ខេត្តបាត់ដំបង ៖ មនុស្សម្នាក់បានស្លាប់ និង១១នាក់ទៀតរងរបួសធ្ងន់ស្រាល នៅក្នុងហេតុការណ៏ក្រឡាប់រថយន្តដឹកអ្នកដំណើរមួយកាលពីរសៀលថ្ងៃទី២៧ កក្កដា ២០១៣ តាមដងផ្លូវជាតិលេខ៥ ក្នុងភូមិកំពង់ព្រៀង ឃុំកំពង់ព្រៀងស្រុកសង្កែ ។ សមត្ថកិច្ចបាសនិយាយថា រថយន្តក្រុងដែលក្រឡាប់នោះរបស់ក្រុមហ៊ុន «ស្រ៊ុនលី» ពាក់ស្លាកលេខ 3B-1223 ធ្វើដំណើរពីភ្នំពេញ មកកាន់ខេត្តបាត់ដំបង ។ អ្នកបើកបរបានរត់គេចខ្លួន ក្រោយបង្កគ្រោះថ្នាក់។ ប្រភពដដែលបានបន្តថា រថយន្តនេះទំនងជាបើកលឿនពេលកំពុងមានភ្លៀងធ្លាក់ លុះដល់ចំនុចផ្លូវកោងខ្លាំង ជាន់ហ្វ្រាំងមិនជាប់ក៏រអិលធ្លាក់ចេញពីផ្លូវ ក្រឡាប់តែម្ដង បណ្ដាលឲ្យ អ្នកដំណើរ១១នាក់របួសធ្ងន់ ស្រាល និងក្មេងម្នាក់ បានស្លាប់ពេលដឹកដល់មន្ទីរពេទ្យ ។
សាក្សីបាននិយាយថា កំណាត់ផ្លូវក្នុងភូមិសាស្ត្រ ឃុំកំពង់ព្រះ គឺជាចំនុចប្រកាសអាសន្នដល់អ្នកដំណើរពីគ្រោះថ្នាក់ចរាចរណ៏ ព្រោះទីនោះសំបូរផ្លូវកោង ។ មន្ត្រីជំនាញបានដាក់ស្លាកសញ្ញា ឲ្យអ្នកដំណើរ បានឃើញ និងប្រុងប្រយ័ត្ន ប៉ុន្តែអ្នកធ្វើដំណើរហាក់មិនសូវយកចិត្តទុកដាក់ទេ។ សាក្សីបានបញ្ជាក់ថា ចំពោះរថយន្តខាងលើនេះ អ្នកបើកបរហាក់ដូចជាបានជាន់ហ្វ្រាំងពេលរអិល ធ្វើឲ្យរថយន្តរេកន្ទុយបោកពេញទំហឹងទៅលើគល់ត្នោត រហូតត្រឡប់ក្បាលទៅរកភ្នំពេញវិញ និងក្រឡាប់តែម្ដង។ សមត្ថកិច្ចជំនាញជំនាញនិយាយថា គេបាននាំយករថយន្តបង្កគ្រោះថ្នាក់នោះ មកកាន់ការិយាល័យជំនាញហើយ ដើម្បីចាត់វិធានការតាមផ្លូវច្បាប់ ៕
ប្រភពពី វាលឥន្ទ្រិយ
0 comments:
Post a Comment