ទីបំផុតទៅគណៈកម្មាធិការជាតិរៀបចំការបោះឆ្នោត (គជប) បានសម្រេចមិនទទួលចុះឈ្មោះលោកសម រង្ស៊ី ក្នុងបញ្ជីអ្នកបោះឆ្នោត និងបញ្ជីបេក្ខភាពតំណាងរាស្រ្ត ដោយសំអាងថាខុសទៅនឹងមាត្រា៤៩ថ្មី(៣) នៃច្បាប់ស្តីពីការបោះឆ្នោតជ្រើសតំាងតំណាងរាស្រ្ត និង ច្បាប់ស្តីពីវិសោធនកម្មនៃច្បាប់ស្តីពីការបោះឆ្នោតជ្រើសតំាងតំណាងរាស្រ្តដដែលនេះ ។
ការសម្រេចយ៉ាងដូច្នេះ បានធ្វើឡើងបន្ទាប់ពី គជប បានកិច្ចប្រជុំបិទទ្វារស្តីពីការសុំចុះឈ្មោះ លោក សម រង្ស៊ី ទៅក្នុងបញ្ជីអ្នកបោះឆ្នោត និងបញ្ជីបេក្ខភាពតំណាងរាស្រ្តមណ្ឌលខេត្តកណ្តាល ចាប់តំាងពីម៉ោង៩ព្រឹករហូតដល់ម៉ោង១២ថ្ងៃត្រង់ថ្ងៃចន្ទ ហើយបានបន្តបើកកិច្ចប្រជុំនៅរសៀលថ្ងៃទី២២ កក្កដា ២០១៣ដដែលនេះ ដោយមានសមាសភាព៩រូប ដឹកនំាដោយលោក អ៊ឹម សួស្តី ប្រធាន គជប ។
ជាការកត់សម្គាល់ ការសម្រេចរបស់ គជប ក្នុងការមិនចុះឈ្មោះ លោក សម រង្ស៊ី ទៅក្នុងបញ្ជីអ្នកបោះឆ្នោតនិងបញ្ជីបេក្ខភាពតំណាងរាស្រ្តនេះ ធ្វើឡើងបន្ទាប់ពីលោក សម រង្ស៊ី ប្រធានគណបក្សសង្គ្រោះជាតិ កាលពីថ្ងៃទី២១កក្កដាម្សិលមិញ បានដាក់ពាក្យស្នើសុំឲ្យ គជប ចុះឈ្មោះលោកក្នុងបញ្ជីឈ្មោះអ្នកបោះឆ្នោត និង ជាបេក្ខភាពតំណាងរាស្រ្តមណ្ឌលខេត្តកណ្តាល សម្រាប់នីតិកាលទី៥នៃរដ្ឋសភា ដោយសំអាងលើការលើកលែងទោសពីព្រះមហាក្សត្រ ៕
ប្រភពពី កោះសន្តិភាព
