កម្លាំងសាមគ្គី» ឬកម្លាំងនៃការពួតដៃរួបរួមគ្នាដើម្បីកសាងអ្វីមួយគឺពិតជាមានឥទ្ធិពល និងថាមពលសម្បើមហើយវាអាចបង្កើតផលវិជ្ជមានបានច្រើន ក្នុងដំណើរនៃការកសាងអ្វី ដែលជាសេចក្តីប្រាថ្នានោះ។
គណបក្ស សម រង្ស៊ី និងគណបក្សសិទ្ធិមនុស្ស ដែលបានសាមគ្គីគ្នាជាកម្លាំងតែមួយ ឥឡូវនេះកំពុងមានសន្ទុះខ្លាំងក្នុងដំណើរបដិវត្តន៍ នៃនយោបាយខ្មែរ ដោយពួកគេបាននិងកំពុងទទួលបានការគាំទ្រយ៉ាងគគ្រឹកគគ្រេងពីប្រជាពលរដ្ឋ។ គួរឲ្យសរសើរ លទ្ធផលនៃកម្លាំងសាមគ្គីនេះណាស់ ព្រោះវាពិតជាមានថាមពលខ្លាំងមែន។ នៅក្នុងដំណើរជីវិតខ្មែរដើម្បីជីវិតរស់នៅ ក្នុងភាពមាំទាំតកូនតចៅ ជនជាតិខ្មែរគួរតែមានចក្ខុវិស័យគ្រប់គ្រាន់ ក្នុងការបង្កើតកម្លាំងសាមគ្គីដ៏ចាំបាច់នេះ។ ព្រោះវាមិនពិបាកទាល់តែសោះ បើខ្មែរគ្រប់រូបគ្រាន់តែតាំងចិត្តស្រឡាញ់យោគយល់គ្នា ហើយចេះជួយឈឺឆ្អាល និងជួយជ្រោមជ្រែងគ្នា ពេលខ្មែរមានទុក្ខធុរៈ នៅគ្រប់កាលៈទេសៈ។
យើងដឹងហើយថា គឺសមាជិកទាំងអស់ ក្នុងគ្រួសារយើងហ្នឹងហើយ ជាសម្លាញ់ជិតដិតរបស់យើង ជាឈាមជ័ររបស់យើង ជាអ្នកដែលនឹងស្រក់ទឹកភ្នែក យំយែកជាមួយយើងពេលយើងមានទុក្ខ។ ដូច្នេះយើងត្រូវតែសាមគ្គីរួបរួមគ្នា ចាប់តាំងពីពេលនេះតទៅគឺជាពេលដែលទំព័រថ្មីនៃប្រវត្តិសាស្ត្រ ខ្មែរកំពុងបើកឡើងហើយ។ យើងត្រូវចេះស្រឡាញ់គ្នាទើបយើងបានសុខ។ ខ្ញុំអង្គុយខាងមុខកុំព្យូទ័រ នឹកស្រមើស្រមៃសញ្ជឹងគិតមើល ពីព្រឹត្តិការណ៍ដែលកន្លងទៅនៅស្រុកខ្មែរ គឺពេលដែលខ្មែរក្រហមចូលស្រុក ហើយវាបានធ្វើឲ្យខ្ញុំមានចិត្តលន្លង់លន្លោច នឹកខ្លោចផ្សាសោកស្តាយមហាសោកស្តាយ ក្នុងដំណើរវិនាសកម្មនៃជនជាតិខ្មែរដែលយើងស្ទើរតែរលាយបាត់ពី ផែនទីពិភពលោក។
ខ្ញុំគិតថា ពេលនោះ បើសិនជាខ្មែរក្រហម និងខ្មែរជំនាន់លោកសេនាប្រមុខលន់ នល់ ឱបក្រសោបត្រូវរ៉ូវគ្នា បង្កើតបានជាសាមគ្គីភាព ដ៏រឹងមាំរវាងខ្មែរនិងខ្មែរ ហើយចាប់ផ្តើមកសាងជាតិ ដូចសម័យបច្ចុប្បន្ន តើយើងនឹងលូតលាស់ដល់កម្រិតណាទៅក្នុងរវាងសាមសិបឬសែសិបឆ្នាំ ក្រោយមក។ ទាហានខ្មែរក្រហម និងទាហានលោក លន់ នល់ ដែលសុទ្ធតែជាខ្មែរ ទាំងអស់គ្នានៅភូមិស្រុកទេសជាមួយគ្នា ក៏នឹងចាប់ផ្តើមឈរជើងការពារទឹកដី តាមព្រំដែន ពីចុងខ្សែខាងលិច ទៅដល់ចុងខ្សែខាងកើត ហើយយើងនឹងមិនមានវិបត្តិព្រំដែនដូចសព្វថ្ងៃនេះឡើយ។ ប៉ុន្តែ គួរឲ្យស្តាយសាមគ្គីភាព របស់ខ្មែរគឺគ្មានទេពេលនោះ។ មានតែការបំផ្លិចបំផ្លាញជាតិសាសន៍ឯង យ៉ាងក្តៅគគុកយ៉ាងសែនវេទនាដូចចុះនរក ចំពោះជីវិតមនុស្សមួយនគរ ចាស់ក្មេងប្រុសស្រីរាប់លាននាក់។
