ខេត្តព្រះសីហនុៈ បន្ទាប់ពីសវនាការកាត់ក្តីរបស់តុលាការខេត្តព្រះសីហនុពាក់ព័ន្ធនឹងសំណុំរឿងគ្រោះថ្នាក់ចរាចរណ៍យ៉ាងធ្ងន់ធ្ងរលើក្រុមតារាចម្រៀង ខេមរៈ សេរីមន្ត កាលពីខែមីនាត្រូវបានធ្វើឡើងកាលពីថ្ងៃទី១៥ ខែកក្កដា ចៅក្រមសាលាដំបូងខេត្តព្រះសីហនុ ក៏បានប្រកាសសាលក្រមជាផ្លូវការកាលពីរសៀលថ្ងៃសុក្រទី១៩ ខែកក្កដា កន្លងទៅនេះដោយសាលក្រមតុលាការបានបង្គាប់ឲ្យក្រុមហ៊ុនដឹកជញ្ជូនSK (សូ កន)ដែលជាអ្នកបង្កហេតុ និងក្រុមហ៊ុនធានារ៉ាប់រង កាំមីនកូរួមគ្នាសងសំណងដល់ជនរងគ្រោះសរុបជាង ១៣ ម៉ឺនដុល្លារអាមេរិក និងបានសម្រេចផ្តន្ទាទោសអ្នកបើកបររថយន្តកុងតឺន័រដាក់ពន្ធនាគារចំនួន ៣ ឆ្នាំ។
លោក ឡេង លីហួរ មេធាវីការពារក្តីតំណាងឲ្យជនរងគ្រោះបានបញ្ជាក់ប្រាប់ភ្នំពេញប៉ុស្តិ៍ក្រោយចប់ការប្រកាសសាលក្រមថា ចៅក្រមបង្គាប់ឲ្យក្រុមហ៊ុន SK សងសំណងលើតារាចម្រៀងខេមរៈ សេរីមន្តចំនួន ៨៥ ០០០ដុល្លារក្នុងនោះក្រុមហ៊ុនធានារ៉ាបរងកាំមីនកូ ត្រូវជួយចេញសង ៥០០០ ដុល្លារ។ សងសំណងដល់តារាកំប្លែងយាយ ណយ សំណាង ចំនួន ២៥ ០០០ ដុល្លារ ដោយក្រុមហ៊ុនធានារ៉ាប់រងកាំមីនកូត្រូវជួយសង ៥០០០ ដុល្លារ។ រីឯសងសំណងដល់តារាកំប្លែងនាយកុយ និងជនរងគ្រោះផ្សេងទៀតក្នុងម្នាក់ចំនួន ២៣ ០០០ ដុល្លារអាមេរិកផងដែរ។
លោកមេធាវីឡេង លីហួរ បន្តថា៖«នៅក្នុងគ្រោះថ្នាក់នោះ តុលាការបានសម្រេចឲ្យក្រុមហ៊ុន SK និងកាំមីនកូ រួមគ្នាសងលើជនរងគ្រោះ រីឯអ្នកបើកបររថយន្តកុងតឺន័រត្រូវតុលាការសម្រេចផ្តន្ទាទោសដាក់ពន្ធនាគាររយៈពេល៣ឆ្នាំ និងត្រូវសងប្រាក់ដល់ជនរងគ្រោះចំនួន៤លានរៀល»។ លោកបានបញ្ជាក់ថា៖«បើតាមការសម្រេចរបស់តុលាការលើការសងសំណងក្នុងចំនួនទឹកប្រាក់ប៉ុននេះ ខ្ញុំគិតថា កូនក្តីខ្ញុំនឹងអាចទទួលយកបាន»។
ពាក់ព័ន្ធនឹងសាលក្រមរបស់តុលាការនេះ លោក ខេមរៈ ភារុណ បងប្រុសបង្កើតខេមរៈ សេរីមន្ត និងជាអ្នកនាំពាក្យនិយាយថា៖« សម្រាប់សាលក្រមនេះ ខ្ញុំគ្រួសារ និងអ្នកទាំងអស់គ្នាអាចទទួលយកបាន តែរឿងគេសងពេលណានោះ ខ្ញុំអត់ដឹងទេ ទាល់តែសួរមេធាវីខ្ញុំ»។
