មជ្ឈមណ្ឌលសិទ្ធិមនុស្សកម្ពុជា ដែលជាអង្គការមួយតាមឃ្លាំមើលការបោះឆ្នោតនៅកម្ពុជាផងដែរនោះ នៅថ្ងៃពុធនេះបានសម្តែងក្តីបារម្ភចំពោះការផ្ទៀងផ្ទាត់លើការគណនាលទ្ធផល នៃការបោះឆ្នោតជ្រើសតាំងតំណាងរាស្រ្តឡើងវិញ ដែលកំពុងធ្វើឡើងនៅទីស្នាក់ការកណ្តាលរបស់គណៈកម្មាធិការជាតិរៀបចំការបោះឆ្នោត (គ.ជ.ប) តាំងពីថ្ងៃទី០៣ ខែសីហា មកនោះ។
មជ្ឈមណ្ឌលសិទ្ធិមនុស្សកម្ពុជាបានលើកឡើងថា ដំណើរការនៃការផ្ទៀងផ្ទាត់លទ្ធផលឆ្នោតឡើងវិញនេះ គ.ជ.ប ពុំបានផ្តល់នូវទម្រង់លទ្ធផលបឋមពីការិយាល័យបោះឆ្នោតនីមួយៗឡើយ ហើយបានរាប់សាជាថ្មីលើតួលេខដែលប្រមូលបានពីឯកសារអ៊ិចសែល (excel) ទៅវិញ ដែលវាពុំមានភាពជាក់ស្តែងថា តួលេខដែលត្រូវបានផ្ទៀងផ្ទាត់ឡើងវិញនេះ ពិតជាតួលេខជាក់ស្តែងដែលប្រមូលបានពីការិយាល័យបោះឆ្នោតនីមួយៗនោះទេ។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជាបានមានប្រសាសន៍ថា មជ្ឈមណ្ឌលរបស់លោកស្វាគមន៍ចំពោះឆន្ទៈរបស់ គ.ជ.ប ក្នុងការអញ្ជើញអ្នកសង្កេតការណ៍ឯករាជ្យឲ្យចូលរួមដើម្បីផ្ទៀងផ្ទាត់លើលទ្ធផលនៃការបោះឆ្នោត។ ប៉ុន្តែអវត្តមានទម្រង់១១០២ សម្រាប់អ្នកឃ្លាំមើលដើម្បីផ្ទៀងផ្ទាត់ទៅនឹងតួលេខដែលបាផ្តល់ឲ្យពួកគេដោយ គ.ជ.ប វាបានធ្វើឲ្យប៉ះពាល់យ៉ាងខ្លាំងដល់ដំណើរការនេះទាំងស្រុង។
លោក អ៊ូ វីរៈ បានសំណូមពរដល់ គ.ជ.ប គួរតែចែកជូននូវទម្រង់ ១១០២ ជាដំបូងដល់អ្នកសង្កេតការណ៍អព្យាក្រឹត្យ ដើម្បីបង្កើនទំនុកចិត្តតាមនីត្យានុកូលភាព នៃលទ្ធផលឆ្នោត ជាជាងការធ្វើឲ្យមានក្តីមន្ទិលសង្ស័យអំពីការបន្លំសំឡេងឆ្នោត។
សូមបញ្ជាក់ថា ចាប់តាំងពីថ្ងៃទី០៣ ខែសីហា មក គ.ជ.ប បានរៀបចំការធ្វើការផ្ទៀងផ្ទាត់លទ្ធផលនៃការបោះឆ្នោតកាលពីថ្ងៃទី២៨ កក្កដា ឡើងវិញ ដោយមានការចូលរួមពីតំណាងគណបក្សនយោបាយ និងអង្គការសង្គមស៊ីវិល ដូចជាគណបក្សប្រជាជនកម្ពុជា អង្គការនិកហ្វិច អង្គការអរុណរៈ អង្គការសមាគមគ្រួសារអភិវឌ្ឍ៍ សមាគមបញ្ញវ័ន្ត និងយុវជស្ម័គ្រចិត្ត (VIYA) វិទ្យាស្ថាពលរដ្ឋវិជ្ជា និងវេទិកាប្រជាពលរដ្ឋស្តីពីកម្ពុជានៅជប៉ុន។ ហើយមកទល់ពេលបច្ចុប្បន្ននេះ ដំណើរនៃការផ្ទៀងផ្ទាត់គឺបានបញ្ចប់ចំនួន២២ខេត្តរាជធានីហើយ ដោយនៅសល់តែខេត្តបាត់ដំបង និងបន្ទាយមានជ័យប៉ុណ្ណោះ៕
ប្រភពពី Free Press Magazine
Read more: http://www.cambodiapage.info/
0 comments:
Post a Comment