មនុស្សអាក្រក់នឹងមានជោគជ័យសើចហ៊ោសប្បាយហៀរទឹកមាត់ តែវាជាកំហុសរបស់មេដឹកនាំខ្មែរទូទៅទាំងស្រុង ក្នុងការដែលជាតិខ្មែរត្រូវធ្លាក់ក្នុងអន្លង់មរណៈជាអវសាន។ យើងគួរទទួលស្គាល់ការពិតដែលថា ក្នុងសង្គមខ្មែរគឺច្រើនសតវត្សរ៍មកហើយ ដែលយើងពុំមានកម្លាំងសាមគ្គីរឹងមាំទាល់តែសោះ ក្នុងចំណោមជនជាតិយើង ក្នុងដំណើរនៃការថែរក្សា និងអភិវឌ្ឍប្រទេសជាតិឲ្យបានថ្កុំថ្កើង។ ពាក្យថាថ្កុំថ្កើង គឺមានន័យថា ជាការមានបាននិងដុះដាលប្រកបដោយមោទនភាពនិងកិត្តិយសក្នុងសង្គម ជាតិ។ ខ្មែរយើងអត់មានទេមោទនភាពពិតប្រាកដ និងកិត្តិយសជាតិនោះ។
មកដល់ជំនាន់នេះហើយនៅមានរាស្ត្រខ្មែរ មួយចំនួនធំកំពុងរងទុក្ខវេទនាដោយអំពើពុករលួយ អយុត្តិធម៌ បាត់បង់អស់ដីធ្លីផ្ទះសម្បែង និងជីវភាពប្រចាំថ្ងៃ។ រាស្ត្រយំស្រែកដោយការសង្កត់សង្កិនពី(រដ្ឋាភិបាល)ដែលពួកគេ (បាន) បោះឆ្នោតជូន។ បរទេសទាំងជិតទាំងឆ្ងាយ គេស្គាល់ចរិតមេដឹកនាំ ខ្មែរ ហើយគេប្រមាថមើលងាយដោយសារគេមើលឃើញថា កម្លាំងប្រាជ្ញានៃមេដឹកនាំកម្ពុជាទាំងទាបទាំងខ្ពស់គឺទន់ខ្សោយ។
ប្រសិនបើខ្មែរមានសាមគ្គីភាព តាំងពីជំនាន់ខ្មែរក្រហមចូលស្រុក មកទល់សព្វថ្ងៃនេះ ម៉្លេះខ្មែរនឹងពុំជួបប្រទះបញ្ហាដ៏គ្រោតគ្រាតទាំងនេះសោះឡើយ។ ព្រោះសាមគ្គីភាពពិតជាបាននិងកំពុងធ្វើឲ្យខ្មែររឹងមាំគ្មានការជ្រៀតជ្រែកពីបរទេសដែលវាបង្កើតជាគុណបំណាច់ ពិបាកដោះស្រាយ។
ការដែលខ្មែរពុំអាចរកឃើញសាមគ្គីភាពក្នុងសង្គមទាំងមូលគឺដោយសារខ្មែរវង្វេងក្នុងសុភមង្គល រុងរឿងថ្កុំថ្កើង ផ្ទាល់ខ្លួននិងក្រុមគ្រួសារកូនចៅផៅសន្តាន។ អស់លោកស្រឡាញ់ជាតិណាស់ដែរតែទំនាញនៃសេចក្តីស្នេហា ចំពោះសុភមង្គលនៃគ្រួសារផ្ទាល់ខ្លួន គឺកំពុងតែបាំងសតិសម្បជញ្ញៈអស់លោក មិនឲ្យមើលឃើញភាពអាប់ឱននិងគ្រោះថ្នាក់ដែលនឹងធ្លាក់លើជាតិសាសន៍ខ្មែរ ហើយជាតិសាសន៍នេះអាចនឹងបាត់បង់ទៅនៅក្នុងជំនាន់ មួយ ហើយក៏គ្មាននរណា ទៅគាស់ឆ្អឹងកំពុករបស់អស់លោកពីក្នុងដីមកធ្វើអ្វីកើតដែរ។ លោក ប៉ុល ពត ជាខ្មែរដែលស្រឡាញ់ខ្មែរ ប៉ុន្តែមានកំហុសដ៏សែនធំ ចំពោះជាតិសាសន៍នេះ តែគាត់បាត់រូបបាត់ស្រមោលទៅហើយ គ្មាននរណាទៅធ្វើអ្វីលោកបានទៀតទេ។ សូមខ្មែររកសាមគ្គីភាព អមតៈឲ្យឃើញហើយរក្សាទុកឲ្យគង់វង្ស៕៚
ដោយ ជូ លាងហាក់ ពីសហរដ្ឋអាមេរិក អ៊ីមែល hakchou@hotmail.com ភ្នំពេញ ប៉ុស្តិ៍
0 comments:
Post a Comment