ជាមួយគ្នានោះតារាកំប្លែងនាយកុយ ដែលនៅតែឈឺចិត្តនឹងការបាត់បង់ជីវិតកូនប្រុសនោះបាននិយាយថា៖«ចំពោះសំណងនេះ ខ្ញុំហួសពីទទួលយកបានទៅទៀត ព្រោះកូនយើងបានស្លាប់ទៅហើយ តែយើងត្រូវការទំនួលខុសត្រូវរបស់ក្រុមហ៊ុនបង្កហេតុហើយខ្ញុំក៏អរគុណតុលាការខេត្តព្រះសីហនុផងដែរ»។
គួរបញ្ជាក់ផងដែរថា នៅក្នុងសវនាការប្រកាសសាលក្រមថ្ងៃទី១៩ កក្កដា នោះមិនមានវត្តមានតារាចម្រៀងខេមរៈ សេរីមន្ត តារាកំប្លែងយាយណយ សំណាង និងតារាកំប្លែងលោក ជួង ជី ហៅ នាយកុយទេ គឺមានតែតំណាង និងមេធាវីប៉ុណ្ណោះ។ តារាកំប្លែងនាយកុយបានឲ្យដឹងថា លោកជាប់រវល់ការងារនៅភ្នំពេញ។ រីឯខេមរៈ សេរីមន្ត ក៏រវល់ការងារមិនអាចចូលរួមបានដែរ ប៉ុន្តែទស្សនិកជនបានបញ្ជាក់ថា នោះទំនងខេមរៈ សេរីមន្ត មិនទាន់ហ៊ានធ្វើដំណើរលើផ្លូវជាតិលេខ៤ ដែលលោកតែងសុបិនអាក្រក់រាល់ថ្ងៃនោះទេ។
ដោយឡែកលោក អ៊ូ ប៊ុនរ៉ា តំណាងមេធាវីក្រុមហ៊ុន SK បានឲ្យដឹងចំពោះការសម្រេចរបស់តុលាការខេត្តព្រះសីហនុថា ជាការដាក់បន្ទុកលើក្រុមហ៊ុនរបស់លោកតែម្នាក់ ខណៈក្រុមហ៊ុនលោកមានធានារ៉ាប់រងនោះ។
លោកនិយាយថា៖«ខ្ញុំយល់ឃើញថា ការសម្រេចហ្នឹងការទាមទាររបស់ជនរងគ្រោះទាំងអស់ គាត់(តុលាការ) សម្រេចផ្តល់ឲ្យជនរងគ្រោះទាំងអស់ ខ្ញុំមិនដឹងឆន្ទៈច្បាប់ហ្នឹងយ៉ាងម៉េច។ ការសម្រេចរបស់ចៅក្រមឲ្យសងតាមការទាមទារហ្នឹងនៅថ្ងៃក្រោយវាអាចជាគំរូមួយ ខ្ញុំមានការពិបាកដែរ។ នៅពេលខ្ញុំប្រាប់ទៅក្រុមហ៊ុន ក្រុមហ៊ុនក៏មិនសូវមានការសប្បាយចិត្តជាមួយនឹងលទ្ធផលដែរ។ ប៉ុន្តែខ្ញុំនឹងព្យាយាមពិភាក្សាជាមួយនឹងជនរងគ្រោះថា យើងគួររកច្រកដើរណា យើងខ្មែរគ្នាឯង កុំឲ្យចងកំហឹងដាក់គ្នា យើងរកដំណោះស្រាយណាទទួលយកបានទាំងអស់គ្នា»។
