ភ្នំពេញៈ យុវជនគណបក្សកាន់អំណាចប្រមាណ ១៥.០០០ នាក់ បានជួបជុំគ្នានៅកោះពេជ្រ កាលពីម្សិលមិញ ទំនងជាការបង្ហាញការហែក្បួនគាំទ្រដ៏ធំមួយ ចាប់តាំងពីមេដឹកនាំបក្សប្រឆាំងលោក សម រង្ស៊ី វិលត្រឡប់មកកម្ពុជាវិញ កាលពីថ្ងៃសុក្រ។
បើទោះជាក្រុមអ្នកគាំទ្រ គេមិនរំពឹងថា មានចំនួនរហូតដល់ ១០ ម៉ឺននាក់ ក្នុងការមកស្វាគមន៍ការវិលត្រឡប់របស់លោក សម រង្ស៊ី បន្ទាប់ពីការនិរទេសព្រោះតែបញ្ហានយោបាយអស់ពេលបួនឆ្នាំក្តី ការប្រៀបធៀបគ្នាគ្មានអ្វីសង្ស័យទេ ហើយវាបានក្លាយជាការពិតមួយ ដែលមេដឹកនាំគណបក្សប្រជាជនកម្ពុជា ធ្វើហាក់មិនអើពើសោះឡើយ។
កូនប្រុសលោកនាយករដ្ឋមន្រ្តី ហ៊ុន សែន លោក ហ៊ុន ម៉ានី គឺជាកូនប្រុសដែលដើរតួក្នុងតំណែងនយោបាយ ហើយក៏ជាប្រធានចលនាយុវជនរបស់គណបក្សប្រជាជនកម្ពុជា បានប្រាប់ទៅក្រុមយុវជនគាំទ្រគណបក្សលោកថា ការវិលត្រឡប់របស់លោក សម រង្ស៊ី នឹងមិនប៉ះពាល់ដល់យុទ្ធនាការរបស់គណបក្សប្រជាជនកម្ពុជាទេ។
ផ្ទុយទៅវិញ បេក្ខជនតំណាងរាស្រ្តខេត្ត កំពង់ស្ពឺ រូបនេះបានហៅការលើកលែងទោសសម្រាប់លោក សម រង្ស៊ី ថាគឺដោយសារតែលោកនាយករដ្ឋមន្រ្តី ហ៊ុន សែន ជាឪពុកបានស្នើសុំទៅព្រះមហាក្សត្រ ហើយថា ការនេះគឺជាផ្នែកមួយនៃការប្តេជ្ញាចិត្តរបស់គណបក្សប្រជាជនកម្ពុជា នៅក្នុងការឆ្ពោះទៅរកលទ្ធិប្រជាធិបតេយ្យ។
លោក ហ៊ុន ម៉ានី ក្នុងវ័យ៣១ឆ្នាំ បានថ្លែងបន្តថា ៖ «ខ្ញុំគិតថា គណបក្សប្រជាជនកម្ពុជានឹងបន្តកសាងការគាំទ្រជាថ្មីសម្រាប់គណបក្ស។ ការវិលត្រឡប់មកវិញរបស់លោក សម រង្ស៊ី មិនជាបញ្ហានោះទេ។ វាជារឿងរបស់លោក សម រង្ស៊ី»។ លោក ហ៊ុន ម៉ានី អះអាងថា៖ «គណបក្សប្រជាជនកម្ពុជាមានបំណងប្រាថ្នាចង់ឃើញការផ្សះផ្សាជាតិនិងការបោះឆ្នោតសេរី និងយុត្តិធម៌ ស្របទៅតាមលទ្ធិប្រជាធិបតេយ្យ សេរី ពហុបក្ស និងសិទ្ធិស្មើភាពគ្នា»។
នៅប៉ុន្មានម៉ោងមុនការមកដល់ របស់លោក ហ៊ុន ម៉ានី ទង់គណបក្សប្រជាជនកម្ពុជាជាច្រើនបក់រវិចនៅមជ្ឈមណ្ឌលកោះពេជ្រ កាលពីរសៀលម្សិលមិញ ខណៈក្រុមយុវជនគាំទ្រជាច្រើននៅរង់ចំាជាមួយ នឹងម៉ូតូនិងរថយន្តយ៉ាងច្រើន។
