហៅសកម្មភាពរបស់យុវជនទាំងនេះថា ជាសកម្មភាពមនុស្សធម៌សុទ្ធសាធ ។ លោកបានចោទត្រឡប់ទៅវិញថា មានតែអ្នកដែលប្រើប្រាស់យុទ្ធភ័ណ្ឌយោធា និងកម្លាំងប្រដាប់អាវុធទេ ដែលត្រូវចោទថា ជាអ្នកបង្ករការភ័យខ្លាច និងចលាចលនៅក្នុងប្រទេស ។
«បើប្រើពាក្យថា ញុះញង់កងទ័ព គឺ ហ៊ុន សែន ទើបជាអ្នកដែលញុះញង់កងទ័ពនិងកងកម្លាំងប្រដាប់អាវុធអោយមកពាក់មុខបង្ហូរឈាមពលរដ្ឋខ្មែរ ។ ព្រោះការញុះញង់កងទ័ពអោយធ្វើសង្គ្រាមនេះ គឺ ហ៊ុន សែន បាន និយាយច្រើនលើកច្រើនសារណាស់តាំងពីមុនការបោះឆ្នោតបង្គ្រប់កិច្ច មកម៉្លេះ» សំណេររបស់លោក សួន សេរីរដ្ឋា ឆ្លើយតបនឹងសំណួរទាក់ទងទៅនិងការចាប់ខ្លួនយុវជនទាំងបួននាក់នេះ ។
ចំពោះអក្សរដែលសរសេរអំពាវនាវទៅកាន់កងកម្លាំងប្រដាប់អាវុធតម្រង់ទៅជនផ្តាច់ការនោះ លោកសួន សេរីរដ្ឋា បានបកស្រាយពន្យល់ថា៖ «សាររបស់ខ្ញុំក្នុង បាច់ផ្កាដែលជូនកងទ័ព គឺជាសារដើម្បីសន្តិភាព និងដើម្បីពន្យល់ កងទ័ព កងកម្លាំងប្រដាប់អាវុធ អោយបានដឹងយកទៅគិតពិចារណា ថា តើចុងអាវុធត្រូវបែរទៅគំរាមពលរដ្ឋស្លូតត្រង់ ឬក៏ត្រូវតែបែរតំរ៉ងទៅ ជនផ្តាច់ការដែលល្មោភអំណាច?»។
នៅស្របពេលជាមួយគ្នានេះ គណបក្សសង្រ្គោះជាតិ ក៏បានចេញសេចក្តីថ្លែងការណ៍ថ្កោលទោសការចាប់ខ្លួនយុវជនទាំងបួនរូប ដោយទទូចអោយមានការដោះលែងបន្ទាន់ ។
«គណបក្សសង្រ្គោះជាតិ សូមអោយអាជ្ញាធរមានសមត្ថកិច្ច ដោះលែងយុវជនទាំង៤នាក់ជាបន្ទាន់ និងដោយគ្មានលក្ខខណ្ឌ ដើម្បីអោយពួកគេមានសេរីភាពបានមកជួបជុំគ្រួសារ និងបន្តការសិក្សារបស់ពួកគេវិញ» ។
គណបក្សសង្គោះជាតិ ក៏បានអំពាវនាវអោយរដ្ឋាភិបាលបញ្ឈប់សកម្មភាពគម្រាមកំហែងប្រជាពលរដ្ឋតាមគ្រប់រូបភាព ដូចជាការចល័តទ័ព ការចាប់ខ្លួន និងការបង្ខិតបង្ខំនានា ។
គេនៅមិនទាន់ឃើញប្រតិកម្មពីរាជរដ្ឋាភិបាលកម្ពុជាជុំវិញការចោទប្រកាន់ទាំងនេះ នៅឡើយទេ ។ ប៉ុន្តែអគ្គស្នងការនគរបាលជាតិ បានចេញសេចក្តី ជូនដំណឹងកាលពីថ្ងៃទី១៧ សីហា ស្តីពីការចាប់ខ្លួនយុវជនទាំងបួនរូប នោះគឺធ្វើឡើងនៅបន្ទាប់ពីយុវជនទាំងនោះបានផលិត និងចែកចាយខិតប័ណ្ណ តាមបញ្ជារបស់ឈ្មោះសួន សេរីរដ្ឋា ប្រធានចលនាអំណាចពលរដ្ឋខ្មែរ ដែលធ្លាប់កសាងកម្លាំងប្រដាប់អាវុធខុសច្បាប់ ហើយដែលត្រូវបានតុលាការចេញដីការចាប់ខ្លួនពីបទញុះញុងអោយប្រព្រឹត្តបទឧក្រិដ្ឋ ។
យោងតាមសេចក្តីប្រកាសដដែល អគ្គស្នងការនគរបាលជាតិ បានបញ្ជាក់ថា សកម្មភាពផលិត និងចែកខិតប័ណ្ណ គឺមិនមែនជាសិទ្ធិសេរីភាពផ្នែកនយោ បាយ ដែលគ្របដណ្តប់ដោយច្បាប់របស់កម្ពុជានោះទេ ផ្ទុយទៅវិញវាជាបទល្មើសផ្នែកព្រហ្មទណ្ឌ ដែលត្រូវផ្តន្ទាទោសតាមច្បាប់ព្រហ្មទណ្ឌថ្មី ។
ប្រភពព័ត៌មានចុងក្រោយ បានអោយដឹងថា តុលាការបានសម្រេចឃុំខ្លួនយុវជនទាំងបួនរូបនោះជាបណ្តោះអាសន្នហើយ នៅព្រឹកថ្ងៃទី១៨ សីហានេះ ។
យុវជនទាំង៤នាក់ដែលត្រូវបានសមត្ថកិច្ចចាប់ខ្លួនរួមមានឈ្មោះ ទី១. ឈ្មោះ ទុត ច័ន្ទបញ្ញា ភេទប្រុស ទី២ឈ្មោះ ហ៊ុយ បូរិន ភេទប្រុស ទី៣ ឈ្មោះ ឡុង លីផេង ភេទស្រី និង ទី៤ ឈ្មោះ សុខ ដាលិន ភេទស្រី ។ អ្នកទាំង៤ត្រូវបានចាប់ខ្លួនកាលពីថ្ងៃទី១៥ ខែសីហា ឆ្នាំ២០១៣ ៕
ប្រភពពី Free Press Magazine
Read more: http://www.cambodiapage.info/?p=10998#ixzz2cKkzkB5r
0 comments:
Post a Comment