សេចក្តីរាយការណ៍មួយពីខេត្តសៀមរាបបានឲ្យដឹងថា កាលពីយប់ថ្ងៃទី០១ ខែកក្កដា ម្សិលមិញ កម្លាំងសមត្ថកិច្ចចម្រុះរបស់ខេត្តសៀមរាបដឹកនាំដោយព្រះរាជអាជ្ញារងអមសាលាដំបូងខេត្តសៀមរាបលោក ជួន សុបញ្ញា បានចុះធ្វើការឆែកឆេររោងពុម្ពមួយកន្លែងស្ថិតនៅក្នុងភូមិវត្តបូរព៌ សង្កាត់សាលាកំរើក ក្រុងសៀមរាប បន្ទាប់ពីមានការសង្ស័យថា រោងពុម្ពមួយនេះបានលួចបោះពុម្ពអាវយឺតឲ្យចលនាអំណាចប្រជាពលរដ្ឋរបស់លោក សួន សេរីរដ្ឋា ក្នុងបំណងប្រឆាំងនឹងការបោះឆ្នោតនៅកម្ពុជា។
បើតាមសេចក្តីរាយការណ៍ដដែល បន្ទាប់ពីធ្វើការឆែកឆេររួច សមត្ថកិច្ចដកហូតបានប័ណ្ណគំរូពាក់ព័ន្ធនឹងចលនាអំណាចប្រជាពលរដ្ឋខ្មែរ ព្រមទាំងអាវយឺតចំនួន២ ដែលនៅខាងមុខមានរូបសញ្ញារបស់ចលនាអំណាចប្រជាពលរដ្ឋខ្មែរ និងនៅពីខាងក្រោយមានសរសេរអក្សរថា «ពលរដ្ឋខ្មែរយើងរួមគ្នាប្រើអំណាចពលរដ្ឋ ប្រឆាំងការបោះឆ្នោតបង្រ្គប់កិច្ច ដែលគ្មានសេរី និងយុត្តិធម៌»។
លោក ជួន សុបញ្ញា ព្រះរាជអាជ្ញារងអមសាលាដំបូងខេត្តសៀមរាបដែលដឹកនាំការចុះឆែកឆេរនេះបានឲ្យដឹងថា ក្នុងប្រតិបត្តិការនោះ សមត្ថកិច្ចបានរកឃើញវត្ថុតាងមួយចំនួនពាក់ព័ន្ធនឹងចលនាអំណាចប្រជាពលរដ្ឋខ្មែរ ដែលប្រឆាំងនឹងលទ្ធផលបោះឆ្នោតនៅកម្ពុជា ប៉ុន្តែលោកមិនបានបញ្ជាក់លំអិតទេ ព្រោះករណីនេះកំពុងស្ថិតក្នុងការស៊ើបអង្កេតនៅឡើយ៕
ប្រភពពី៖ Cambodiapage.info
