រាជធានីភ្នំពេញ ៖ លោក សម រង្ស៊ី ប្រធានគណបក្សសង្គ្រោះជាតិ បានមកដល់មាតុប្រទេសវិញ គឺបានមកដល់ព្រលាន យន្តហោះ អន្តរជាតិភ្នំពេញ (ពោធិចិនតុង) នៅថ្ងៃសុក្រ ទី១៩ ខែកក្កដា ឆ្នាំ២០១៣ នៅវេលាម៉ោង ៩ និង ១០នាទី ព្រឹកនេះ តាមក្រុមហ៊ុន អាកាសចរណ៍ THAI AIRWAYS ដូចការគ្រោងទុក ដើម្បីដឹកនាំយុទ្ធនាការឃោសនា ប្រកួតប្រជែងយកជ័យជំនះ ជាមួយគណបក្សប្រជាជនកម្ពុជា។
នៅឯព្រលានយន្តហោះលោក សម រង្ស៊ី បានមានប្រសាសន៍ថា ” ឥឡូវនេះ ខ្ញុំនៅរួមរស់ជាមួយ ប្រជារាស្ត្រខ្មែរ គឺជាមួយបងប្អូន ដ៏ជាទីស្រឡាញ់ ស្មើជីវិតខ្ញុំទាំងអស់ ដើម្បីសង្គ្រោះជាតិយើង! ” ។ លោក សម រង្ស៊ី បានសំដែងនូវក្តីរំភើបរីករាយយ៉ាងខ្លាំង នៅពេលបានវិលត្រឡប់មកកាន់មាតុភូមិវិញ ដើម្បីសង្គ្រោះជាតិយើង និងដណ្តើមយកជ័យជំនះ ក្នុងការបោះឆ្នោតនាពេលខាងមុខនេះ ។
លោក សម រង្ស៊ី លោក កឹម សុខា និងមន្ត្រីគណបក្សសង្គ្រោះជាតិជាច្រើនរូបទៀត បានធ្វើដំណើរតាមរថយន្តសន្សឹមៗ ដោយមានការហែហមពីអ្នកគាំទ្រ គណបក្សសង្គ្រោះជាតិ តាមដងផ្លូវប្រមាណ ១០ ម៉ឺននាក់ លើបណ្តោយផ្លូវជាង ៧ គីឡូម៉ែត្រ ឆ្ពោះទៅកាន់ទីលានប្រជាធិបតេយ្យ ដើម្បីជួបជាមួយអ្នកគាំទ្រប្រមាណ ៤ម៉ឺននាក់ដែលរងចាំដោយក្តីអន្ទៈសារ។ តាមគម្រោង លោក សម រង្ស៊ី ត្រូវបរិភោគអាហារថ្ងៃត្រង់ ជាមួយអ្នកគាំទ្រ នៅទីលានប្រជាធិបតេយ្យ រួចទើបធ្វើដំណើរទៅទីស្នាក់ការកណ្តាល របស់ គណបក្សសង្គ្រោះជាតិ៕
ប្រភពពី វត្តភ្នំ
