បន្ទាប់ពីប្រកាសលទ្ធផលបោះឆ្នោតបណ្ណោះអាសន្នរបស់គណៈកម្មាធិការជាតិរៀបចំការបោះឆ្នោត នៅព្រឹកថ្ងៃទី១២ សីហានេះ គណបក្សកាន់អំណាច បញ្ជាក់ថា ខ្លួននឹងដឹកនាំរដ្ឋាភិបាលជាបន្ត។ រីឯគណបក្សប្រឆាំងបដិសេធលទ្ធផលចោលភ្លាម។
ភ្លាមៗក្រោយការប្រកាសលទ្ធផលបណ្តោះអាសន្នរបស់ គ.ជ.ប គណបក្សជាប់ឆ្នោតទាំងពីរបានបញ្ចេញប្រតិកម្មរៀងៗខ្លួន។ នៅក្នុងសន្និសីទកាសែតមួយនៅព្រឹកនេះ លោកខៀវ កញារីទ្ធ អ្នកនាំពាក្យប្រជាជនកម្ពុជាបានប្រកាសជាថ្មីថា ខ្លួននៅតែដឹកនាំរដ្ឋាភិបាលអាណត្តិទី៥ថ្មីនេះ ជាបន្តដដែល។
អ្នកនាំពាក្យរូបនេះ បានបញ្ជាក់ពីតួលេខបឋមរបស់គ.ជ.ប ថា គណបក្សប្រជាជនកម្ពុជា ទទួលបានសម្លេងគាំទ្រប្រមាណជាង ៣លាន ២សែនសម្លេង ទល់នឹង ២លាន ៩សែន របស់គណបក្សប្រឆាំង។ គណបក្សប្រឆាំង ក៏បានធ្វើសន្និសីទកាសែតមួយភ្លាមដែរ ដោយបដិសេធចំពោះលទ្ធផលបោះឆ្នោតរបស់គ.ជ.ប។ លោក កឹម សុខា អនុប្រធានគណបក្សសង្គ្រោះជាតិបានប្រកាសថា ប្រសិនមានមហាបាតុកម្ម ប្រឆាំងលទ្ធផលបោះឆ្នោតកើតឡើងមែននោះ គឺគ.ជ.ប និងគណបក្សប្រជាជនកម្ពុជាជាអ្នកទទួលខុសត្រូវ។
លោក កឹម សុខា បានចោទប្រកាន់គ.ជ.ប ថា ជាអ្នកដុតកំហឹងប្រជាពលរដ្ឋឱ្យពុះកញ្ជ្រោល ឡើងកាន់តែខ្លាំងថែមទៀត។ ឆ្លើយតបចំពោះការថ្លែងទំលាក់កំហុសរបស់លោក កឹម សុខា លោក ខៀវ កញារិទ្ធ បានសង្កត់ធ្ងន់ថា បើមានមហាបាតុកម្មកើតឡើងមែន នោះ អ្នកដែលដឹកនាំបាតុកម្មនោះហើយ ជាអ្នកទទួលខុសត្រូវចំពោះបញ្ហានានា។ ហើយលោកថា រដ្ឋាភិបាលចាំផ្ទះក៏មានភារកិច្ចដើម្បីទប់ស្កាត់បញ្ហាដែលគ្រោងនឹងកើតឡើងផងដែរ។
គួររំលឹកថា បន្ទាប់ពីការបោះឆ្នោតបានបញ្ចប់ ទាំងគណបក្សប្រជាជនកម្ពុជា ទាំងគណបក្សសង្គ្រោះជាតិ សុទ្ធតែបានអះអាងថា ខ្លួនជាអ្នកកាន់កាប់កៅអីក្នុងសភាច្រើនជាងគេ។ ហើយគណបក្សប្រឆាំងជារឿយៗ តែងតែប្រកាសធ្វើមហាបាតុកម្មប្រឆាំងនឹងលទ្ធផលបោះឆ្នោតប្រសិនបើគណបក្សខ្លួនចាញ់ឆ្នោត។ ការប្រកាសលទ្ធផលបណ្តោះអាសន្នរបស់ គ.ជ.ប ពេលនេះ ហាក់ដូចជាកំពុងធ្វើឲ្យកម្តៅនយោបាយកើនឡើងកាន់តែខ្លាំង៕
ប្រភពពី វិទ្យុបារាំងអន្តរជាតិ
Read more: http://www.cambodiapage.info/
0 comments:
Post a Comment