ភ្នំពេញៈ ប្រជាពលរដ្ឋបឹងកក់ដែលមានជម្លោះដីធ្លីដ៏រ៉ាំរ៉ៃនៅកណ្តាលរាជធានីភ្នំពេញ នៅព្រឹកថ្ងៃព្រហស្បតិ៍នេះ បានចេញមកតវ៉ានៅមុខតុលាការកំពូល ដើម្បីជំរុញការកាត់ក្តីអ្នកស្រី យ៉ោម បុប្ផា សកម្មជនតវ៉ាដីធ្លីបឹងកក់ ដែលកំពុងជាប់ឃាំងក្នុងពន្ធនាគារអស់រយៈពេល ៨ ខែមកហើយក្នុងសំណុំរឿងព្រហ្មទណ្ឌ។
ដោយឡែក ប្រជាពលរដ្ឋបឹងកក់ ក៏បានដាក់លិខិតមួយទៀតទៅក្រសួងយុត្តិធម៌ ដើម្បីស្នើសុំអន្តរាគមន៍ទៅតុលាការកំពូល ដើម្បីជំរុញការកាត់ក្តីអ្នកស្រី យ៉ោម បុប្ផាផងដែរ។
អ្នកស្រី យ៉ោម បុប្ផា អ្នកតវ៉ាដីធ្លីដ៏សកម្មនៅតំបន់បឹងកក់ អាយុ ២៩ឆ្នាំ ត្រូវបានចាប់ខ្លួននៅថ្ងៃទី៤ ខែកញ្ញា ឆ្នាំ២០១២ ពីបទចោទប្រកាន់ថា អ្នកស្រីបានចូលរួមប្រើអំពើហិង្សាដោយចេតនាលើបុរសអ្នករត់ម៉ូតូ ឌុបពីរនាក់ឲ្យរងរបួស។ ចៅក្រមចោទពីបទហិង្សាមានស្ថានទម្ងន់ទោសនៃក្រមព្រហ្មទណ្ឌ។
អ្នកស្រីត្រូវ ត្រូវបានតុលាការសាលាដំបូងរាជធានីភ្នំពេញ ផ្ដន្ទាទោសដាក់ពន្ធនាគារចំនួន ៣ឆ្នាំ និងឲ្យសងជំងឺចិត្តទៅបុរសអ្នករត់ម៉ូតូឌុបពីរនាក់ចំនួន ៦០លានរៀលទៀត កាលពីថ្ងៃទី២៧ ខែធ្នូ ឆ្នាំ២០១២។
ប៉ុន្តែនៅថ្ងៃទី១៤ ខែមិថុនា ឆ្នាំ២០១៣ អ្នកស្រី យ៉ោម បុប្ផា ត្រូវបានសាលាឧទ្ធរណ៍ប្រកាសសាលដីកា បន្ធូរបន្ថយទោស ១ឆ្នាំ គឺអ្នកស្រី យ៉ោម បុប្ផា ត្រូវនៅជាប់ទោស ២ឆ្នាំ និងពិន័យជាប្រាក់ចំនួន ២០លានរៀលឲ្យជនរងគ្រោះពីរនាក់ជាអ្នករត់ម៉ូតូឌុបវិញ។
ប្រភពពី ភ្នំពេញ ប៉ុស្តិ៍
