គេហទំព័របណ្តាញសង្គម Facebook បានក្លាយជាឧបករណ៍ដ៏ពេញនិយមរបស់ប្រជាពលរដ្ឋកម្ពុជា ក្នុងការចែករំលែកព័ត៌មានផ្តល់ឲ្យគ្នាទៅវិញទៅមកតៗគ្នា ទាំងតាមរូបភាពក្តី ទាំងតាមអក្សរក្តី ទាំងតាមការបញ្ចេញមតិយោបល់ក្តី។
បណ្តាញសង្គម Facebook បានដើរតួនាទីយ៉ាងសំខាន់ដែលនាំឲ្យគណបក្សសង្គ្រោះជាតិដែលជាគណបក្សនយោបាយប្រឆាំងដ៏ធំតែមួយគត់នៅកម្ពុជា ដែលគ្មានទូរទស្សន៍ វិទ្យុ និងសារព័ត៌មានគាំទ្រច្រើនដូចគណបក្សនយោបាយកាន់អំណាចនោះទទួលបានសំឡេងឆ្នោតគាំទ្រកើនឡើងយ៉ាងខ្លាំងនៅក្នុងការបោះឆ្នោតជ្រើសតាំងតំណាងរាស្ត្រនីតិកាលទី៥ ឆ្នាំ២០១៣ កាលពីថ្ងៃទី២៨ ខែកក្កដា ឆ្នាំ២០១៣ កន្លងមកបើទោះបីអ្នកលេង Facebook មានសមាសភាពចម្រុះគ្រប់សណ្ឋាន និងគ្រប់និន្នាការនយោបាយក៏ដោយ។
តាមការកត់សម្គាល់ជាក់ស្តែងបានបង្ហាញឲ្យឃើញថា ក្រៅពី Page មួយនៅក្នុង Facebook ឈ្មោះ I Love Cambodia Hot News ដែលមានអ្នកគាំទ្រចំនួន 201K «ជាង២០ម៉ឺននាក់» គឺនៅមានក្រុម «Group» មួយនៅក្នុង Facebook ឈ្មោះ ព័ត៌មានសង្គម «Global News» ដែលមានសមាជិកចំនួនជាង 194K «ជាង១៩ម៉ឺននាក់» មានលោក Michael Rothy ជាប្រធានក្រុម បានដើរតួយ៉ាងសំខាន់ក្លាយជាវេទិកាឲ្យអ្នកគាំទ្រគណបក្សនយោបាយធំៗទាំងពីរគឺគណបក្សប្រជាជនកម្ពុជា «លេខ៤» និងគណបក្សសង្គ្រោះជាតិ «លេខ៧» បញ្ចេញមតិយោបល់ និង Post ព័ត៌មានព្រមទាំងចែករំលែកព័ត៌មានអំពីគណបក្សនយោបាយដែលខ្លួនពេញចិត្តរៀងៗខ្លួនចាប់តាំងពីពេលយុទ្ធនាការឃោសនាបោះឆ្នោតដល់ថ្ងៃបោះឆ្នោតនិងរហូតមកទល់សព្វថ្ងៃនេះ។
ខណៈដែលលទ្ធផលឆ្នោតបណ្តោះអាសន្នផ្លូវការត្រូវបានប្រកាសដោយគណៈកម្មាធិការជាតិរៀបចំការបោះឆ្នោត «គ.ជ.ប» នៅថ្ងៃទី១២ ខែសីហា ឆ្នាំ២០១៣នេះ បញ្ហាញថា គណបក្សប្រជាជនកម្ពុជាទទួលបានការឈ្នះឆ្នោតលើគណបក្សសង្គ្រោះជាតិនៅទូទាំងប្រទេសចំនួន២៨៩.៧៩៣សំឡេង ឬប្រមាណជា ១៣អាសនៈ «គណបក្សប្រជាជនកម្ពុជា ៦៨ អាសនៈ និងគណបក្សសង្គ្រោះជាតិ ៥៥ អាសនៈ» នៅក្នុងអាសនៈរដ្ឋសភាសរុប១២៣អាសនៈ គឺធ្វើឲ្យមានការកើនកម្តៅយ៉ាងខ្លាំងនៅក្នុងអារម្មណ៍របស់អ្នកគាំទ្រគណបក្សនយោបាយនីមួយៗ ជាពិសេសគណបក្សសង្គ្រោះជាតិនៅក្នុង Facebook។
លោក Michael Rothy ដែលជាប្រធានក្រុម Global News ដ៏ល្បីក្នុង Facebook បានទទួលរងសម្ពាធគ្រប់ជ្រុងពីអ្នកគាំទ្រគណបក្សនយោបាយធំៗទាំងពីរ រហូតធ្វើឲ្យលោកចង់សម្រេចចិត្តបិទក្រុមអ្នកចោលម្តងៗទៀតផង ទោះបីលោកខំប្រឹងចែងបទបញ្ជាផ្ទៃក្នុងក្នុងក្រុមក៏ដោយពីព្រោះបើលោកបិទអ្នក Post ខាងលេខ៤ ដែលខុសឆ្គង ដូចជា រូបភាព អក្សរ ពាក្យពេចន៍ប៉ះពាល់ដល់សិទ្ធិបុគ្គលឬថ្នាក់ដឹកនាំប្រទេសគឺលេខ៤ ខឹងលោក តែបើលោកបិទអ្នក Post ខាងលេខ៧ ដែលខុសឆ្គងវិញ គឺលេខ៧ ខឹងលោក។
ឥឡូវ សង្គ្រាម «ឌឺដង» រវាងអ្នកគាំទ្រគណបក្សនយោបាយធំៗទាំងពីរនៅតែក្តៅគគុកក្នុង Facebook នោះ គឺរឿងមិនទទួលស្គាល់លទ្ធផលការបោះឆ្នោតរបស់គណបក្សនយោបាយប្រឆាំង និងការគំរាមធ្វើមហាបាតុកម្មរបស់គណបក្សសង្គ្រោះជាតិ ដើម្បីប្រឆាំងនឹងលទ្ធផលនៃការបោះឆ្នោត ព្រមទាំងការស្នើសុំអង្គការសហប្រជាជាតិឲ្យលូកដៃជួយអន្តរាគមន៍ក្នុងរឿងមិនប្រក្រតីនៃការបោះឆ្នោត។
យើងនឹងរង់ចាំមើលទាំងអស់គ្នា តើកម្តៅនឹងកើនឡើងដល់កម្រិតណាក្នុង Facebook ចំពោះអ្នកគាំទ្រគណបក្សនយោបាយធំៗទាំងពីរ ដែលម្ខាងជាអ្នកឈ្នះឆ្នោតពោរពេញទៅដោយការរិះគន់ និងម្ខាងទៀតជាអ្នកចាញ់ឆ្នោតដែលប្រកាសថាទទួលរងអំពើអយុត្តិធម៌?៕
___________________________
ប្រភពពីដើមត្នោត
Read more: http://www.cambodiapage.info/
0 comments:
Post a Comment