ទឹកភ្លៀងចាប់ផ្ដើមធ្លាក់ជាបន្ដបន្ទាប់នៅលើទឹកដីនៃព្រះរាជាណាចក្រកម្ពុជា ពីព្រោះជារយៈពេលឋិតនៅក្នុងរដូវវស្សាជារដូវភ្លៀងធ្លាក់ និងជារដូវធ្វើស្រែចម្ការរបស់ប្រជាពលរដ្ឋកម្ពុជា ដែលប្រកបរបរកសិកម្មចំនួនជាង៨៥ភាគរយ ។
ក្រៅពីបណ្ដាខេត្ដមួយចំនួនដែលធ្លាប់ទទួលរងជំនន់ទឹកភ្លៀងមកពីទឹកភ្លៀងបង្អុរមកជោកជាំអស់រយៈពេលជាច្រើនថ្ងៃជាប់ៗគ្នា គឺចំពោះភ្នំពេញដែលជារាជធានីនៃព្រះរាជាណាចក្រកម្ពុជាជាបេះដូងនៃប្រទេសកម្ពុជាវិញ មហាវិថី វិថី និងដងផ្លូវមួយចំនួនត្រូវទទួលរងការជន់លិច បង្កផលលំបាកដល់ការធ្វើដំណើររបស់អ្នកទីក្រុងត្រឹមភ្លៀងបង្អុរមកក្នុងរយៈពេល៣០នាទីប៉ុណ្ណោះ ខណៈដែលផ្លូវ និងលូបង្ហូរទឹកក្នុងរាជធានីភ្នំពេញ “ធ្វើជាប់ឥតឈប់ឈរ” និងលុយកាក់ដែលជាថវិកាជាតិក៏ត្រូវចំណាយជាហូរហែឥតដាច់ដែរ ។
ព័ស្ដុតាងជាក់ស្ដែងបានបង្ហាញថា នៅរសៀលថ្ងៃទី០៧ ខែសីហា ឆ្នាំ២០១៣នេះ គ្រាន់តែទឹកភ្លៀងបង្អុរមកត្រឹមរយៈពេលប្រមាណ៣០នាទីប៉ុណ្ណោះ មហាវិថី វិថី និងដងផ្លូវមួយចំនួនត្រូវទទួលរងការលិចលង់ យ៉ាងធ្ងន់ធ្ងរ រហូតមិនអាចឱ្យអ្នកដំណើរតាមទោចក្រយានយន្ដ និងរថយន្ដមិនអាចចរាចរណ៍ទៅបានទៀតផង ។
ដងផ្លូវនៅក្នុងរាជធានីភ្នំពេញដែលទទួលរងការលិចលង់ដោយសារទឹកភ្លៀង មិនមែនទើបតែកើតមាននៅពេលនេះទេ គឺបានកើតមានដដែលៗជាច្រើនឆ្នាំមកហើយ ខណៈដែលថ្នាក់ដឹកនាំប្រទេសជាតិប្រភពមកពីគណបក្សប្រជាជនកម្ពុជា និងថ្នាក់ដឹកនាំរាជធានីភ្នំពេញ សូត្រទន្ទេញយ៉ាងរត់មាត់បានល្អថា “អភិវឌ្ឍន៍គ្រប់វិស័យ” ឬជា“ទីក្រុងគុជ” ឬជា“ទីក្រុងដ៏ស្រស់ប្រិមប្រិយ” ។
ទឹកភ្លៀងបង្អុរមកធ្វើឱ្យលិចលង់ដងផ្លូវមួយចំនួនក្នុងរាជធានីភ្នំពេញនារយៈពេលប៉ុន្មានថ្ងៃពេលមានភ្លៀងធ្លាក់មកនោះ គឺជាសញ្ញាស្វាគមន៍នៃការឡើងកាន់កាប់មុខតំណែងថ្មីជាអភិបាលនៃគណៈអភិបាលរាជធានីភ្នំពេញរបស់ឯកឧត្ដម ប៉ា សុជាតិវង្ស ដោយសារឯកឧត្ដមថ្នាក់ដឹកនាំរាជធានីភ្នំពេញរូបនេះចូលចិត្ដប្រើទឹកបាញ់បំបែកហ្វូងបាតុករទាមទារសិទ្ធិរស់នៅ និងសិទ្ធិលំនៅឋាននៅតំបន់បឹងកក់នាពេលកន្លងមក និងក៏ជាក្ដីសង្ឃឹមនៃការកាន់កាប់មុខតំណែងរបស់“សម្ដេចតេជោសែន”ជានាយករដ្ឋមន្ដ្រីនីតិកាលទី៥នៃរដ្ឋសភានៅពេលខាងមុខ ។
មជ្ឈដ្ឋានអ្នកលេងហ្វេសប៊ុកបាននិយាយចំអករិះគន់ទាក់ទងនឹងការលិចលង់ដងផ្លូវនៅរាជធានីភ្នំពេញថា កម្ពុជាឬរាជធានីភ្នំពេញមិនមែនព្រះរាជាណាចក្រអច្ឆរិយៈ ឬទីក្រុងដ៏ស្រស់ប្រិមប្រិយនោះទេ ប៉ុន្ដែគឺជាព្រះរាជាណាចក្រលិចទឹក ឬជាទីក្រុងលិចទឹកទៅវិញ ៕
ប្រភពពី ដើមត្នោត
Read more: http://www.cambodiapage.info/kh/
0 comments:
Post a Comment