នៅទីបំផុតទៅគណៈកម្មាធិការជាតិរៀបចំការបោះឆ្នោត(គ.ជ.ប) បានសម្រេចបង្កើតគណៈកម្មការចម្រុះ ស៊ើបអង្កេតករណីភាពមិនប្រក្រតីនៃការបោះឆ្នោតជ្រើសតាំងតំណាងរាស្ដ្រ នីតិកាលទី៥ហើយ។
ការសម្រេចបែបនេះ គឺធ្វើឡើងបន្ទាប់ ពីមានជំនួបរវាងមន្ដ្រីគណៈកម្មាធិការជាតិរៀបចំការបោះឆ្នោត(គ.ជ.ប) ជាមួយតំណាងគណបក្សប្រជាជនកម្ពុជា ដែលមានលោកព្រំ សុខា និតំណាងគណបក្សសង្គ្រោះជាតិ ដែលមានលោក គួយ ប៊ុនរឿន កាលពីព្រឹកថ្ងៃសៅរ៍ ទី០៣ ខែសីហានេះ។
លោកទេព នីថា អគ្គលេខាធិការនៃគណៈកម្មាធិការជាតិរៀបចំការបោះឆ្នោតបានមានប្រសាសន៍ឲ្យដឹងថា ការពិភាក្សាគ្នារវាងតំណាងគណបក្សប្រជាជនកម្ពុជា និងគណបក្សសង្គ្រោះជាតិ បានប្រព្រឹត្តទៅក្នុងបរិកាសល្អ ដោយគណបក្សនយោបាយទាំងពីរមានសុច្ឆន្ទះ ចូលរួមដោះស្រាយបញ្ហាភាពមិនប្រក្រតីនានាជុំវិញការបោះឆ្នោតជាតិអណ្ណត្តិទី៥។
លោកទេព នីថា បានឲ្យដឹងបន្ដថា លទ្ធផលនៃការជំនួបនោះ គឺបានឯកភាពគ្នាជាគោលការណ៍ គឺបង្កើតគណៈកម្មការចម្រុះមួយដែលមានសមាសភាពមកពី គ.ជ.ប និងគណបក្សនយោបាយទាំងពីរចូលរួម។ ហើយគណៈកម្មការចម្រុះនេះ នឹងប្រជុំពិភាក្សាគ្នាអំពីអណ្ណត្ដិ និងភារកិច្ចរបស់ខ្លួន ជាបន្ទាន់ក្រោយពីត្រូវបានបង្កើតហើយ។
សំលេងៈ
គួរបញ្ជាក់ថា ការបង្កើតគណៈកម្មការចម្រុះស៊ើបអង្កេតករណីភាពមិនប្រក្រតី នៃការបោះឆ្នោតនេះ គឺធ្វើឡើងបន្ទាប់ពីមានការទាមទាររបស់គណបក្សសង្គ្រោះជាតិដែលអះអាងថា ថ្ងៃបោះឆ្នោតមានភាពប្រក្រតីជាច្រើនបានកើតឡើង និងបន្ទាប់ពីសម្ដេចនាយករដ្ឋមន្ដ្រី ហ៊ុន សែន អនុប្រធានគណបក្សប្រជាជនកម្ពុជា បង្ហាញជំហរចង់ឲ្យមានគណៈកម្មការនេះដែរ៕(ដោយៈឃួន សុភ័ក្រ)
ប្រភពពី- វាយោ
Read more: http://www.cambodiapage.info/kh
0 comments:
Post a Comment