លោកបន្តថា៖«ក្រុមហ៊ុនក៏ខាតបង់ច្រើន។ មួយទៀតក្រុមហ៊ុនខ្ញុំទិញការធានារ៉ាប់រងរបស់កាំមីនកូ គឺចំណុចសងតតីជន គឺបានន័យថា ពេលមានរឿងក្រុមហ៊ុនខ្ញុំមិនមែនជាអ្នកដោះស្រាយទេគឺខាងកាំមីនកូជាអ្នកដោះស្រាយ ព្រោះមួយឆ្នាំៗក្រុមហ៊ុនខ្ញុំទិញអស់រាប់ម៉ឺនដុល្លារ។ តែចុងក្រោយបែរជាក្រុមហ៊ុនខ្ញុំជាអ្នកទទួលខុសត្រូវ»។
លោកបញ្ជាក់ថា៖«ជាទូទៅនៅពេលនេះ ក្រុមហ៊ុនខ្ញុំមិនអាចទទួលយកបានទេ ព្រោះក្រុមហ៊ុនខ្ញុំខាតបង់ច្រើនពេក ដឹកជញ្ជូនមួយទូៗបានចំណេញតិចតួច ឥឡូវត្រូវសងជិត២០ម៉ឺនហើយ»។ តែលោកបន្តថា៖«តាមពិតខ្ញុំអត់ចង់ប្តឹងទៅឧទ្ធរណ៍ទេ លុះត្រាខ្ញុំចាំពិភាក្សាជាមួយជនរងគ្រោះសិន តែបើគាត់អត់ឯកភាពខ្ញុំនឹងប្តឹងបន្តទៀត ព្រោះថ្លៃខូចខាតច្រើនមែនទែន ជិត២០ម៉ឺនដុល្លារទៅហើយ យើងស៊ីឈ្នួលដឹកអីវ៉ាន់គេមួយជើងបានតិចតួចហ្នឹង។ ទី២ ខ្ញុំគិតថា ហេតុអីបានដាក់បន្ទុកឲ្យក្រុមហ៊ុនខ្ញុំទទួលសងដែរ ព្រោះធម្មតាក្រុមហ៊ុនជាតិធានារ៉ាប់រងកាំមីនកូហ្នឹងយើងទិញដើម្បីសងតតីជន តែនៅពេលមានរឿង បែរជា[តុលាការ]ដាក់បន្ទុកលើខ្ញុំទៀត ខ្ញុំអត់យល់ដែរ អ៊ីចឹងមានក្រុមធានារ៉ាប់រងធ្វើអីអត់ន័យដដែលនោះ»។
គួររំឭកថាម៉ោង៨ និង៣០នាទីយប់ថ្ងៃទី៧ មីនា ឆ្នាំ២០១៣កន្លងទៅខេមរៈ សេរីមន្ត រួមនឹងក្រុមការងារ៨នាក់(ក្មេងម្នាក់) បានធ្វើដំណើរតាមរថយន្តTundra ពណ៌សពីភ្នំពេញទៅខេត្តព្រះសីហនុ ដើម្បីច្រៀងនៅក្នុងការប្រគំតន្ត្រីមួយហើយក៏ជួបគ្រោះថ្នាក់ចរាចរណ៍ដ៏រន្ធត់មួយស្ថិតក្នុងភូមិពូធឿង ឃុំបិតត្រាំង ព្រៃនប់ ព្រះសីហនុ។
គ្រោះថ្នាក់ដ៏រន្ធត់នេះបង្កឡើងដោយរថយន្តកុងតឺន័រក្រុមហ៊ុន SK បុកពេញទំហឹងទៅលើរថយន្តTundra របស់ខេមរៈ សេរីមន្ត បណ្តាលឲ្យក្រុមការងាររបស់ពួកគេស្លាប៤នាក់ភ្លាមៗ ក្នុងនោះមានកូនប្រុសតារាកំប្លែងល្បីឈ្មោះនាយ កុយ ម្នាក់ និងកូនប្រុសតារាចម្រៀងអាយ៉ៃយាយ ណាង ម្នាក់ផងដែរ៕
__________________
ប្រភពព័ត៌មានពី៖ ខ្មែរប៉ុស្តិ៍
ប្រភពព័ត៌មានពី៖ ខ្មែរប៉ុស្តិ៍