លោក ហ៊ុន ម៉ានី បានទទួលការទះដៃស្វាគមន៍សាទរពីក្រុមយុវជនរាប់ពាន់នាក់ ដែលអង្គុយនៅលើម៉ូតូរង់ចាំការដង្ហែក្បួននៅជុំវិញរាជធានី។ នៅក្នុងសុន្ទរកថា លោក ហ៊ុន ម៉ានី បានអំពាវនាវទៅកាន់ក្រុមយុវជនឲ្យរក្សាវិន័យថ្លៃថ្នូរ ខណៈការឃោសនាជិតនឹងបញ្ចប់។
លោកបានថ្លែងថា៖ «យើងត្រូវតែការពារដើមឈើសន្តិភាព ដែលយើងកំពុងប្រមូលភោគផល។ ប្រសិនបើយើងធ្វេសប្រហែសនិងមិនពិចារណាឲ្យស៊ីជម្រៅចំពោះរាល់ទង្វើរបស់យើង…ផ្លែឈើ ទាំងនេះនឹងត្រូវបាត់បង់ក្នុងរយៈពេលតែមួយនាទីហើយប្រទេសយើងនឹងធ្លាក់ចូលទៅក្នុងអស្ថិរភាព និងចលាចលសង្គម»។
លោក ហ៊ុន ម៉ានី ក៏បានថ្លែងសំដៅទៅគណបក្សមួយដែលមិនបញ្ចេញឈ្មោះចំពោះការយកផ្នត់គំនិតរបស់បរទេសក្នុងការមើលមកកម្ពុជាដោយមិនអើពើចំពោះសមិទ្ធផលរបស់គណបក្សប្រជាជនកម្ពុជា និងវាយប្រហារគណបក្សកាន់អំណាច។
បើទោះជាយុវជនដែលភ្នំពេញ ប៉ុស្តិ៍ បានជួបជាច្រើននិយាយថា ពួកគេមិនទទួលប្រាក់សម្រាប់ការចូលរួមនេះក៏ដោយ ក៏យុវជន អ៊ុន ឌីម៉ា អាយុ២១ឆ្នាំ ប្រាប់ថា គាត់ត្រូវគេផ្តល់ថ្លៃសាំងម៉ូតូឲ្យដែរ។ គាត់បន្តថា៖ «ខ្ញុំស្ម័គ្រចិត្តធ្វើយុទ្ធនាការឃោសនាសម្រាប់គណបក្សប្រជាជនកម្ពុជាដោយមានផ្តល់សាំងឲ្យខ្ញុំពីរលីត្រ… វាមិនមែនជាការផ្តល់ប្រាក់ដើម្បីការចូលរួមទេ ប៉ុន្តែ ជាឧបត្ថម្ភមិនឲ្យខ្ញុំចេញប្រាក់ហោប៉ៅ»។
អ្នកគាំទ្រ គណបក្សប្រជាជនកម្ពុជាឈ្មោះ សៀន បក្សាបូរមី អាយុ១៦ឆ្នាំ និយាយដែរថា បន្ទាប់ពីមានអ្នកគាំទ្រជាច្រើនទៅស្វាគមន៍ការវិលត្រឡប់ របស់លោក សម រង្ស៊ី គាត់មានការបារម្ភ អំពីលទ្ធផលនៃការបោះឆ្នោត។
យុវជនរូបនេះបាននិយាយទៀតថា៖ «ខ្ញុំមានការបារម្ភអំពីការប្រកួតប្រជែងរវាងគណបក្សប្រជាជន កម្ពុជា និងគណបក្សសង្គ្រោះជាតិបន្ទាប់ពីខ្ញុំបានឃើញមានអ្នកគាំទ្រគណបក្សសង្គ្រោះជាតិយ៉ាងច្រើនចេញទៅទទួល លោក សម រង្ស៊ី កាលពីថ្ងៃសុក្រ»៕ PS
_________________
ប្រភពព័ត៌មានពី៖ ខ្មែរប៉ុស្តិ៍
ប្រភពព័ត៌មានពី៖ ខ្មែរប៉ុស្តិ៍
